ເພື່ອເປັນການສ້າງຂະບວນການ ເນື່ອງໃນໂອກາດວັນສາກົນລຶບລ້າງການໃຊ້ຄວາມຮຸນແຮງຕໍ່ແມ່ຍິງ ຄົບຮອບ 16 ປີ (25/11/2000-25/11/2016) ດັ່ງນັ້ນ ໃນຕອນເຊົ້າຂອງວັນທີ 26 ພະຈິກ 2016 ທີ່ສວນປະຕູໄຊ ນະຄອນ ຫຼວງວຽງຈັນ ຈິ່ງໄດ້ຈັດພິທີຍ່າງເພື່ອສຸຂະພາບ ເຊິ່ງເລີ່ມແຕ່ສວນປະຕູໄຊຫາຫໍຄຳ ແລ້ວກັບມາສິ້ນສຸດທີ່ສວນປະຕູໄຊ ໂດຍການເປັນກຽດເຂົ້າຮ່ວມຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ປະທານຄະນະກຳມາທິການເພື່ອຄວາມກ້າວໜ້າຂອງແມ່ຍິງ ແລະ ເດັກແຫ່ງຊາດ ເຊິ່ງມີບັນດາລັດຖະມົນຕີ-ຮອງລັດຖະມົນຕີ ປະທານສູນກາງສະຫະພັນແມ່ຍິງລາວ ອົງການທຽບເທົ່າ ບັນດາທູດຕານຸທູດ ຜູ້ຕາງໜ້າຈາກກະຊວງຕ່າງໆອ້ອມຂ້າງສູນກາງ ສະຖາບັນການສຶກສາ ແລະ ມວນຊົນຊາວນະຄອນຫຼວງວຽງຈັນເຂົ້າຮ່ວມ.
ທ່ານ ສອນໄຊ ສີພັນດອນ ໄດ້ກ່າວວ່າ ການຈັດງານຄັ້ງນີ້ເປັນການໂຄສະນາ ປຸກລະດົມ ປຸກຈິດສຳນຶກໃຫ້ທົ່ວປວງຊົນໄດ້ຮັບຮູ້ ແລະ ເຂົ້າໃຈກ່ຽວກັບບັນຫາຂອງການໃຊ້ຄວາມຮຸນແຮງຕໍ່ແມ່ຍິງ ການຈຳແນກຕໍ່ແມ່ຍິງ ແລະ ການລ່ວງລະເມີດຕໍ່ສິດທິຂອງແມ່ຍິງ ຕາມທີ່ລະບຸໄວ້ໃນກົດໝາຍສາກົນ ກໍຄືສົນທິສັນຍາວ່າດ້ວຍການລຶບລ້າງທຸກຮູບການຈຳແນກຕໍ່ແມ່ຍິງ (ສົນທິສັນຍາຊີດໍ) ຂອງສະຫະປະຊາຊາດ ທີ່ມີຜົນບັງຄັບໃຊ້ໃນປີ 1981 ໂດຍມີ 189 ປະເທດເປັນພາຄີ ແລະ ສປປ.ລາວ ກໍໄດ້ເຂົ້າຮ່ວມນັບແຕ່ປີ 2000 ເປັນຕົ້ນມາ ໂດຍໄດ້ກຳນົດນະໂຍບາຍສົ່ງເສີມ ພັດທະນາແມ່ຍິງ ແລະ ເດັກຍິງ ເພື່ອຫຼຸດຜ່ອນການຈຳແນກ ແລະ ການໃຊ້ຄວາມຮຸນແຮງຕໍ່ແມ່ຍິງແລະເດັກ ໄດ້ເອົາໃຈໃສ່ປົກປ້ອງ ຊ່ອຍເຫຼືອແມ່ຍິງ ຜູ້ຖືກເຄາະຮ້າຍຈາກການໃຊ້ຄວາມຮຸນແຮງ ທັງຢູ່ພາຍໃນ ແລະ ຕ່າງປະເທດ ຊຸກຍູ້ສົ່ງເສີມ ໃຫ້ໂອກາດແມ່ຍິງແລະເດັກນ້ອຍ ໄດ້ປະກອບສ່ວນເຂົ້າໃນຂະບວນການພັດທະນາໃຫ້ນັບມື້ນັບຫຼາຍຂຶ້ນ ນອກນັ້ນຍັງໄດ້ສ້າງບັນດານິຕິກຳສຳຄັນຈຳນວນນຶ່ງ ເຊັ່ນ ກົດໝາຍວ່າດ້ວຍການຕ້ານ ແລະ ສະກັດກັ້ນການໃຊ້ຄວາມຮຸນແຮງຕໍ່ແມ່ຍິງແລະເດັກ ແຜນດຳເນີນງານແຫ່ງຊາດກ່ຽວກັບການປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ໄລຍະປີ 2014-2020 ໂອກາດດຽວກັນນີ້ ທ່ານຮອງນາຍົກລັດຖະມົນຕີ ຍັງໄດ້ຮຽກຮ້ອງມາຍັງທຸກພາກ ສ່ວນໃນສັງຄົມຈົ່ງພ້ອມກັນເອົາໃຈໃສ່ໂຄສະນາ ເຜີຍແຜ່ ແລະ ປຸກຈິດສຳນຶກໃຫ້ທົ່ວສັງມີຄວາມຮັບຮູ້ ເຂົ້າໃຈກ່ຽວກັບການໃຊ້ຄວາມຮຸນແຮງຕໍ່ແມ່ຍິງ ເປັນສິ່ງທີ່ສັງຄົມຮັບບໍ່ໄດ້ ຄຽງຄູ່ກັນນັ້ນ ກໍໃຫ້ການຊ່ອຍເຫຼືອແມ່ຍິງຜູ້ທີ່ຖືກເຄາະຮ້າຍຈາກການໃຊ້ຄວາມຮຸນແຮງ ໃຫ້ຄຳປຶກສາດ້ານສຸຂະພາບ ດ້ານຈິດໃຈ ບ່ອນພັກເຊົາທີ່ປອດໄພ ຊ່ອຍເຫຼືອທາງດ້ານກົດໝາຍຈາກເຈົ້າໜ້າທີ່ຍຸຕິທຳ ເຈົ້າໜ້າທີ່ຕຳຫຼວດ ໄອຍະການ ແລະ ສານ ໂຮມເຖິງການສ້າງເງື່ອນໄຂ ແລະ ໂອກາດໃຫ້ແກ່ແມ່ຍິງບັນດາເຜົ່າໄດ້ເຂົ້າເຖິງການສຶກສາ ໄດ້ຮັບການເຝິກອົບຮົມດ້ານການເມືອງ ແລະ ດ້ານເຕັກນິກວິຊາຊີບ ເພື່ອສ້າງຄວາມເຂັ້ມແຂງໃຫ້ແກ່ແມ່ຍິງ ແລະ ຄອບຄົວ ຍົກສູງຄຸນະພາບຊີວິດໃຫ້ມີການເປັນຢູ່ທີ່ດີຂຶ້ນ ແລະ ຫຼຸດພົ້ນອອກຈາກຄວາມທຸກຍາກ.
ຂ່າວ/ພາບ: ຄໍາວົງສັກ
ຕິດຕາມຂ່າວເສດຖະກິດລາວ ກົດໄລຄ໌ເລີຍ!