ກອງທັບອິດສະລາແອນໂຫດອີກ ໂຈມຕີທາງອາກາດຢ່າງດຸເດືອດ ຖະຫຼົ່ມຕະຫຼາດໃກ້ເມືອງກາຊາຊິຕີ້ ໃນຂະນະທີ່
ຊາວປາເລດຕິນຫຼາຍຮ້ອຍຄົນ ກຳລັງຈັບຈ່າຍຊື້ເຄື່ອງຂອງຢູ່ ເສຍຊີວິດຢ່າງໜ້ອຍ 15 ຄົນ ແລະ ບາດເຈັບອີກນັບ
160 ຄົນ.
ສຳນັກຂ່າວຕ່າງປະເທດລາຍງານ ເມື່ອວັນທີ 30 ກໍລະກົດຜ່ານມາວ່າ ເກີດເຫດສະເທືອນຂັວນຂຶ້ນອີກໃນກາຊາ
ເມື່ອກອງທັບອິດສະລາແອນ ປະຕິບັດການໂຈມຕີທາງອາກາດ ຖະຫຼົ່ມຕະຫຼາດແຫ່ງໜຶ່ງໃນເມືອງຊີໄຈຢາ ໃກ້ໆ
ກັບເມືອງກາຊາຊິຕີ້ ໃນຂະນະທີ່ຊາວປາເລດຕິນຈຳນວນຫຼວງຫຼາຍ ກຳລັງຈັບຈ່າຍຊື້ສິນຄ້າ ເມື່ອວັນທີ 30 ກໍລະ
ກົດຜ່ານມາ ເປັນເຫດເຮັດໃຫ້ມີຜູ້ເສຍຊີວິດ 15 ຄົນ ແລະ ບາດເຈັບເດຍລະດາດອີກ 160 ຄົນ.
ໂຄສົກກະຊວງສາທາລະນະສຸກຂອງປາເລດຕິນເປີດເຜີຍວ່າ ກອງທັບອິດສະລາແອນ ໄດ້ໂຈມຕີຕະຫຼາດແຫ່ງນີ້
ເຊິ່ງເປັນຕະຫຼາດຂາຍຜັກ ແລະ ໝາກໄມ້ເປັນສ່ວນໃຫຍ່ ໃນລະຫວ່າງທີ່ມີຊາວບ້ານຫຼາຍຮ້ອຍຄົນ ກຳລັງຊື້ເຄື່ອງ
ຂອງຢູ່ໃນຕະຫຼາດ, ການໂຈມຕີທາງອາກາດຖະຫຼົ່ມຕະຫຼາດແຫ່ງດັ່ງກ່າວ ແມ່ນຢູ່ໃນຊ່ວງຂອງເວລາພັກການສູ້
ຮົບ ຫຼື ຢຸດຍິງ 4 ຊົ່ວໂມງ ລະຫວ່າງ 15:00 – 19:00 ຂອງວັນທີ 30 ກໍລະກົດ ຕາມເວລາໃນທ້ອງຖິ່ນ ຕາມການຮຽກ
ຮ້ອງໂດຍກອງທັບອິດສະລາແອນ, ແຕ່ດ້ານກຸ່ມຮາມັສ ໄດ້ປະຕິເສດທີ່ຈະຍອມຮັບຂໍ້ຕົກລົງຢຸດຍິງດັ່ງກ່າວ ໂດຍ
ໂຄສົກຂອງກຸ່ມຮາມັສບອກວ່າ ເປັນການຢຸດຍິງທີ່ບໍ່ມີຄວາມໝາຍອັນໃດ.
ຢ່າງໃດກໍຕາມ ທາງການອິດສະລາແອນ ໄດ້ເປີດສຽງໄຊເຣນເຕືອນໄພດັງກຶກກ້ອງຢ່າງຕໍ່ເນື່ອງ ໃນພາກໃຕ້ຂອງ
ອິດສະລາແອນ ຫຼັງຈາກເລີ່ມເຂົ້າສູ່ຊ່ວງເວລາຢຸດຍິງ ເພື່ອເຕືອນປະຊາຊົນໃຫ້ລະວັງວ່າ ກຸ່ມຮາມັສອາດຈະຍິງຈະ
ຫຼວດມາໂຈມຕີອິດສະລາແອນ ໃນຂະນະທີ່ແພດປາເລດຕິນເປີດເຜີຍວ່າ ອິດສະລາແອນໄດ້ໂຈມຕີທາງອາກາດ
ໃນພື້ນທີ່ອື່ນໆອີກດ້ວຍ ໂດຍເມືອງຄານຢູນິດ ໄດ້ຕົກເປັນເປົ້າໂຈມຕີ ຫຼັງເຂົ້າສູ່ຊ່ວງເວລາຢຸດຍິງ ເຮັດໃຫ້ມີຊາວ
ປາເລດຕິນເສຍຊີວິດອີກ 7 ຄົນ.
ເຖິງປະຈຸບັນມີຊາວປາເລດຕິນ ເສຍຊີວິດຈາກການບຸກໂຈມຕີຂອງອິດສະລາແອນແລ້ວ ຢ່າງໜ້ອຍ 1,270 ກ່ວາ
ຄົນ ເຊິ່ງສ່ວນຫຼາຍແມ່ນເປັນພົນລະເມືອງຜູ້ບໍລິສຸດ.