ໃນວັນທີ 5 ທັນວານີ້ ຢູ່ຄະນະຈັດຕັ້ງສູນກາງພັກ ໄດ້ຈັດກອງປະຊຸມສະຫລຸບ ວຽກງານຈັດຕັ້ງ ປະຈໍາປີ 2016 ຂຶ້ນ ເພື່ອຕີລາຄາຄືນ ການຈັດຕັ້ງປະຕິບັດວຽກງານຈັດຕັ້ງ ໃນໄລຍະ 1 ປີຜ່ານມາ ແລະ ວາງທິດທາງແຜນການໃນຕໍ່ໜ້າ ໂດຍພາຍໃຕ້ການເປັນປະທານຂອງ ທ່ານ ຈັນສີ ໂພສີຄໍາ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ມີບັນດາຮອງຄະນະຈັດຕັ້ງ ສູນກາງພັກ, ຫົວໜ້າກົມ, ຮອງກົມ ແລະ ພະນັກງານສະມາຊິກພັກ, ພ້ອມດ້ວຍພະນັກງານກ່ຽວຂ້ອງເຂົ້າຮ່ວມ.
ທ່ານ ວັນໄຊ ພອງສະຫວັນ ຮອງຫົວໜ້າຄະນະຈັດຕັ້ງສູນກາງພັກ ກ່າວວ່າ: ຕະຫລອດໄລຍະ 1 ປີຜ່ານມາ ຄະນະພັກແຕ່ລະຂັ້ນ ໄດ້ເອົາໃຈໃສ່ສຶກສາອົບຮົມ ການເມືອງ-ແນວຄິດ ຂອງສະມາຊິກພັກ, ພະນັກງານທີ່ຢູ່ໃນຄວາມຮັບຜິດຊອບຂອງຕົນ ເປັນປົກກະຕິ ເປັນຕົ້ນແມ່ນ ສຶກສາອົບຮົມແນວທາງການເມືອງ ຂອງພັກ–ລັດໃນແຕ່ລະໄລຍະ, ເອົາໃຈໃສ່ປັບປຸງການຈັດຕັ້ງ ຮາກຖານພັກ ໂດຍສຸມໃສ່ການກໍ່ສ້າງໜ່ວຍພັກເຂັ້ມແຂງ ຮູ້ນໍາພາຮອບດ້ານ ຕິດພັນກັບຂະບວນການ 3 ສ້າງ ເຮັດໃຫ້ຈໍານວນໜ່ວຍພັກ ເຂັ້ມແຂງ–ຮູ້ນໍາພາຮອບດ້ານ ເພີ່ມຂຶ້ນກວ່າທຸກໆປີ, ສະເພາະປີ 2016 ສ້າງໄດ້ 10.838 ໜ່ວຍ, ກວມ 59,66% ຂອງໜ່ວຍພັກທັງໝົດ, ຢືດໝັ້ນເຄົາລົບ ແລະ ປະຕິບັດຫລັກການນໍາພາຂອງພັກ ຕາມຫລັກການລວມສູນປະຊາທິປະໄຕ, ຕົກລົງເປັນໝູ່ຄະນະ ມີການແບ່ງງານ, ແບ່ງຄວາມຮັບຜິດຊອບຈະແຈ້ງ, ດ້ວຍການກໍານົດພາລະບົດບາດໜ້າທີ່ຂອງຕົນ, ເອົາໃຈໃສ່ກໍ່ສ້າງບໍາລຸງພະນັກງານ ທັງໄລຍະຍາວ ແລະ ສັ້ນໃນດ້ານຕ່າງໆ ຢູພາຍໃນ ແລະ ຕ່າງປະເທດໄດ້ 1.110 ຄົນ, ຍິງ 213 ຄົນ ພ້ອມກັນນັ້ນ ກໍໄດ້ປັບປຸງການຈັດຕັ້ງຂອງລັດ ສອດຄ່ອງກັບລະບຽບພັກ ແລະ ກົດໝາຍການປົກຄອງ, ໄດ້ຄົ້ນຄ້ວາສ້າງຕັ້ງສະພາປະຊາຊົນ ຂັ້ນທ້ອງຖີ່ນ, ສ່ວນຢູ່ສະພາແຫ່ງຊາດ ກໍໄດ້ສ້າງຕັ້ງ ຄະນະກໍາມາທິການເສດຖະກິດເຕັກໂນໂລຊີ ແລະ ກໍາມາທິການຍຸຕິທໍາ ປ່ຽນຊື່ຫ້ອງວ່າການສະພາແຫ່ງຊາດ ເປັນຄະນະເລຂາທິການສະພາແຫ່ງຊາດ, ປັບປຸງກົນໄກການສ້າງກົດໝາຍ, ກົນໄກປະສານງານ ລະຫວ່າງ ສະພາແຫ່ງຊາດ ກັບອົງການບໍລິຫານ, ຕຸລາການ ໃຫ້ມີຄວາມສອດຄ່ອງດີຂຶ້ນກວ່າເກົ່າ, ຄົ້ົ້ນຄ້ວາປັບປຸງກົງຈັກລັດຖະບານ ໂດຍສືບຕໍ່ຮັກສາ 18 ກະຊວງ 3 ອົງການທຽບເທົ່າຄືເກົ່າ, ແຕ່ໄດ້ຄົ້ນຄວ້າສັບຊ້ອນກົງຈັກການຈັດຕັ້ງບາງຫົວໜ່ວຍ ທີ່ຂຶ້ນກັບຫ້ອງວ່າການ ສໍານັກງານນາຍົກລັດຖະມົນຕີ ແລະ ບາງກະຊວງອົງການຈໍານວນໜຶ່ງຄືນໃໝ່, ປັບປຸງພາລະບົດບາດກົນໄກການບໍລິຫານຂອງບັນດາກະຊວງ–ອົງການ ໃຫ້ໄປຕາມທິດປະຕິບັດບົດບາດ ຄຸ້ມຄອງມະຫາພາກເປັນຕົ້ນຕໍ, ຫັນຄວາມຮັບຜິດຊອບ ສິດຕົກລົງໃຫ້ແຂວງ ແລະ ເມືອງຫລາຍຂຶ້ນ ຕາມນະໂຍບາຍ 3 ສ້າງ.
ທ່ານ ວັນໄຊ ພອງສະຫວັນ ກ່າວຕື່ມວ່າ: ຄຽງຄູ່ກັນນີ້ ການປະຕິບັດວຽກງານຈັດຕັ້ງ ໃນໄລຍະຜ່ານມາ ກໍມີຫລາຍບັນຫາທີ່ຕ້ອງໄດ້ເອົາໃຈໃສ່ປັບປຸງແກ້ໄຂຕື່ມ ເປັນຕົ້ນຄວາມເອົາໃຈໃສ່ຂອງຄະນະພັກຈໍານວນໜຶ່ງ ຕໍ່ການສຶກສາອົບຮົມການເມືອງແນວຄິດ ໃຫ້ສະມາຊິກພັກ, ພະນັກງານທີ່ຢູ່ ໃນຄວາມຮັບຜິດຊອບຂອງຕົນບໍ່ທັນສູງ, ການສ້າງແຫລ່ງຂະຫຍາຍພັກບໍ່ທັນດີ, ຂະບວນການທົດສອບ ບໍ່ມີລັກສະນະຮອບດ້ານ ເບິ່ງແຕ່ດ້ານໃດດ້ານໜຶ່ງ, ການສຶກສາອົບຮົມເປົ້າໝາຍເຂົ້າພັກບໍ່ເລິກເຊິ່ງ, ການຄຸ້ມຄອງ, ຈັດວາງ, ຊັບຊ້ອນນໍາໃຊ້ພະນັກງານບໍ່ທັນດີ, ຂາດກົນໄກທີ່ມີສ່ວນຮ່ວມຂອງຫລາຍພາກສ່ວນຂອງສັງຄົມ ແລະ ບໍ່ທັນນໍາໃຊ້ຫລາຍວິທີ ໃນການນໍາໃຊ້ພະນັກງານ, ດ້ານໜຶ່ງຍັງຂາດຄວາມເດັດຂາດ, ເຂັ້ມງວດຕໍ່ການແກ້ໄຂບັນຫາພະນັກງານ, ການນໍາຂອງຄະນະຈັດຕັ້ງແຕ່ລະທ້ອງຖິ່ນ, ຫົວໜ້າກົມຈັດຕັ້ງແຕ່ລະກະຊວງ-ອົງການ, ມີການປ່ຽນແປງເລື້ອຍໆ, ຄະນະພັກແຕ່ລະຂັ້ນ ບໍ່ທັນເອົາໃຈໃສ່ປະຕິບັດນະໂຍບາຍ ທີ່ເປັນສິ່ງກະຕຸກຊຸກຍູ້ ການປະຕິບັດໜ້າທີ່ວຽກງານຂອງ ຖັນແຖວພະນັກງານ–ລັດຖະກອນ ຢ່າງເໝາະສົມ ໂດຍສະເພາະຕໍ່ຜູ້ທີ່ມີຄວາມສາມາດພິເສດ ຫລື ຕໍ່ພະນັກງານໃນຂົງເຂດທີ່ມີຄວາມຫຍຸ້ງຍາກ, ທຸລະກັນດານຢ່າງສົມເຫດສົມຜົນ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!