ລະດັບສຳຕິປັນຍາຈະໜ້ອຍ ຫຼືຫຼາຍ ສ່ວນໜຶ່ງແມ່ນຂຶ້ນກັບກຳມະພັນ ຫຼືເວົ້າໄດ້ງ່າຍໆວ່າ ຖ້າພໍ່ແມ່ສະຫຼາດ ມີໂອກາດສູງທີ່ລູກຈະສະຫຼາດໄດ້ ເຊິ່ງເປັນເລື່ອງຂອງກຳມະພັນທີ່ຄວບຄຸມ, ແຕ່ກໍຍັງມີປັດໄຈອື່ນໆປະກອບອີກດ້ວຍເຊັ່ນ: ການໄດ້ຮັບສານອາຫານທີ່ພຽງພໍ ຕໍ່ການຈະເລີນເຕີບໂຕຂອງສະໝອງ ຕັ້ງແຕ່ຢູ່ໃນທ້ອງ ແລະຕະຫຼອດຊ່ວງຍັງນ້ອຍ ທີ່ໄດ້ຮັບການກະຕຸ້ນຢ່າງເໝາະສົມ, ສຳລັບ ອີຄິວ ກໍເປັນສິ່ງໜຶ່ງທີ່ພໍ່ແມ່ສ້າງໃຫ້ລູກໄດ້ ເຊິ່ງເດັກຈະມີພຶດຕິກຳ ແລະນິໄສແນວໃດ ຂຶ້ນຢູ່ກັບການເບິ່ງແຍງຂອງພໍ່ແມ່ເປັນຫຼັກ, ດັ່ງນັ້ນ ການໃຫ້ຄວາມສຳຄັນຂອງ ອີຄິວກັບລູກຕັ້ງແຕ່ນ້ອຍ ຈະຊ່ວຍໃຫ້ເດັກນ້ອຍຢູ່ໃນສັງຄົມພາຍໜ້າໄດ້ຢ່າງມີຄວາມສຸກທັງຕໍ່ຕົນເອງ ແລະຄົນອື່ນ
- ໃຫ້ຄວາມຮັກ: ເຊິ່ງມີຄວາມສຳຄັນຫຼາຍ ແລະບໍ່ພຽງແຕ່ໃຫ້ຄວາມຮັກເທົ່ານັ້ນ, ພໍ່ແມ່ຕ້ອງສະແດງອອກຢ່າງເໝາະສົມອີກດ້ວຍ, ບາງຄົນຮັກລູກແຕ່ບໍ່ກ້າເວົ້າ ບໍ່ກ້າສະແດງອອກໃຫ້ລູກເຫັນ, ສະນັ້ນ ການຍິ້ມໃຫ້, ການສຳຜັດ, ການກອດ, ລ້ວນແລ້ວແຕ່ເປັນພາສາກາຍ ທີ່ບົ່ງບອກເຖິງຄວາມຮັກທີ່ພໍ່ແມ່ມີຕໍ່ລູກ
- ຄອບຄົວມີຄວາມສຸກ: ການທີ່ພໍ່ແມ່ມີຄວາມສຳພັນທີ່ດີຕໍ່ກັນ, ລວມເຖິງມີທັດສະນະຄະຕິ, ຄວາມຄິດເຫັນໃນການລ້ຽງລູກ, ການສັ່ງສອນລູກໃຫ້ເປັນຄົນດີ ຫຼືຖ້າມີການຂັດແຍ່ງກັນ ກໍຄວນເວົ້າ ຕົກລົງກັນໃຫ້ເປັນທິດຽກັນ
- ຮູ້ ແລະເຂົ້າໃຈການພັດທະນາຂອງລູກ: ຕ້ອງທຳຄວາມເຂົ້າໃຈ ແລະປະຕິບັດຕໍ່ລູກໄດ້ຢ່າງຖືກຕ້ອງ ແລະເໝາະສົມ ເຊິ່ງພັດທະນາການແມ່ນ ຕັ້ງແຕ່ຍັງນ້ອຍຈົນເຖິງໄວລຸ້ນ
- ພໍ່ແມ່ມີສ່ວນຮ່ວມໃນການລ້ຽງລູກໃຫ້ຫຼາຍທີ່ສຸດ: ຖ້າພໍ່ແມ່ຫາກມີວຽກທັງສອງ ກໍຄວນໃຫ້ເວລາກັບລູກໃນຍາມກາງຄືນ ເພື່ອເຮັດໃຫ້ລູກມີຄວາມອົບອຸ່ນໃຈ
- ສົ່ງເສີມໃຫ້ລູກມີຄວາມຮູ້ສຶກວ່າຕົນເອງມີຄ່າ: ເມື່ອລູກເຮັດດີ ຫຼືປະສົບຄວາມສຳເລັດ ພໍ່ແມ່ຕ້ອງຍ້ອຍໍຊົມເຊີຍລູກ, ເມື່ອລູກທໍ້ຖອຍ ກໍຄວນໃຫ້ກຳລັງໃຈ
- ໃຫ້ອິດສະລະ ແລະໃຫ້ໂອກາດໃນການຕັດສິນໃຈ: ຈະຊ່ວຍໃຫ້ລູກມີຄວາມຄິດສ້າງສັນ, ກ້າຄິດ, ກ້າເຮັດ ບໍ່ພະຍາຍາມບັງຄັບຄວາມຄິດລູກ
- ສອນລູກໃຫ້ຮັກຕົນເອງ ແລະຮັກຄົນອື່ນ: ພໍ່ແມ່ຕ້ອງສອນລູກໃຫ້ຮູ້ຈັກເອື້ອເຟື້ອ ເພື່ອແຜ່ຄົນອື່ນ ແລະສອນໃຫ້ລູກຮູ້ຈັກຮັກຕົນເອງ
- ໃຫ້ລູກຮູ້ຈັກຄິດແບບມີເຫດຜົນ: ໂດຍສົ່ງເສີມໃນເລື່ອງທີ່ກ່ຽວຂ້ອງກັບຊີວິດປະຈຳວັນ ແລະເລື່ອງສຳຄັນ
- ສອນລູກໃຫ້ຮູ້ຈັກຫາຄວາມສຸກໃຫ້ຕົນເອງ: ເພາະເດັກຫຼາຍຄົນທີ່ເກັ່ງ, ມີຄວາມປະສົບຄວາມສຳເລັດດ້ານການຮຽນ ແຕ່ບໍ່ມີຄວາມສຸກ ເພາະຄວາມຄຽດເລື່ອງການຮັກສາຄວາມເກັ່ງຂອງຕົນເອງໄວ້ຕະຫຼອດໄປ ຫຼືໃຫ້ເກັ່ງຫຼາຍຂຶ້ນ ເພື່ອເອົາຊະນະຄົນອື່ນ
- ເປັນແບບຢ່າງທີ່ດີໃຫ້ກັບລູກ: ພໍ່ກັບແມ່ ຕ້ອງເປັນໂຕຢ່າງທີ່ດີໃຫ້ກັບລູກ ເພື່ອເຮັດໃຫ້ລູກໄດ້ຮຽນຮູ້ຢ່າງອັດຕະໂນມັດ ໃນແບບທີ່ບໍ່ຕ້ອງເວົ້າ ຫຼືສອນອີກຕໍ່ໄປ