ອີງໃສ່ແຫລ່ງຂ່າວຈາກ ໜ່ວຍກູ້ໄພມູນິທິຈີນແຈ້ງໃຫ້ຮູ້ວ່າ ເມື່ອວັນທີ 7 ທັນວາ 2016 , ເວລາປະມານ 13:16 ນາທີ ໄດ້ຮັບເເຈັງເຂົ້າເບີສຸກເສີນ1628 ບຸກຄົນບໍ່ອອກນາມ ວ່າໄດ້ພົບສົບຍິງສາວ ບໍ່ຮູ້ຊື່ (ແຫລ່ງຂ່າວເບື້ອງຕົ້ນບໍ່ໄດ້ເປີດເຜີຍໃຫ້ຮູ້) ນອນເສຍຊີວິດຢູ່ທີ່ໃນປ່າ ເຂດບ້ານ ຫ້ວຍນ້ຳໄສ ເມືອງ ສີໂຄດຕະບອງ ນະຄອນຫຼວງວຽງຈັນ
ຫນ່ວຍກູ້ໄພມູນິທິຈີນ ແລະ ເຈົ້າໜ້າທີ່ທ້ອງຖິ່ນໄດ້ເຮັດການກວດສອບຮ່າງຜູ້ເສຍຊີວິດ ພົບວ່າທີ່ໃບໜ້າຂອງຍິງສາວຜູ້ເສຍຊີວິດມີຮ່ອງຮອຍການຖືກນ້ຳກົດສາດ ແລະ ທີ່ງ່ອນຄໍແມ່ນຖືກຕີດ້ວຍຂອງແຂງຢ່າງແຮງ ແລະ ຢູ່ໃນບໍລິເວນສະຖານພົບສົບມີຮ່ອງຮອຍຂອງການຕໍ່ສູ້ກັນ ເຊິ່ງການສັນນິຖານເບື້ອງຕົ້ນຄາດວ່າ ແມ່ນການຄາດຕະກຳໂດຍຄົນຮ້າຍມີການວາງແຜນລ່ວງໜ້າ.
ຕາມທີ່ເຈົ້າໜ້າທີ່ສືບສວນ-ສອບສວນ ໄດ້ສອບຖາມຂໍ້ມູນເບື້ອງຕົ້ນກັບນ້ອງຊາຍຂອງຜູ້ເສຍຊີວິດກໍ່ໄດ້ຮູ້ວ່າ ຜູ້ຕາຍແມ່ນເຮັດວຽກຢູ່ໂຮງງານແຫ່ງໜຶ່ງເຂດບ້ານ ໂພນປາເປົ້າ ຕອນເຊົ້າກໍ່ເຫັນຜູ້ຕາຍເຮັດວຽກຕາມປົກກະຕິ ແລະ ຕອນສວາຍຜູ້ຕາຍກໍ່ຄອບໄປກິນເຂົ້າສວາຍ ແລ້ວບໍ່ເຫັນກັບເຂົ້າມາ ຈົນຮອດເວລາ 13:30 ນາທີກໍ່ໄດ້ຮັບແຈ້ງວ່າຜູ້ກ່ຽວເສຍຊີວິດແລ້ວຍ້ອນຖືກຄາດຕະກຳ ສ່ວນລາຍລະອຽດອື່ນໆກ່ຽວກັບຄະດີນີ້ ຄົນຮ້າຍຜູ້ກໍ່ເຫດຄາດຕະກຳຈະມີໃຜຢູ່ເບື້ອງຫຼັງຍັງຢູ່ໃນການສືບສວນ-ສອບສວນຂອງເຈົ້າໜ້າທີ່ຕໍ່ໄປ
ສ່ວນສົບຂອງຜູ້ເສຍຊີວິດ ທາງຫນ່ວຍກູ້ໄພມູນິທິຈີນ ແມ່ນໄດ້ໄປຝາກໄວ້ໂຮງເຢັນທີ່ໂຮງໝໍເສດຖາທິຣາດ ເພື່ອໃຫ້ຄອບຄົວພີ່ນ້ອງຂອງຜູ້ເສຍຊີວິດເດີນທາງມາແຕ່ຕ່າງແຂວງເພື່ອມາຮັບສົບໄປປະກອບພິທີທາງສາສະໜາ
ທາງທີມງານລາວໂພສຕ໌ ຂໍສະແດງຄວາມເສຍໃຈແກ່ຄອບຄົວຂອງຜູ້ເສຍຊີວິດທີ່ໄດ້ສູນເສຍຄົນທີ່ຮັກໄປຢ່າງບໍ່ມີມື້ຫວນກັບ ແລະ ຂໍສົ່ງດວງວິນຍານຂອງຜູ້ເສຍຊີວິດໄປສູ່ສຸຂະຕິ ສູ່ພົບພູມທີ່ດີດ້ວຍເຖີດ.
ຂ່າວຈາກ: ໜ່ວຍກູ້ໄພມູນິທິຈີນ
ຕິດຕາມຂ່າວເສດຖະກິດລາວ ກົດໄລຄ໌ເລີຍ!