ທີ່ກອງປະຊຸມສະຫລຸບວຽກງານຂະແໜງພາຍໃນ ປະຈຳສົກປີ 2015-2016 ແລະ ວາງທິດທາງແຜການເຄື່ອນໄຫວວຽກງານ ປະຈຳປີ 2017 ລະຫວ່າງວັນທີ 5-7 ທັນວາ 2016 ນີ້ ທີ່ຫໍປະຊຸມແຫ່ງຊາດ ນະຄອນຫລວງວຽງຈັນ ໂດຍການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ໂອ້ລົມ ແລະ ເນັ້ນໃຫ້ກະຊວງພາຍໃນ ຕ້ອງໄດ້ເອົາໃຈໃສ່ເສີມຂະຫຍາຍບົດບາດການນຳພາຂອງຄະນະພັກ ເພີ່ມທະວີການຄຸ້ມຄອງຂອງຄະນະນຳແຕ່ລະຂັ້ນ ແລະ ຄວາມເປັນແບບຢ່າງ ໃຫ້ແກ່ພະນັກງານ-ລັດຖະກອນ. ເສີມຂະຫຍາຍຄວາມເປັນເຈົ້າການ ຫັນແນວທາງນະໂຍບາຍຂອງພັກ ເປັນກົດໝາຍ ແລະ ລະບຽບການ ບໍລິຫານຄຸ້ມຄອງລັດໃຫ້ມີປະສິດທິຜົນ ແລະ ສອດຄ່ອງ. ເພີ່ມທະວີຄວາມຮັບຜິດຊອບຢ່າງເປັນເຈົ້າການ ໃນການຄົ້ນຄວ້າປັບປຸງກົງຈັກການຈັດຕັ້ງ ອົງການບໍລິຫານລັດ ໃຫ້ຖືກຕ້ອງຕາມທິດກະທັດຮັດ ມີປະສິດທິຜົນ ແລະ ປະສິດທິພາບ.
ພ້ອມດຽວກັນນັ້ນ ທ່ານຍັງໄດ້ເນັ້ນໜັກໃຫ້ ເພີ່ມທະວີຄວາມຮັບຜິດຊອບຢ່າງເປັນເຈົ້າການ ຜັນຂະຫຍາຍ ແລະ ຈັດຕັ້ງປະຕິບັດກົດໝາຍ ວ່າດ້ວຍພະນັກງານ-ລັດຖະກອນ ໃຫ້ມີຜົນສັກສິດ. ເອົາໃຈໃສ່ປັບປຸງກົດໝາຍວ່າດ້ວຍທະບຽນຄອບຄົວ ໃຫ້ສອດຄ່ອງ ກັບສະພາບຄວາມເປັນຈິງ ຂອງປະເທດເຮົາ ແລະ ເພີ່ມທະວີລົງຊຸກຍູ້ຕິດຕາມວຽກງານຊົນເຜົ່າ-ສາສະໜາ ສະມາຄົມມູນນິທິ ເພາະວຽກເຫຼົ່ານີ້ ເປັນວຽກ ທີ່ມີລັກສະນະຫຼໍ່ແຫຼມ ເຊິ່ງພວກເຮົາໄດ້ມີລະບຽບການທີ່ ເປັນເຄື່ອງມືໃນການຄຸ້ມຄອງວຽກງານດັ່ງກ່າວແລ້ວ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!