ອີງຕາມການລາຍງານຂ່າວຂອງສໍານັກຂ່າວຕ່າງປະເທດ ວັນທີ 22 ພະຈິກວ່າ: ເມື່ອເວລາ 03: 59 ນາທີ ເກີດແຜ່ນດິນໄຫວ ບໍລິເວນໃກ້ແຄມຝັ່ງທາງດ້ານຕາເວັນອອກຂອງເກາະຮອນຊູ ປະເທດຍີ່ປຸ່ນ ທີ່ເສັ້ນຂະໜານ 37.38 ອົງສາເໜືອ, ເສັ້ນແວງທີ່ 141.36 ອົງສາຕະເວັນອອກ ຂະນາດ 3.7 ຄວາມເລິກປະມານ 10 ກິໂລແມັດ.

ມີລາຍງານວ່າ: ມີການປະກາດເຕືອນໄພສຶນາມິ ໃຫ້ຄົນທີ່ຢູ່ໃກ້ແຄມຝັ່ງຍ້າຍຂຶ້ນທີ່ສູງ ໂດຍ ຈ. ຟຸຄຸຊິມ່າ ໃຫ້ອົບພະຍົບທັນທີ ແລະມີປະກາດເຕືອນສຶນາມິເພີ່ມຂຶ້ນທີ່ໝູ່ເກາະໂອຊິມ່າ ກຸງໂຕກຽວ ບໍລິເວນແຄມຝັ່ງທະເລມະຫາສະໝຸດປາຊິຟິກທັ້ງໝົດ ຕັ້ງແຕອາໂອໂມຣິເຖິງຊິບະ.

ຂະນະທີ່ສໍານັກຂ່າວຊີເອັນເອັນ ລາຍງານເພີ່ມເຕີມອີກວ່າ: ຈຸດສູນກາງແຜ່ນດິນໄຫວຄັ້ງນີ້ຢູ່ໃກ້ຄຽງ ເຫດການແຜ່ນດິນໄຫວຄັ້ງຮຸນແຮງທີ່ສຸດຂອງປະເທດຍີ່ປຸ່ນ ເມື່ອວັນທີ 11 ມີນາ 2011.