ອີງຕາມການລາຍງານສຳນັກຂ່າວຕ່າງປະເທດເມື່ອວັນທີ 29 ພະຈິກຜ່ານມາວ່າ ປະທານາທິບໍດີເກົາຫຼີໃຕ້ ໄດ້ສະເໜີໃຫ້ລັດຖະສະພາ ເປັນຜູ້ຕັດສິນອະນາຄົດ ວ່າລາວຄວນຈະລົງຈາກຕຳແໜ່ງດ້ວຍວິທີໃດ ແລະຕອນໃດ ຫຼັງຈາກມີສ່ວນກ່ຽວຂ້ອງກັບໝູ່ສະໜິດຂອງລາວ ສໍ້ໂກງ ໂດຍອາໄສບາລະມີຂອງປະທານາທິບໍດີ ຂະນະທີ່ຝ່າຍຄ້ານບໍ່ພໍໃຈ ເພາະເຫັນວ່ານາງປາກກຶນເຮ ພະຍາຍາມຖ່ວງເວລາ ແລະຕ້ອງການຫຼີກລຽງການຖືກຖອດຖອນ
“ປາກ ກຶນເຮ” ກໍາລັງຈະກາຍເປັນປະທານາທິບໍດີຄົນທໍາອິດຂອງຄົນເກົາຫຼີໃຕ້ ທີ່ຢູ່ໃນຕໍາແໜ່ງບໍ່ຄົບໄລຍະເວລາທີ່ກໍານົດໄວ້, ຫຼັງຈາກລາວອອກມາຍື່ນຂໍໍ້ສະເໜີວ່າ ໃຫ້ລັດຖະສະພາເປັນຜູ້ຕັດສິນວ່າ ລາວຄວນຈະລົງຈາກຕຳແໜ່ງແນວໃດ ແລະຕອນໃດ ໂດຍໃຫ້ເຫດຜົນວ່າ ເພື່ອໃຫ້ການປ່ຽນອຳນາດເປັນໄປຢ່າງງ່າຍດາຍ ແລະບໍ່ເກີດຄວາມວຸ້ນວາຍທາງດ້ານການເມືອງ
ແຕ່ຝ່າຍຄ້ານຕອບໂຕ້ວ່າ ນີ້ເປັນຂະບວນການຂອງລາວ ທີ່ຕ້ອງການຫຼີກລຽງຂະບວນການຖືກຖອດຖອນ ແລະທີ່ສຳຄັນ ເປັນຄວາມພະຍາຍາມຕໍ່ເວລາໃຫ້ລາວ ໄດ້ຢູ່ໃນຕຳແໜ່ງໄປອີກໄລຍະ ເພາະລາວຮູ້ດີວ່າ ຕ້ອງໃຊ້ເວລາອີກຫຼາຍເດືອນ ລັດຖະສະພາຈຶ່ງຈະຕົກລົງກັນໄດ້ ລວມເຖິງການກຳນົດມື້ ແລະວິທີໃຫ້ລາວລົງຈາກຕຳແໜ່ງ
ໃນຂະນະທີ່ສະມາຊິກສະພາທີ່ສັງກັດພັກ “ແຊນູຣີ” ເຊິ່ງເປັນຝ່າຍລັດຖະບານ ໄດ້ອອກມາຮຽກຮ້ອງໃຫ້ປະທານາທິບໍດີອອກຈາກຕຳແໜ່ງ ເພື່ອຈະໄດ້ຮັກສາສັກສີ ແລະກຽດຕິຍົດຂອງຕົນເອງ