ສຳນັກຂ່າວຕ່າງປະເທດ ລາຍງານໃນວັນທີ 22 ພະຈິກນີ້ວ່າ ເມື່ອເວລາ 05:59 ໂມງ ຕາມເວລາໃນທ້ອງຖິ່ນຂອງມື້ນີ້ ໄດ້ເກີດເຫດແຜ່ນດິນໄຫວ ຂະໜາດ 6.9 ແມັກນິຈູດ ນອກຊາຍຝັ່ງປະເທດຍີ່ປຸ່ນ ຫ່າງຈາກເມືອງອິວາກິ ທາງພາກຕາເວັນອອກສຽງເໜືອຂອງປະເທດ ປະມານ 67 ກິໂລແມັດ ສົ່ງຜົນເຮັດໃຫ້ເກີດຄື້ນສຶນາມິຊັດເຂົ້າຊາຍຝັ່ງ ຄວາມສູງປະມານ 60-90 ຊັງຕີແມັດ ໃນອີກບໍ່ພໍເທົ່າໃດຊົ່ວໂມງຕໍ່ມາ, ດ້ານສຳນັກງານອຸຕຸນິຍົມວິທະຍາຍີ່ປຸ່ນ ກໍໄດ້ອອກປະກາດເຕືອນໄພສຶນາມິ ໃນພື້ນທີ່ສ່ວນໃຫຍ່ຕາມແນວຊາຍຝັ່ງ ເບື້ອງມະຫາສະໝຸດປາຊີຟິກຕອນເໜືອຂອງປະເທດທັງໝົດ ຊຶ່ງຄາດວ່າອາດຕ້ອງປະເຊີນກັບ ຄື້ນຍັກສຶນາມິສູງເຖິງ 3 ແມັດ.
ແຮງສັ່ນສະເທືອນຂອງແຜ່ນດິນໄຫວຄັ້ງດັ່ງກ່າວນີ້ ສາມາດຮັບຮູ້ໄດ້ໄກເຖິງ ນະຄອນຫລວງໂຕກຽວ, ແນວໃດກໍຕາມ ເບື້ອງຕົ້ນຍັງບໍ່ທັນມີລາຍງານຄວາມເສຍຫາຍໃດໆເທື່ອ. ທັງນີ້, ຍີ່ປຸ່ນເປັນປະເທດທີ່ເກີດແຜ່ນດິນໄຫວຢ່າງເປັນປະຈຳ ກວມເອົາ 20% ຂອງເຫດແຜ່ນດິນໄຫວ ຂະໜາດຮຸນແຮງລະດັບ 6 ແມັກນິຈູດ ຫລື ຫລາຍກວ່າ ທີ່ເກີດຂຶ້ນທັງໝົດຢູ່ໃນໂລກ.
ຕິດຕາມເຮົາທາງFacebook ກົດຖືກໃຈເລີຍ!