ຊົມເຊີຍ! ປກສ ແຂວງຜົ້ງສາລີຈັບພໍ່ຄ້າ ຂາຍຢາເສບຕິດລາຍໃຫ່ຍໄດ້

0
4963

ຜູ້ຖືກຫາຊື່ທ້າວ ແຄະຈ່ຽມ ອາຍຸ 52 ປີ ຢູ່ບ້ານອຸດົມຜົນ ເມືອງສິງ ແຂວງ ຫລວງນ້ຳທາ; ເຊິ່ງຜູ້ກ່ຽວໄດ້ສາລະພາບພາຍຫລັງຖືກຈັບວ່າ: ເດືອນມັງກອນຂອງປີນີ້, ໄດ້ພາຄອບຄົວໄປຢາມພີ່ນ້ອງທາງເມຍຢູ່ເມືອງຍອດອູ ແຂວງຜົ້ງສາລີ ແລ້ວໄດ້ໄປຮູ້ຈັກກັບທ້າວ ຄຳຫລ້າ ປະຊາຊົນຢູ່ບ້ານໃຕ້ ເມືອງຍອດອູ ແລະ ທ້າວ ຄຳຫລ້າ ໄດ້ແນະນຳໃຫ້ຮູ້ຈັກກັບທ້າວ ອາຊານ ອາຍຸ 33 ປີ. ຫລັງຈາກນັ້ນ, ທ້າວ ແຄະຈ່ຽມ (ຜູ້ຖືກຫາ) ໄດ້ຕິດຕໍ່ພົວພັນຄ້າຂາຍຢາເສບຕິດນຳກັນ, ໂດຍໃນເດືອນກຸມພາ 2016 ໄດ້ຊື້ຢາບ້ານໍາທ້າວ ອາຊານ 1 ມັດ ເທົ່າກັບ 2.000 ເມັດ ແລ້ວເອົາໄປຂາຍໃຫ້ທ້າວ ສິງຄຳ ຢູ່ບ້ານພູຊ້າງ ເມືອງຍອດອູ (ກ່ອນໜ້ານີ້ເຄີຍຄ້າຂາຍຮ່ວມກັນມາແລ້ວ 3 ຄັ້ງ).

ມາຮອດວັນທີ 8 ທັນວາ 2016ຜ່ານມາ, ທ້າວ ແຄະຈ່ຽມ (ຜູ້ຖືກຫາ) ໄດ້ຊື້ຝິ່ນຈາກທ້າວ ສິງຄຳ ຈຳນວນ 2 ກິໂລກຣາມ; ຈາກນັ້ນ, ມີຄົນໂທລະສັບສັ່ງຊື້ຢາເສບຕິດຊຸດໃຫ່ຍນຳຜູ້ກ່ຽວ ໂດຍໃຫ້ເອົາໄປສົ່ງໃຫ້ຢູ່ເມືອງບູນເໜືອ ລວມມີ: ຢາບ້າ 54 ມັດ ກັບ 174 ເມັດ (ລວມຢາບ້າທັງໝົດ 108.157 ເມັດ), ຝິ່ນ 2 ກ້ອນ ໜັກ 2 ກິໂລກລາມ, ເຮໂຣອິນ 1 ແທ່ງ ແລະ ຢາໄອສ໌ 1 ຫໍ່ນ້ອຍ ໂດຍຜູ້ກ່ຽວໄດ້ຊຸກເຊື່ອງຢາເສບຕິດທັງໝົດໄວ້ໃນລົດກະບະວີໂກ້ແຊັມ ໝາຍເລກທະບຽນ ກກ 1953 ຫລວງນ້ຳທາ.

ແຕ່ວ່າ, ການຄ້າຂາຍຢາເສບຕິດຊຸດນີ້ ເຈົ້າໜ້າທີ່ ປກສ ເມືອງຍອດອູ ໄດ້ຮັບຮູ້ຈາກແຫລ່ງຂ່າວມາກ່ອນແລ້ວ ຈຶ່ງໄດ້ຈັດກຳລັງລົງແກ້ໄຂໂດຍດ່ວນ ໂດຍມີການປະສານສົມທົບກັບພາກສ່ວນທີ່ກ່ຽວຂ້ອງຕັ້ງດ່ານກວດກາຢູ່ລະຫວ່າງເສັ້ນທາງເມືອງຍອດອູ; ເຊິ່ງຮອດຕອນແລງຂອງມື້ຕໍ່ມາ (ວັນທີ 9 ທັນວາ 2016) ລົດກະບະຄັນດັ່ງກ່າວກໍຂັບຜ່ານມາ, ເຈົ້າໜ້າທີ່ຈຶ່ງເຂົ້າກວດຄົ້ນລົດພົບເຫັນຢາເສບຕິດຈຳນວນດັ່ງກ່າວ ແລະ ໄດ້ຈັບຕົວທ້າວ ແຄະຈ່ຽມ ໄປດຳເນີນຄະດີ.

ປັດຈຸບັນ, ເຈົ້າໜ້າທີ່ ປກສ ເມືອງ ຍອດອູ ພວມດຳເນີນການສອບສວນທ້າວ ແຄະຈ່ຽມ ຢ່າງລະອຽດ ເພື່ອຕິດຕາມຈັບພວກຮ່ວມຂະບວນການຕໍ່ໄປ, ສ່ວນທ້າວ ແຄະຈ່ຽມ ແມ່ນຈະຖືກດຳເນີນຄະດີໃນຂໍ້ຫາຄ້າຂາຍຢາເສບຕິດ; ເຊິ່ງຈະມີການສະຫລຸບສຳນວນຄະດີສົ່ງໃຫ້ໄອຍະການດຳເນີນຕາມຂັ້ນຕອນກົດໝາຍ.
ຂ່າວ: ປກສ