ໂດຍຕອບສະໜອງຕາມການເຊື້ອເຊີນຂອງ ພັກກອມມູນິດປອກຕຸຍການ, ຄະນະຜູ້ແທນພັກ ປປ ລາວ ນໍາໂດຍ ສະຫາຍ ສົມພອນ ສີຈະເລີນ ຮອງເລຂາຄະນະບໍລິຫານງານພັກ ຄະນະພົວພັນຕ່າງປະເທດສູນກາງພັກ, ຮອງຫົວໜ້າຄະນະພົວພັນຕ່າງປະເທດສູນກາງພັກ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມໃຫຍ່ຄັ້ງທີ XX ຂອງ ພັກກອມມູນິດປອກຕຸຍການ ລະຫວ່າງວັນທີ 2-4 ທັນວາ 2016, ພາຍໃຕ້ຄໍາຂວັນ “ພັກກອມມູນິດປອກຕຸຍການ ເພື່ອປະຊາຊົນຊາວຜູ້ອອກແຮງງານ, ປະຊາທິປະໄຕ ແລະສັງຄົມນິຍົມ”. ກອງປະຊຸມໃຫຍ່ ຄັ້ງທີ XX ຂອງພັກກອມມູນິດປອກຕຸຍການ ເປັນເຫດການທີ່ສໍາຄັນທາງດ້ານການເມືອງຂອງ ພັກກອມມູນິດປອກຕຸຍການ ແລະ ປະຊາຊົນຊາວຜູ້ອອກແຮງງານ ປອກຕຸຍການ ເພາະໄດ້ໄຂຂຶ້ນໃນທ່າມກາງບັນຍາກາດ ທີ່ພັກຫາກໍ່ສະເຫລີມສະຫລອງ ວັນສ້າງຕັ້ງພັກຄົບຮອບ 95 ປີດ້ວຍກິດຈະກໍາຕ່າງໆ ທີ່ມີຄວາມໝາຍທາງດ້ານການເມືອງ.
ກອງປະຊຸມໃຫຍ່ຄັ້ງນີ້ ໄດ້ສະຫລຸບຕີລາຄາການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ XIX ແລະ ວາງທິດທາງ, ນະໂຍບາຍຂອງພັກໃນ 4 ປີຕໍ່ໜ້າ ແນ່ໃສ່ເພື່ອປັບປຸງກໍ່ສ້າງພັກ ໃຫ້ໜັກແໜ້ນເຂັ້ມແຂງ ເຊິ່ງກອງປະຊຸມໃຫຍ່ໄດ້ເລືອກຕັ້ງ ຄະນະບໍລິຫານງານສູນກາງພັກ ສະໄໝທີ 20 ຈໍານວນ 146 ສະຫາຍ, ກໍາມະການກົມການເມືອງສູນກາງພັກ ຈໍານວນ 20 ສະຫາຍ, ຄະນະເລຂາທິການສູນກາງພັກ ຈໍານວນ 10 ສະຫາຍ, ກອງປະຊຸມຄັ້ງປະຖົມມະລຶກ ຂອງຄະນະບໍລິຫານງານສູນກາງພັກ ສະໄໝທີ XX ໄດ້ເປັນເອກະສັນເລືອກເອົາ ສະຫາຍ ເຮໂຣນີໂມ ເດີ ຊູຊາ ເປັນເລຂາທິການໃຫຍ່ ຄະນະບໍລິຫານງານສູນກາງພັກ ອີກສະໄໝໜຶ່ງ.
