ໃນຄໍລຳ ຊີວິດ ກັບຄວາມຮັກ ວັນນີ້ ແອັດມິນຈະມານຳສະເໜີຂັ້ນຕອນກະກຽມແຜນຈັດງານດອງແບບຮີບດ່ວນໃນເວລາສັ້ນໆ ສຳລັບຄູ່ທີ່ມີເວລາສັ້ນໃນການກະກຽມງານ
ຄົນທີ່ແຕ່ງງານແລ້ວຈະຮູ້ດີວ່າການຈັດງານດອງນັ້ນມັນມີລາຍລະອຽດຫຼາຍຂັ້ນຕອນທີ່ຈະຕ້ອງກະກຽມ ເຊິ່ງຄູ່ບ່າວ-ສາວໃໝ່ທີ່ບໍ່ເຄີຍຜ່ານການແຕ່ງງານມາຈັກເທື່ອອາດເກີດຄວາມກັງວົນໃຈໄດ້ ຍິ່ງງານດອງມີເວລາສັ້ນໃນການກະກຽມງານ ຍິ່ງເຮັດໃຫ້ກຸ້ມໃຈເພາະບາງຄົນກໍ່ບໍ່ຮູ້ວ່າຈະເລີ່ມຈາກຈຸດໃດດີ ສະນັ້ນມື້ນີ້ແອັດມິນເລີຍມີຄຳແນະນຳກ່ຽວກັບເລື່ອງນີ້ມາຝາກກັນ
- ກຳນົດງົບປະມານກ່ອນວ່າງົບທີ່ຈະໃຊ້ຈັດງານແຕ່ງມີເທົ່າໃດ
- ຂໍຄຳປຶກສາກັບຜູ້ທີ່ມີປະສົບການເຊັ່ນ: ຜູ້ທີ່ເຄີຍຜ່ານການແຕ່ງງານ, ຜູ້ເຖົ້າຜູ້ແກ່
- ເຮັດແຜນລາຍລະອຽດໃນງານດອງວ່າມັນມີວຽກໃດແນ່ທີ່ຈະຕ້ອງເຮັດ ວຽກໃດທີ່ຈະຂໍໃຫ້ຄົນອື່ນມາຊ່ວຍເຮັດ, ແລະ ວຽກໃດທີ່ຕົນເອງສາມາດເຮັດໄດ້ ແລ້ວປະຕິບັດໄປຕາມແຜນ ເພື່ອໃຫ້ມັນໄວຂຶ້ນ ແລະ ບໍ່ສັບສົນອີກ
- ຕັດສິນໃຈເລື່ອງສະຖານທີ່ຈັດງານ, ອາຫານ, ເຄື່ອງດື່ມໃນມື້ອຸ່ນດອງ ແລະ ມື້ຈັດງານຢ່າງຮີບດ່ວນ ອາຫານຈະຊື້ຂອງສົດມາແຕ່ງເອງ ຫຼື ສັ່ງມາແຕ່ຮ້ານອາຫານເລີຍ ຫຼື ສິເຮັດຈັ່ງໃດ ຢ່າລັງເລໃຈຫຼາຍເພາະຕ້ອງອີງໃສ່ເວລາ ແລະ ງົບປະມານເປັນຫຼັກ
- ລາຍຊື່ແຂກສິເຊີນໃຜ, ຈະເຊີນຈັກຄົນ, ເລືອກແບບບັດເຊີນ ແລະ ເລືອກຮ້ານພິມບັດເຊີນ ພ້ອມກຳນົດວັນເອົາບັດເຊີນໃຫ້ຊັດເຈນກັບທາງຮ້ານ
- ຕັດສິນໃຈເລື່ອງຊຸດເຈົ້າບ່າວ-ເຈົ້າສາວ ຈະເອົາສີຫຍັງ, ຈະຊື້ແພມາຕັດເອງ ຫຼື ຈະເຊົ່າເອົາຕ້ອງເບິ່ງເວລາເປັນຫຼັກຖ້າຕັດເອົາສິທັນກຳນົດ ຫຼື ບໍ່?
- ຕັດສິນໃຈເລືອພຣີເວດດິ້ງງານດອງ, ເລື່ອງຊ່າງຖ່າຍຮູບໃນງານຈະເອົາໃຜ ແລະ ເອົາຢູ່ໃສ
- ຕັດສິນໃຈເລື່ອງສາກຖ່າຍຮູບໜ້າງານ, ແຕ່ງລົດເຈົ້າບ່າວ-ເຈົ້າສາວ, ຊໍ່ດອກໄມ້…
- ຈອງຊ່າງແຕ່ງໜ້າເຈົ້າສາວ ສິເອົາໃຜດີ? ຖ້າຫາກເຊົ່າຊຸດແຕ່ງງານກໍ່ຄວນຈອງຊ່າງແຕ່ງໜ້າໄວ້ເລີຍກໍ່ດີ
- ເລື່ອງເຄື່ອງສົມມາເຖົ້າແກ່ລຸງຕາສອງກ້ຳສອງຝ່າຍສິເອົາຫຍັງດີ? ງົບມີເທົ່າໃດ? ສິເອົາຈັກຊຸດ? ໄປຊື້ມື້ໃດ
- ກຳນົດວັນເວລາຢາຍຊອງບັດເຊີນແຂກ ແລະ ແຂກກຸ່ມໃດທີ່ຈະໄປຢາຍເອງ ແຂກກຸ່ມໃດທີ່ຈະໃຫ້ຄົນອື່ນຢາຍຊ່ວຍ
- ຈອງຄິວໝໍພອນໄວ້ກ່ອນຮອດມື້ງານແທ້ ເພາະຊ່ວງນີ້ງານດອງຫຼາຍຈັກໜ່ອຍຮອດມື້ງານໝໍພອນສິບໍ່ວ່າງໃຫ້
- ຕິດຕໍ່ຄົນເຮັດຊຸດພາຂັວນໄວ້
- ຕິດຕໍ່ວົງດົນຕີໄວ້ຈອງຄິວໄວ້ລ່ວງໜ້າກ່ອນວັນງານ
- ຕິດຕໍ່ເລື່ອງໂຕະ, ເຕັ້ນ, ຕັ່ງ ແລະ ເຊົ່າເຄື່ອງທີ່ຈຳເປັນຕ້ອງໃຊ້ໃນງານ ເຮັດລາຍລະອຽດໃຫ້ຊັດເຈນວ່າຈະເອົາຫຍັງ? ຈະເອົາໃນຈຳນວນເທົ່າໃດ?
ສິ່ງທີ່ແນະນຳໄປຂ້າງເທິງນີ້ກໍ່ເປັນພຽງລາຍລະອຽດບາງສ່ວນໃນແຜນການຈັດງານດອງ ແຕ່ໃນຄວາມຈິງແລ້ວມັນຍັງມີລາຍລະອຽດຈຸກຈິກກວ່ານີ້ ແລະ ສຳລັບບາງວຽກກໍ່ຄວນຂໍຄຶກປຶກສາຈາກຜູ້ໃຫຍ່, ຍາດພີ່ນ້ອງ, ເພື່ອນສະໜິດ ມາຊ່ວຍເຮັດນຳ ເພື່ອຈະເຮັດໃຫ້ງານດອງຈັດໄດ້ທັນຕາມກຳນົດທີ່ວາງໄວ້
ຕິດຕາມເລື່ອງດີດີເພຈຊີວິດແລະຄວາມຮັກ ກົດໄລຄ໌ເລີຍ!