ວັນທີ 23 ພະຈິກຜ່ານມານີ້, ກະຊວງສາທາລະນະສຸກ ໄດ້ຈັດພິທີສະເຫລີມສະຫລອງ ວັນຄົບຮອບ 20 ປີ ແຫ່ງການພົວພັນຮ່ວມມືຊ່ວຍເຫລືອຂອງສະພາກາແດງຍີ່ປຸ່ນ, ໂດຍການເຂົ້າຮ່ວມຂອງ ທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ແລະ ທ່ານຮອງປະທານອົງການກາແດງລາວ, ພ້ອມດ້ວຍພາກສ່ວນກ່ຽວຂ້ອງຕ່າງໆ ເຂົ້າຮ່ວມຢ່າງຫລວງຫລາຍ.
ເພື່ອສືບຕໍ່ຮັດແໜ້ນຄວາມສາມັກຄີ ແລະ ການພົວພັນຮ່ວມມືທີ່ດີ, ລະຫວ່າງ ອົງການກາແດງລາວ ແລະ ສະພາກາແດງປະເທດຍີ່ປຸ່ນໃນໄລຍະ 20 ປີຜ່ານມາ (1995-2015), ໂດຍສະເພາະ ກໍແມ່ນໂຄງການຮ່ວມມື ແລະ ຊ່ວຍເຫລືອວຽກງານການບໍລິການເລືອດຢູ່ ສປປ ລາວ, ແນໃສ່ເພື່ອຍາດແຍ່ງເອົາການຊ່ວຍເຫລືອທາງດ້ານເຕັກນິກ-ວິຊາການຂອງວຽກງານເລືອດ ມາພັດທະນາຢູ່ປະເທດເຮົາໃຫ້ນັບມື້ດີຂຶ້ນ.
ທ່ານ ຈັນທະລາ ສຸກສາຄອນ ຫົວໜ້າສູນເລືອດແຫ່ງຊາດ ກ່າວວ່າ: ນັບແຕ່ປີ 1995-2003, ສະພາກາແດງປະເທດຍີ່ປຸ່ນ ໄດ້ສົ່ງຜູ້ຊ່ຽວຊານມາປະຈຳຢູ່ ສປປ ລາວ, ເພື່ອໃຫ້ການຊ່ວຍເຫລືອດ້ານຕ່າງໆເຊັ່ນ: ການກໍ່ສ້າງພື້ນຖານໂຄງລ່າງ, ນິຕິກຳ, ລະບົບການເຄື່ອນໄຫວ, ວິທີຈັດຕັ້ງປະຕິບັດ, ຈັດຫາອຸປະກອນການແພດໃຊ້ຍາວນານ ແລະ ນ້ຳຢາກວດພະຍາດຕິດແປດທາງເລືອດ, ນ້ຳຢາກວດໝວດເລືອດ ແລະ ອື່ນໆ ເພື່ອເຮັດໃຫ້ໂຄງການເລືອດແຫ່ງຊາດ ຖືກດຳເນີນໄປຕາມແຜນການທີ່ວາງໄວ້ ແລະ ການເຄື່ອນໄຫວກິດຈະກຳຕ່າງໆ, ເພື່ອສ້າງຄວາມເຂັ້ມແຂງທີ່ເປັນລະບົບມາດຕະຖານສາກົນ ແລະ ມາຮອດປີ 2004-2015, ສະພາກາແດງປະເທດຍີ່ປຸ່ນ ໄດ້ຢຸດເຊົາໃຫ້ການຊ່ວຍເຫລືອທາງດ້ານທຶນຮອນ ທີ່ເປັນພື້ນຖານທັງໝົດ, ແຕ່ຍັງຄົງຮັກສາໄວ້ສະເພາະ ການກໍ່ສ້າງພະນັກງານ, ການຮ່ວມມືຄົ້ນຄວ້າວິທະຍາສາດ, ການກວດສອບຄຸນນະພາບທາງດ້ານເຕັກນິກ-ວິຊາການ. ໃນໄລຍະ 20 ປີຜ່ານມາ ເຫັນວ່າວຽກງານເລືອດຢູ່ຂອບເຂດທົ່ວປະເທດ ມີລັກສະນະພົ້ນເດັ່ນຢ່າງເຫັນໄດ້ຊັດ, ເຂົ້າໃນການພັດທະນາຂອງຊາດ, ຊຶ່ງຕິດພັນກັບຜົນປະໂຫຍດລວມຂອງປະຊາຊົນບັນດາເຜົ່າ ຢູ່ໃນຂອບເຂດທົ່ວປະເທດ ແລະ ການຈັດຕັ້ງຂອງສູນເລືອດແຫ່ງຊາດ, ເຊື່ອວ່າໝາກຜົນທີ່ໄດ້ມານັ້ນ ຈະເປັນບ່ອນອີງໃຫ້ແກ່ການພັດທະນາວຽກງານເລືອດຢູ່ລາວ ດຳເນີນໄປຢ່າງບໍ່ຢຸດຢັ້ງດ້ວຍຄຸນນະພາບສູງ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!