ຄະນະຜູ້ແທນລາວນຳໂດຍ ທ່ານ ບຸນເກີດ ສັງສົມສັກ ລັດຖະມົນຕີປະຈຳສຳນັກນາຍົກລັດຖະມົນຕີ ແລະ ຜູ້ຮັບຜິດຊອບວຽກງານຝຣ່ັງໂກໂຟນີໄດ້ເດີນທາງເຂົ້າຮ່ວມກອງປະຊຸມລະດັບລັດຖະ ມົນຕີ ແລະ ກອງປະຊຸມສຸດຍອດຂອງອົງການຝຣ່ັງໂກໂຟນີສາກົນໃນນາມຜູ້ຕາງໜ້າພິເສດຂອງປະທານປະເທດແຫ່ງ ສປປ ລາວ ຊຶ່ງກອງປະຊຸມດັ່ງກ່າວໄດ້ດຳເນີນ ແຕ່ວັນທີ 23 ເຖິງ 27 ພະຈິກຜ່ານມານີ້ທີ່ນະຄອນຫຼວງອັນຕານານາຣີໂວແຫ່ງມາດາກັດສະກາ.
ກອງປະຊຸມສຸດຍອດຂອງອົງການຝຣັ່ງໂກໂຟນີຄັ້ງນີ້ໄດ້ດຳເນີນເປັນຄັ້ງທີ 16 ພາຍໃຕ້ຫົວຂໍ້ “ການຂະຫຍາຍຕົວດ້ານເສດຖະກິດ ແລະ ການພັດທະນາເພື່ອຜົນປະໂຫຍດຂອງທຸກຄົນ” ໂດຍໄດ້ມີການພິຈາລະນາຫຼາຍບັນຫາເປັນຕົ້ນແມ່ນກ່ຽວກັບສະພາບການຢູ່ພາຍໃນຂົງເຂດຝຣ່ັງໂກໂຟນີ ແລະ ການຮ່ວມມືລະຫວ່າງບັນດາປະເທດສະມາຊິກ ແລະອົງການໃນການຈັດຕັ້ງປະຕິບັດຜັນຂະຫຍາຍບັນດາແຜນງານ ແລະ ໂຄງການຕ່າງໆທີ່ໄດ້ວາງໄວ້ນັບທັງສິ່ງທີ່ຈະໄດ້ຕົກລົງອະນຸມັດຈາກກອງປະຊຸມໃນຄັ້ງນີ້.
ສປປ ລາວ ເຮົາໄດ້ເຂົ້າເປັນສະມາຊິກສົມບູນຂອງອົງການຝຣ່ັງ ໂກໂຟນີ ມາແຕ່ປີ 1991 ຊຶ່ງມາເຖິງປະຈຸບັນການພົວພັນຮ່ວມມືກັບອົງການໄດ້ດຳເນີນໄປຢ່າງ ຕັ້ງໜ້າໂດຍກວມເອົາບັນດາຂົງເຂດ ແລະ ຂະແໜງການທີ່ສຳຄັນຄື: ການສຶກສາ ແລະ ຝຶກອົບຮົມວິຊາຊີບ, ວັດທະນະທຳ-ສັງຄົມ, ຍຸຕິທຳ ແລະ ກົດໝາຍ, ສາທາລະນະສຸກ ແລະ ອື່ນໆ.
ໃນກາງເດືອນຕຸລາ 2016 ຜ່ານມາທ່ານ ນາງ ມີກາແອນ ຊັງ ເລຂາທິການໃຫຍ່ອົງການຝຣ່ັງ ໂກໂຟນີ ໄດ້ເຄື່ອນໄຫວຢ້ຽມຢາມ ສປປ ລາວ ຢ່າງເປັນທາງການພາຍຫຼັງການເຂົ້າດຳລົງຕຳແໜ່ງຊຶ່ງໄດ້ເປັນນິມິດໝາຍອັນດີໃຫ້ແກ່ການທົບທວນຕີລາຄາການພົວພັນຮ່ວມມືລະຫວ່າງສອງຝ່າຍແນໃສ່ເພື່ອການເພີ່ມທະວີຂຶ້ນຢ່າງມີຄວາມກ້າວໜ້າໃນອະນາ ຄົດຕໍ່ໄປ.
ຈາກໜັງສືພິມເສດຖະກິດ-ສັງຄົມ