ສຳນັກຂ່າວຕ່າງປະເທດ ລາຍງານໃນວັນທີ 9 ທັນວານີ້ວ່າ ລັດຖະສະພາເກົາຫລີໃຕ້ ມີມະຕິດ້ວຍຄະແນນສຽງ 234 ຕໍ່ 56 ສຽງ ໃນການຜ່ານຮ່າງລັດຖະບັນຍັດ ຖອດຖອນປະທານາທິບໍດີ ປາກ ກຶນເຮ ອອກຈາກຕຳແໜ່ງແລ້ວ ແລະ ໄດ້ມີການສັ່ງການ ໃຫ້ມອບອຳນາດບໍລິຫານທັງໝົດຂອງນາງ ໃຫ້ກັບນາຍົກລັດຖະມົນຕີເກົາຫລີໃຕ້ ເປັນຜູ້ຮັກສາການແທນຊົ່ວຄາວ ໃນລະຫວ່າງການລໍຖ້າຄຳຕັດສິນຂອງສານລັດຖະທຳມະນູນເກົາຫລີໃຕ້ ວ່າຈະອອກຄຳພິພາກສາຊີ້ຂາດວ່າ ຈະຢືນຢັນເຫັນດີຕາມມະຕິຂອງລັດຖະສະພາ ຫລື ບໍ່ ຊຶ່ງອາດຕ້ອງໃຊ້ເວລາດົນເຖິງ 6 ເດືອນ ນັບຈາກນີ້ເປັນຕົ້ນໄປ.
ທັງນີ້ ຖ້າຫາກສານລັດຖະທຳມະນູນເກົາຫລີໃຕ້ ພິພາກສາຢືນຢັນເຫັນດີຕາມມະຕິຂອງລັດຖະສະພາ ຈະເຮັດໃຫ້ ທ່ານ ນາງ ປາກ ກຶນເຮ ຖືກປົດອອກຈາກຕຳແໜ່ງຢ່າງຖາວອນ, ສ້າງຄວາມເຄັ່ງຮ້ອນໃນເວທີການເມືອງເກົາຫລີໃຕ້ໃນປັຈຸບັນ ທີ່ມີປະຊາຊົນອອກມາເດີນຂະບວນປະທ້ວງ ຮຽກຮ້ອງໃຫ້ ທ່ານ ນາງ ປາກ ກຶນເຮ ລາອອກຈາກຕຳແໜ່ງ ຈຳນວນຫລາຍແສນຄົນ ໃນແຕ່ລະອາທິດ.
ຕິດຕາມເຮົາທາງFacebook ກົດຖືກໃຈເລີຍ!