ເຫດການໄດ້ເກີດຂຶ້ນເມື່ອເວລາປະມານ 1:20 ໂມງເຊົ້າ ຂອງວັນທີ 28 ພະຈິກ 2016 ທີ່ຜ່ານມາ ໂດຍໄດ້ຮັບແຈ້ງເຂົ້າມາເບີສຸກເສີນ 1628 ວ່າມີເຫດລົດໃຫ່ຍເສຍຫຼັກຕຳກອງໄມ້ເຂດບ້ານຕານມີໄຊ, ເມືອງໄຊທານີ, ນະຄອນຫຼວງວຽງຈັນ ພໍໜ່ວຍກູ້ໄພຮອດຈຸດເກີດເຫດພົບເຫັນຜູ້ບາດເຈັບຕິດພາຍໃນ 2 ຄົນທາງໝ່ວຍກູ້ໄພມູນນິທິຈີນ ຈຶ່ງໄດ້ຂໍກຳລັງໝ່ວຍກູ້ໄພນະຄອນຫຼວງໃຫ້ເອົາເຄືອງມາຕັດຖາງເພື່ອເອົາຄົນອອກຈາກລົດ. ໃນຂະນະໝ່ວຍກູ້ໄພພວມປະຕິບັດໜ້າທີ່ຢູ່ນັ້ນ ໄດ້ມີລົດ REVO ຂີ່ມາດ້ວຍຄວາມໄວສູງ ແລ້ວເສຍຫຼັກເຂົ້າມາຕຳເອົາອາສາໜ່ວຍກູ້ໄພ ແລະ ປະຊາຊົນຜູ້ທີ່ມາເບິ່ງເຫດການ ເຊິ່ງໄດ້ເຮັດໃຫ້ອາສາໝ່ວຍກູ້ໄພໄດ້ຮັບບາດເຈັບຈຳນວນ 8 ຄົນ ແລະ ມີຄົນເຈັບອາການສາຫັດພໍສົມຄວນ 4 ຄົນ ສ່ວນປະຊາຊົນ ເສຍຊີວິດ 1 ຄົນ ຈາກໃນເຫດການຄັ້ງນີ້
ສ່ວນຜູ້ບາດເຈັບທີ່ຕິດພາຍໃນລົດ 2 ຄົນແມ່ນທີມງານໜ່ວຍກູ້ໄພນະຄອນຫຼວງວຽງຈັນ ແລະ ໜ່ວຍກູ້ໄພມູນນິທິ ໄດ້ໃຊ້ເຄື່ອງ ອຸປະກອນຕັດ-ຖ່າງ ເຊິ່ງໃຊ້ເວລາດົນພໍສົມຄວນຈຶ່ງສາມາດນຳເອົາຜູ້ບາດເຈັບອອກມາໄດ້ ເຊິ່ງມີອາການສາຫັດທັງ 2 ແລະ ທີມກູ້ໄພ ໄດ້ປະຖົມພະຍາບານເບື້ອງຕົ້ນແລ້ວນຳສົ່ງໂຮງໝໍ 105 ຕຽງດ່ວນ
ທາງທີມງານລາວໂພສຕ໌ ຂໍສະແດງຄວາມເສຍໃຈມາຍັງຄອບຄົວຜູ້ເສຍຊີວິດ ແລະ ຂໍສະແດງຄວາມຫ່ວງໃຍມາຍັງຜູ້ທີ່ໄດ້ຮັບບາດເຈັບ ຂໍໃຫ້ທຸກຄົນຜ່ານຊ່ວງເວລາທີ່ຮ້າຍໆນີ້ໄປໄດ້ດ້ວຍຫົວໃຈທີ່ເຂັມແຂງ.
ແລະ ນີ້ກໍ່ເປັນອີກໜຶ່ງອຸທາຫອນສອນໃຈການຂັບຂີ່ລົດຕາມທ້ອງຖະໜົນທຸກຄົນຕ້ອງມີສະຕິ ແລະ ເຄົາລົບກົດຈະລາຈອນຢ່າງເຄັ່ງຂັດ ເພື່ອຫຼີກລ່ຽງທຸກການສູນເສຍທີ່ອາດຈະເກີດຂຶ້ນໄດ້ທຸກເວລາ ແລະ ກັບທຸກຄົນຢ່າງບໍ່ຄາດຄິດ.
ຕິດຕາມຂ່າວເສດຖະກິດລາວ ກົດໄລຄ໌ເລີຍ!