ສຳນັກຂ່າວປະເທດຍີ່ປຸ່ນລາຍງານ ວັນທີ 28 ກໍລະກົດນີ້ວ່າ ທີ່ນະຄອນຫຼວງໂຕກຽວ ປະເທດຍີ່ປຸ່ນ
ຕຳຫຼວດໄດ້ຈັບກຸມເດັກນັກຮຽນຍິງ ອາຍຸ 15 ປີ ເຊິ່ງເປັນຜູ້ຕ້ອງສົງໄສຂ້າຫັ່ນສົບໝູ່ນັກຮຽນຍິງ
ທີ່ຮຽນຫ້ອງດຽວກັນ ໂດຍນັກຮຽນຍິງລາຍນີ້ ໄດ້ໃຫ້ການສາລະພາບຕໍ່ເຈົ້າໜ້າທີ່ຕຳຫຼວດໃນເວລາ
ຕໍ່ມາວ່າ ໄດ້ລົງມືຂ້າໝູ່ຂອງຕົນຊື່ ນາງ ມັດຊຸໂອະ ອາຍຸ 15 ປີ ແທ້ຈິງ ໂດຍໃຊ້ທ່ອນໂລຫະຟາດໃສ່
ຫົວ ແລ້ວໃຊ້ເຊືອກຮັດຄໍຈົນເສຍຊີວິດ ກ່ອນທີ່ຈະໃຊ້ມີດຕັດເອົາຫົວ ແລະ ແຂນເບື້ອງຊ້າຍຈົນ
ຂາດ ພາຍໃນຫ້ອງພັກອາພາດເມັ້ນຂອງຕົນເອງ ໃນເມືອງຊາເຊໂບະ ແຂວງນາງາຊາກິ ໂດຍກ່າວ
ວ່າຕົນເອງລົງມືຂ້າພຽງຄົນດຽວ.
ເນື່ອງຈາກຕຳຫຼວດໄດ້ພົບສົບຂອງຜູ້ເຄາະຮ້າຍ ໃນຫ້ອງພັກຂອງຜູ້ຕ້ງສົງໄສໃນຕອນເຊົ້າຂອງວັນ
ອາທິດ (27 ກໍລະກົດ) ພ້ອມກັບເຄື່ອງມືທີ່ໃຊ້ໃນການສັງຫານ ເຊິ່ງຜູ້ກໍ່ເຫດພັກຢູ່ໃນອາພາດເມັ້ນ
ພຽງລຳພັງ ໂດຍພໍ່ ແລະ ແມ່ຂອງນາງພັກຢູ່ຄົນລະແຫ່ງ ແຕ່ຢູ່ໃນເມືອງດຽວກັນ.
ຈາກການສອບສວນເບື້ອງຕົ້ນຕຳຫຼວດໃຫ້ຮູ້ວ່າ ຜູ້ຕ້ອງຫາ ແລະ ຜູ້ເຄາະຮ້າຍເປັນໝູ່ທີ່ຮຽນຈົບ
ມາຈາກໂຮງຮຽນມັດທະຍົມຕົ້ນແຫ່ງດຽວກັນ ເຊິ່ງນາງມັດຊູໂອະ ໄດ້ອອກຈາກບ້ານເມື່ອຕອນບ່າຍ
ຂອງມື້ວັນເສົາ ໂດຍໄດ້ບອກກັບພໍ່ແມ່ຂອງນາງວ່າຈະໄປຫາໝູ່ ແລະ ພໍ່ແມ່ຂອງນາງຈິ່ງໄດ້ແຈ້ງຕຳ
ຫຼວດ ຫຼັງເວລາລ່ວງເລີຍຈົນເຖິງກາງເດິກ ແຕ່ບໍ່ເຫັນລູກສາວກັບຄືນເຮືອນ.
ຕາມການສອບສວນໝູ່ ແລະ ຄົນຮູ້ຈັກກັບຜູ້ຕ້ອງຫາລາຍນີ້ ກ່າວວ່າ ນາງເປັນຄົນທີ່ອາລົມບໍ່ປົກ
ກະຕິ ຂຶ້ນໆລົງໆ ໂດຍທຸກຄັ້ງທີ່ມີປັນຫາກັບໃຜ ນາງກໍຈະເປັນຝ່າຍເລີ່ມຮ້ອງໄຫ້ກ່ອນສະເໝີ, ເຖິງ
ຢ່າງໃດກໍຕາມ ຜູ້ຕ້ອງຫາລາຍນີ້ຍັງບໍ່ທັນເປີດເຜີຍເຖິງມູນເຫດຈູງໃຈ ໃນການກໍ່ເຫດສະເທືອນ
ຂວັນຊາວຍີ່ປຸ່ນຄັ້ງນີ້ເທື່ອ.