ອີງຕາມການລາຍງານຂ່າວ ຂອງສຳນັກຂ່າວຊິນຫົວ ລາຍງານເມື່ອວັນທີ 3 ທັນວາຜ່ານມາວ່າ ເວລາປະມານ 11:30 ໂມງ ໄດ້ເກີດເຫດລະເບີດ ຢູ່ໃນເໝືອງຖ່ານຫີນ ຂອງບໍລິສັດ ເປົາໝ່າ ໄມນິ່ງ ຈໍາກັດ ໃນເມືອງຊື່ເຟິງ ເຂດປົກຄອງຕົນເອງ ຂອງມົງໂກເລຍ ເຮັດໃຫ້ມີຜູ້ເສຍຊີວິດ 32 ຄົນ ແລະບາດເຈັບອີກຈຳນວນຫຼາຍ ເຊິ່ງໃນເຈົ້າໜ້າທີ່ໄດ້ຄວບຄຸມຕົວຜູ້ມີສ່ວນຮັບຜິດຊອບກັບເຫດການດັ່ງກ່າວ ສ່ວນສາເຫດຍັງຢູ່ໃນການສອບສວນ
ໂດຍທາງລັດຖະບານເມືອງຊື່ເຟິງເວົ້າວ່າ ຂະນະເກີດເຫດມີກຳມະກອນເຮັດວຽກຢູ່ໃນຊັ້ນໃຕ້ດິນທັງໝົດ 181 ຄົນ ເຊິ່ງຫຼັງຈາກເກີດເຫດທາງບໍລິສັດດັ່ງກ່າວ ແລະໜ່ວຍງານທີ່ກ່ຽວຂ້ອງໄດ້ສົ່ງເຈົ້າໜ້າທີ່ຕຳຫຼວດ 268 ຄົນ, ເຈົ້າໜ້າທີ່ກູ້ໄພ ແລະແພດ 119 ຄົນ ພ້ອມກັບລົດໂຮງໝໍອີກ 32 ຄັນ ເຂົ້າຊ່ວຍເຫຼືອຜູ້ປະສົບໄພຢ່າງຕໍ່ເນື່ອງ ຈົນສາມາດຊ່ວຍຜູ້ເຄາະຮ້າຍໄດ້ທັງໝົດ 149 ຄົນ ແລະມີຜູ້ເສຍຊີວິດ 32 ຄົນ