ອີງຕາມການລາຍງານຂອງ ປກສ ເມືອງໄຊເຊດຖາ ໃຫ້ຮູ້ວ່າ: ຜູ້ກ່ຽວຊື່ທ້າວ ດຳລົງ ອາຍຸ 30 ປີ ຢູ່ບ້ານໂນນສະຫວ່າງ ເມືອງໄຊເຊດຖາ ນະຄອນຫຼວງວຽງຈັນ, ຜູ້ກ່ຽວເປັນຄົນມີວຽກເຮັດງານທຳທົ່ວໄປ ແຕ່ເສບຢາບ້າທຸກມື້ມາຕັ້ງແຕ່ປີ 2001, ເສບມື້ລະ 2-3 ເມັດ; ຕໍ່ມາໄດ້ສ້າງຄອບຄົວມີລູກ, ຈົນມາຮອດວັນທີ 11 ຕຸລາ 2016 ເມຍຂອງຜູ້ກ່ຽວໄດ້ໂທຫາ ບອກໃຫ້ຊື້ນົມໄປໃຫ້ລູກ, ຜູ້ກ່ຽວຈຶ່ງໄປຂໍເບີກເງິນນຳຫົວໜ້າແຕ່ບໍ່ໄດ້, ເລີຍມີແນວຄິດຊອກດຶງກະເປົາ ແລະ ໄດ້ຢືມລົດນຳຄົນຢູ່ບ້ານດຽວກັນເພື່ອໄປເລາະຊອກດຶງກະເປົາ.
ພໍຂັບຂີ່ລົດໄປຮອດເຂດບ້ານໂຊກຄຳ ເມືອງໄຊເຊດຖາ ເວລາປະມານ 14:00 ໂມງ ພົບເຫັນຜູ້ຍິງຄົນໜຶ່ງຂັບລົດຈັກເວບ 100 ມາຄົນດຽວ ໂດຍມີກະເປົາເງິນວາງຢູ່ກະຕ່າລົດ ຈຶ່ງເປັນໂອກາດໃຫ້ຜູ້ກ່ຽວ ( ທ້າວ ດຳລົງ ) ລົງມືຊີງກະເປົາໜ່ວຍນັ້ນແລ້ວມຸ່ງໜ້າໄປທາງບ້ານຄຳສະຫວາດ, ແຕ່ຜູ້ຍິງຄົນດັ່ງກ່າວບໍ່ຍອມງ່າຍໆ, ຂັບລົດຈັກນຳໄປຕຳທ້າຍລົດຈັກຂອງທ້າວ ດຳລົງ ຈົນລົ້ມທັງສອງຄັນ ແລ້ວຄວ້າເອົາກະເປົາຂອງຕົນເອງແລ້ວແລ່ນໜີ, ທ້າວ ດຳລົງ ລຸກຂຶ້ນມາເອົາລົດຂອງຕົນເອງໄປເຊື່ອງໄວ້ແຄມທາງແລ້ວຍ່າງໄປເອົາລົດຂອງຜູ້ເສຍຫາຍ ແຕ່ໂຊກຮ້າຍລົດຄັນນັ້ນພັດເພ ຈຶ່ງຂັບໄປໃສບໍ່ໄດ້ຈຶ່ງໄດ້ເອົາໄປເຊື່ອງໄວ້ກັບລົດຂອງຕົນເອງຢູ່ແຄມທາງ ແລ້ວຍ່າງກັບເມືອເຮືອນ. ແຕ່ພໍກັບຮອດເຮືອນກໍມີເຈົ້າໜ້າທີ່ເຂົ້າຈັບກຸມຄາເຮືອນເລີຍ.
ຈາກຄະດີດັ່ງກ່າວນີ້ເປັນອຸດທາຫອນສອນວ່າ: ຖ້າຕັ້ງໃຈເຮັດວຽກຫາເງິນ, ປະຢັດມັດທະຍັດ ກໍຈະມີເງິນເກັບເງິນທ້ອນໄວ້ໃຊ້ໃນຍາມຈຳເປັນ, ບໍ່ແມ່ນຊິເອົາເງິນທີ່ຫາມາໄດ້ໄປໃຊ້ຈ່າຍກັບແນວບໍ່ເປັນຕາກິນ, ໂດຍສະເພາະກັບສິ່ງຜິດກົດໝາຍ, ເມື່ອເງິນໝົດແລ້ວໄປຊອກລັກເອົາຂອງຄົນອື່ນ, ແບບນີ້ກໍສົມຄວນຖືກລົງໂທດຕາມກົດໝາຍ.
ຂ່າວ: ໜັງສືພິມຄວາມສະຫງົບ