ຄະນະຜູ້ແທນພັກ ປປ ລາວ ໄດ້ຮັບກຽດເຂົ້າຢ້ຽມຂໍ່ານັບ ສະຫາຍ ເຮໂຣນີໂມ ເດີ ຊູຊາ, ເລຂາທິການໃຫຍ່ ພັກກອມມູນິດ ປອກຕຸຍການ ໃນໂອກາດດັ່ງກ່າວ ຄະນະຜູ້ແທນພັກເຮົາ ໄດ້ນໍາເອົາຄໍາຢ້ຽມຢາມຖາມຂ່າວອັນອົບອຸ່ນ ແລະ ຂໍ່ານັບຊົມເຊີຍຂອງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ປປ ລາວ ຝາກໄປຍັງສະຫາຍເລຂາທິການໃຫຍ່ ພັກກອມມູນິດປອກຕຸຍການ ເຮໂຣນີໂມ ເດີ ຊູຊາ ພ້ອມທັງມອບສານອວຍພອນກອງປະຊຸມໃຫຍ່ ພັກກອມມູນິກປອກຕຸຍການ ຈາກຄະນະບໍລິຫານງານສູນກາງພັກ ປປ ລາວ. ສະຫາຍ ເລຂາທິການໃຫຍ່ ຊູຊາ ໄດ້ສະແດງຄວາມຂອບໃຈ ແລະ ຮູ້ບຸນຄຸນ ຕໍ່ສະຫາຍ ເລຂາທິການໃຫຍ່ ບຸນຍັງ ວໍລະຈິດ ກໍ່ຄື ພັກ ປປ ລາວ ທີ່ໄດ້ສົ່ງຄະນະຜູ້ແທນເຂົ້າຮ່ວມກອງປະຊຸມໃຫຍ່ ເຊິ່ງເປັນການສະແດງເຖິງຄວາມສາມັກຄີ ແລະ ການສະໜັບສະໜູນຂອງພັກ ປປ ລາວ ຕໍ່ພາລະກິດຕໍ່ສູ້ອັນເປັນທໍາ ເພື່ອຄວາມຍຸຕິທໍາ, ເພື່ອສິດທິຂອງຊາວຜູ້ອອກແຮງງານ ແລະ ເພື່ອລັດທິສັງຄົມນິຍົມຂອງຊາວກອມມູນິດປອກຕຸຍການ ພ້ອມທັງຢືນຢັນຈະສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນ ທີ່ເປັນມູນເຊື້ອອັນດີຖານສະຫາຍອ້າຍນ້ອງ ລະຫວ່າງ ສອງພັກ ແລະ ປະຊາຊົນສອງຊາດ ໃຫ້ນັບມື້ນັບແໜ້ນແຟ້ນ ແລະ ແຕກດອກອອກຜົນຍິ່ງໆຂຶ້ນ.
ກອງປະຊຸມໃຫຍ່ຄັ້ງນີ້ ມີຜູ້ແທນເຂົ້າຮ່ວມ 800 ສະຫາຍ ເຊິ່ງເປັນຕົວແທນໃຫ້ແກ່ ສະມາຊິກພັກກອມມູນິດປອກຕຸຍການ ທົ່ວປະເທດຈໍານວນ 54.000 ກວ່າສະຫາຍ ແລະ ຍັງມີຄະນະຜູ້ແທນຈາກບັນດາພັກການເມືອງຂອງຕ່າງປະເທດຈໍານວນ 67 ພັກການເມືອງຈາກ 52 ປະເທດໃນທົ່ວໂລກ ໃນນັ້ນ ມີຄະນະຜູ້ແທນຈາກພັກກອມມູນິດຈີນ, ພັກກອມມູນິດຫວຽດນາມ, ພັກ ປປ ລາວ, ພັກກອມມູນິດກູບາ, ພັກແຮງງານເກົາຫລີ ລວມທັງໝົດ 200 ກວ່າສະຫາຍ.
ພັກກອມມູນິດປອກຕຸຍການ ໄດ້ຈັດກອງປະຊຸມໃຫຍ່ຂອງຕົນ ໃນທຸກໆ 4 ປີໂດຍໄດ້ເຊີນພັກການເມືອງທີ່ກ້າວໜ້າໃນໂລກ ເຂົ້າຮ່ວມ, ພັກເຮົາໄດ້ເຂົ້າຮ່ວມກອງປະຊຸມໃຫຍ່ ຂອງພັກກອມມູນິດປອກຕຸຍການນັບ ແຕ່ຄັ້ງທີ XII ປີ 1989 ເປັນຕົ້ນມາ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!