ໃນທ້າຍອາທິດທີ່ຜ່ານມາ, ສານປະຊາຊົນຂັ້ນຕົ້ນ ແຂວງຊຽງຂວາງ ໄດ້ນຳເອົາຄະດີຂອງທ້າວ ບຸນມີມົວ ແລະ ທ້າວ ທອງຢ່າງ ທີ່ເຈົ້າໜ້າທີ່ກອງບັນຊາການ ປກສ ແຂວງຊຽງຂວາງ ມ້າງໄດ້ໃນວັນທີ 20 ກັນຍາ 2015 ຂຶ້ນມາຕັດສິນ. ທ້າວ ບຸນມີມົວ ອາຍຸ 26 ປີ ຢູ່ບ້ານທ່າດິນແດງ ເມືອງໄຊທານີ ນະຄອນຫຼວງວຽງຈັນ ແລະ ທ້າວ ທອງຢ່າງ ອາຍຸ 30 ປີ ຢູ່ບ້ານຜາສັງ ເມືອງເຟືອງ ແຂວງວຽງຈັນ ຖືກຈັບໃນສະຖານຄ້າຂາຍຢາເສບຕິດ ລວມມີ: ເຮໂຣອິນ 8 ແທ່ງ ນ້ຳໜັກ 3 ກິໂລກຼາມ, ຝຸ່ນສີຂາວ ( ເຮໂຣອິນປອມ ) 10 ແທ່ງ ນ້ຳໜັກ 4,2 ກິໂລກຼາມ ແລະ ຢາບ້າ 6 ມັດ ເທົ່າກັບ 12.000 ເມັດ ນ້ຳໜັກ 1,5 ກິໂລກຼາມ.
ຜ່ານການຄົ້ນຄວ້າພິຈາລະນາຂໍ້ມູນຫຼັກຖານຢ່າງຖີ່ຖ້ວນ ແລະ ຄຳຮັບສາລະພາບຂອງພວກຈຳເລີຍ, ສານປະຊາຊົນຂັ້ນຕົ້ນ ແຂວງຊຽງຂວາງ ເຫັນວ່າຈຳເລີຍທັງສອງ ເປັນຄົນທີ່ມີສະຕິສຳປະຊັນຍະຄົບຖ້ວນ, ມີອາຍຸກະສຽນທາງອາຍາ ແຕ່ມີເຈຕະນາກະທຳຜິດຕໍ່ກົດໝາຍຂອງ ສປປ ລາວ ທີ່ໄດ້ລະບຸໄວ້ໃນມາດຕາ 9 ຂອງກົດໝາຍວ່າດ້ວຍຢາເສບຕິດ ສະບັບປີ 2007 ແລະ ການກະທຳຂອງພວກຈຳເລີຍຍັງເປັນການແຕະຕ້ອງຕໍ່ຄວາມໝັ້ນຄົງຂອງຊາດ ແລະ ຄວາມເປັນລະບຽບຮຽບຮ້ອຍຂອງສັງຄົມ

ດັ່ງນັ້ນ, ສານປະຊາຊົນຂັ້ນຕົ້ນ ແຂວງຊຽງຂວາງ ຈຶ່ງໄດ້ຕັດສິນປະຫານຊີວິດຈຳເລີຍທັງສອງ ພ້ອມທັງນຳເອົາຂອງກາງທັງໝົດໄປທຳລາຍຖິ້ມ

ຂ່າວ: ໜັງສືພິມ ປກສ