ເມື່ອຕອນກາງເດິກຂອງມື້ຜ່ານມາ (31 ກໍລະກົດ) ເກີດເຫດທໍ່ແກັສລະເບີດທີ່ເມືອງເກົາສົງ ທາງຕອນໃຕ້

ຂອງໄຕ້ຫວັນ, ເຈົ້າໜ້າທີ່ກູ້ໄພພ້ອມກັບເຈົ້າໜ້າທີ່ທະຫານ ໄດ້ຮີບອອກໄປທີ່ຈຸດເກີດເຫດ ເພື່ອໃຫ້ການ

ຊ່ວຍເຫຼືອຜູ້ໄດ້ຮັບບາດເຈັບຈຳນວນຫຼວງຫຼາຍ ໂດຍລາຍງານແຈ້ງວ່າ ພົບຜູ້ເສຍຊີວິດແລ້ວ 20 ຄົນ ແລະ

ບາດເຈັບອີກບໍ່ຕຳກ່ວາ 270 ຄົນ ເຊິ່ງເຈົ້າໜ້າທີ່ໄດ້ເລັ່ງຊ່ວຍເຫຼືອເອົາຜູ້ບາດເຈັບ ທີ່ມີເດັກນ້ອຍລວມຢູ່ນຳ

ສົ່ງໂຮງໝໍໃກ້ຄຽງ.

ຕາມແຫຼ່ງຂ່າວຂອງຕ່າງປະເທດລະບຸວ່າ ບາງຄົນມີບາດແຜຈາກຖືກໄຟໄໝ້ ໂດຍຜູ້ເຫັນເຫດການໄດ້ເລົ່າ

ວ່າ ກ່ອນທີ່ຈະເກີດເຫດລະເບີດຂຶ້ນນັ້ນ ໄດ້ເຫັນຄວັນລອຍອອກມາຈາກທໍ່ລະບາຍນ້ຳຂ້າງຖະໜົນ ພ້ອມ

ກັບມີກິ່ນຄ້າຍຄືກັນກັບແກັສກຸ້ມໄປທົ່ວທັງບໍລິເວນດັ່ງກ່າວ ແລະ ຕໍ່ມາໄດ້ເກີດລະເບີດຂຶ້ນຢ່າງຮຸນແຮງ

ມີແປວໄຟລຸກຂຶ້ນຖ້ວມ ແລະ ລົດຍົນຫຼາຍຄັນພິກຂ້ວາມຫງາຍທ້ອງ ເຊິ່ງແຮງລະເບີດນັ້ນ ໄດ້ເຮັດໃຫ້ເກີດ

ແຮງສັ່ນສະເທືອນປານແຜ່ນດິນໄຫວ, ຖະໜົນຖືກແຮງລະເບີດຈົນກາຍເປັນຫຼຸມເລິກ ແລະ ອາຄານຢູ່ໃນ

ບໍລິເວນດັ່ງກ່າວ ໄດ້ຮັບຄວາມເສຍຫາຍໄປຫຼາຍຫຼັງອີກດ້ວຍ.

ສື່ຂອງໄຕ້ຫວັນລາຍງານວ່າ ມີການສັນນິຖານໃນເບື້ອງຕົ້ນວ່າ ເຫດລະເບີດຄັ້ງນີ້ ເກີດຈາກທໍ່ແກັສແຕກ

ແຕ່ກໍຍັງບໍ່ມີຝ່າຍໃດອອກມາຢືນຢັນສາເຫດທີ່ແທ້ຈິງໃນຂະນະນີ້, ດ້ານເຈົ້າໜ້າທີ່ທ້ອງຖິ່ນຂອງເມືອງ

ເກົາສົງ ໄດ້ຈັດຕັ້ງສູນສຸກເສີນ ພ້ອມຈັດກຳລັງທະຫານໄປຊ່ວຍເຫຼືອ ໃນການປະຕິບັດການກູ້ໄພອີກດ້ວຍ

ພ້ອມກັບອົບພະຍົບປະຊາຊົນທີ່ອາໄສຢູ່ໃນບໍລິເວນທີ່ເກີດລະເບີດ ໄປຍັງໂຮງຮຽນແຫ່ງໜຶ່ງ ທີ່ຕັ້ງເປັນສູນ

ສຸກເສີນ.

ເຈົ້າໜ້າທີ່ກູ້ໄພຂອງໄຕ້ຫວັນຄາດວ່າ ຈຳນວນຜູ້ເສຍຊີວິດຈາກເຫດລະເບີດຄັ້ງນີ້ອາດເພີ່ມຂຶ້ນອີກ ເນື່ອງ

ຈາກມີຜູ້ບາດເຈັບສາຫັດຈຳນວນຫຼາຍ ແລະ ຍັງບໍ່ສາມາດສະຫຼຸບຜົນເສຍຫາຍໄດ້ທັງໝົດໃນເວລານີ້

ແລະ ຫຼັງຈາກເກີດເຫດລະເບີດເມື່ອປະມານຕອນທ່ຽງຄືນ ຈົນເຖິງເວລານີ້ ເຈົ້າໜ້າທີ່ຍັງບໍ່ສາມາດຄວບ

ຄຸມເພີງທີ່ລຸກໄໝ້ສອງຝັ່ງຂອງຖະໜົນເອົາໄວ້ໄດ້ ເນື່ອງຈາກພື້ນທີ່ເກີດລະເບີດນັ້ນ ຄວບຄຸມພື້ນທີ່ກວ້າງ

ເຖິງ 2 – 3 ກິໂລແມັດ.