ສຳນັກຂ່າວຕ່າງປະເທດລາຍງານຈາກນະຄອນນິວຢອກ ປະເທດສະຫະລັດອາເມລິກາ ເມື່ອວັນທີ 8 ທັນວາ ທີ່ຜ່ານມາວ່າ. ທ່ານ ວິເຈຍ໌ ແນມໄບຣ໌ ທີ່ປຶກສາພິເສດຂອງທ່ານ ບັນ ຄີ ມູນ ເລຂາທິການໃຫຍ່ສະຫະປະຊາຊາດ (ຢູເອັນ) ຖະແຫຼງການເມື່ອວັນພະຫັດວ່າ ທາງຢູເອັນ ຮຽກຮ້ອງໃຫ້ທ່ານນາງ ອອງຊານ ຊູຈີ ລັດຖະມົນຕີວ່າການກະຊວງການຕ່າງປະເທດຂອງມຽນມາ ເດີນທາງລົງພື່ນທີ່ໃນເມືອງ ມອງດໍ ແລະ ເມືອງ ບູຕີຕ່ອງ ໃນລັດຍະໄຂ່ ຢູ່ທາງພາກຕະເວັນຕົກຂອງປະເທດ ເຊິ່ງມີຊາຍແດນຕິດກັບປະເທດບັງກາລາເທດ ເພື່ອກວດສອບສະພາບເຫດການດ້ານຄວາມໝັ້ນຄົງ ແລະ ຄວາມຮຸນແຮງທີ່ເກີດຂຶ້ນ ຈາກເຫດການທີ່ກອງທັບມຽນມາເຂົ້າໄປປະຕິບັດການທາງທະຫານເມືອກາງເດືອນຕຸລາທີ່ຜ່ານມາ ດ້ວຍຕົວເອງ ເຊິ່ງເຫດການດັ່ງກ່າວໄດ້ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 86 ຄົນ ແລະ ເຮັດໃຫ້ຊາວໂຣຮິນຈາປະມານ 10,000-20,000 ຄົນຕ້ອງອົບພະຍົບຈາກຖິ່ນຖານ.

ການທີ່ເຈົ້າໜ້າທີ່ລັດຖະບານພົນລະເຮືອນ ແລະ ກອງທັບມຽນມາປະສານສຽງຢືນຢັນການປະຕິເສດສຽງວິຈານ ແລະ ຂໍ້ກ່າວຫາຂອງຫຼາຍຝ່າຍວ່າມີການລະເມີດສິດທິມະນຸດໃນວົງກ້ວາງທີ່ລັດຍະໄຂ່ ແລະ ປະຕິບັດການຂອງທະຫານເຂົ້າຂ່າຍເປັນການກວດລ້າງທາງຊາດພັນ ມັນໄດ້ເຮັດໃຫ້ປະຊາຊົນໃນເຂດລັດຍະໄຂ່ ເກີດຄວາມຄຽດແຄ້ນພາຍໃນທ້ອງຖິ່ນ ແລະ ສ້າງຄວາມຜິດຫວັງໃຫ້ແກ່ປະຊາຄົມໂລກ ສະນັ້ນບຸກຄົນທີ່ກ່ຽວຂ້ອງໂດຍກົງຈິ່ງຄວນສະແດງທ່າທີໃນການແກ້ໄຂບັນຫາຢ່າງເປັນຮູບປະທຳ ແລະ ຊັດເຈນກວ່ານີ້

ຂ່າວຈາກ: http://www.dailynews.co.th/foreign/541576
ຕິດຕາມຂ່າວເສດຖະກິດລາວ ກົດໄລຄ໌ເລີຍ!