ສຳນັກຂ່າວຕ່າງປະເທດ ລາຍງານໃນວັນທີ 29 ພະຈິກຜ່ານມນີ້ວ່າ ຫວຽດນາມກຳນົດໃຫ້ວັນທີ 4 ທັນວາ ເປັນມື້ໄວ້ທຸກແຫ່ງຊາດ ເພື່ອລະນຶກເຖິງ ທ່ານ ຟີແດນ ກາສໂຕຣ ຜູ້ນຳການປະຕິວັດກູບາ ທີ່ເຖິງແກ່ມໍລະນະກຳ ໃນວັນສຸກທີ 25 ພະຈິກຜ່ານມານີ້ ລວມອາຍຸໄດ້ 90 ປີ ໂດຍກະຊວງການຕ່າງປະເທດຫວຽດນາມ ໄດ້ລະບຸອີງຕາມມະຕິຕົກລົງຂອງ ຄະນະບໍລິຫານງານສູນກາງ ພັກກອມມູນິດຫວຽດນາມ, ສະພາແຫ່ງຊາດ, ປະທານປະເທດ, ລັດຖະບານ ແລະ ແນວໂຮມປະເທດຊາດຫວຽດນາມ ຄັ້ງວັນທີ 28 ພະຈິກ 2016.
ໃນໂອກາດດຽວກັນນີ້ ທ່ານ ຫງວຽນ ຟູຈ້ອງ ເລຂາທິການໃຫຍ່ ຄະນະບໍລິຫານງານສູນກາງ ພັກກອມມູນິດຫວຽດນາມ, ທ່ານ ເຈິ່ນ ດ້າຍກວາງ ປະທານປະເທດ ແລະ ທ່ານ ຫງວຽນ ຊວນຟຸກ ນາຍົກລັດຖະມົນຕີຫວຽດນາມ ພ້ອມດ້ວຍເຈົ້າໜ້າທີ່ອາວຸໂສຈຳນວນຫລາຍທ່ານ ໄດ້ເຂົ້າຮ່ວມສະແດງຄວາມເຄົາລົບຕໍ່ ສະຫາຍ ຟີແດນ ກາສໂຕຣ ທີ່ສະຖານທູດກູບາ ປະຈຳນະຄອນຫລວງຮ່າໂນ້ຍ ອີກດ້ວຍ.
ຕິດຕາມເຮົາທາງFacebook ກົດຖືກໃຈເລີຍ!