ສຳນັກຂ່າວຕ່າງປະເທດ ລາຍງານໃນວັນທີ 21 ພະຈິກຜ່ານມານີ້ວ່າ ເຮືອບິນຂອງສາຍການບິນ ປາກີສະຖານ ແອຣ໌ລາຍ ຖ້ຽວບິນ PK-798 ຊຶ່ງເດີນທາງອອກຈາກ ນະຄອນໂຕໂຣນໂຕ ປະເທດການາດາ ໂດຍມີຈຸດໝາຍປາຍທາງທີ່ເມືອງລາຮໍ ປະເທດປາກີສະຖານ ໄດ້ປ່ຽນເສັ້ນທາງບິນ ແລະ ລົງຈອດສຸກເສີນ ທີ່ເມືອງແມນເຊສເຕີ້ ປະເທດອັງກິດ ເນື່ອງຈາກເກີດບັນຫາສ້ວມຕັນເທິງເຮືອບິນ.
ການຊີ້ແຈງຢ່າງເປັນທາງການຂອງ ສາຍການບິນ ປາກີສະຖານ ແອຣ໌ລາຍ ຜ່ານທາງທະວິດເຕີ້ ໄດ້ລະບຸວ່າ ເຫດຜົນທີ່ນັກບິນຕັດສິນໃຈ ນຳເຮືອບິນລົງຈອດສຸກເສີນ ທີ່ເມືອງແມນເຊສເຕີ້ ຊຶ່ງສົ່ງຜົນເຮັດໃຫ້ເວລາໝາຍຊ້າກວ່າກຳນົດ 5 ຊົ່ວໂມງ ແມ່ນເພື່ອຄຳນຶງເຖິງຄວາມສະດວກຂອງຜູ້ໂດຍສານເປັນສຳຄັນ ເພາະເກີດບັນຫາສ້ວມຕັນເທິງເຮືອບິນ ເນື່ອງຈາກມີຜູ້ໂດຍສານຖິ້ມວັດສະດຸບາງຢ່າງລົງໄປໃນຊັກໂຄກ ຈົນເຮັດໃຫ້ເກີດການອຸດຕັນ. ທັງນີ້ ພາຍຫລັງການລົງຈອດສຸກເສີນດັ່ງກ່າວ ເຈົ້າໜ້າທີ່ສະໜາມບິນ ໄດ້ເລັ່ງເຂົ້າມາແກ້ໄຂບັນຫາ ຈົນຊັກໂຄກສາມາດນຳໃຊ້ໄດ້ປົກກະຕິ ແລະ ເຮືອບິນຈຶ່ງສາມາດຂຶ້ນບິນຕໍ່ ໄປຍັງປາຍທາງເມືອງລາຮໍ.
ຕິດຕາມເຮົາທາງFacebook ກົດຖືກໃຈເລີຍ!