ທ່ານນາຍົກສັ່ງດ່ວນໃຫ້ກວດກາບັນດາກຸ່ມຄົນເລາະເກັບເງິນຄ່າຝາກຕາມແຄມທາງ ຖ້າຕົກໃນກໍລະນີຈັບເສືອມືເປົ່າໃຫ້ສັ່ງຢຸດຕິທັນທີໂດຍບໍ່ມີຂໍ້ຍົກເວັ້ນເພາະສ້າງຄວາມເດືອດຮ້ອນໃຫ້ປະຊາຊົນ
ພາຍຫລັງເກີດມີຫາງສຽງຈົ່ມວ່າກ່ຽວກັບມີບາງກຸ່ມຄົນຈໍານວນໜຶ່ງຊອກເລາະເກັບເງິນຄ່າຝາກລົດຢູ່ຈຸດຕ່າງໆຕາມເສັ້ນທາງໃນຂອບເຂດນະຄອນຫລວງວຽງຈັນໂດຍມີການອ້າງໂຕວ່າແມ່ນເຈົ້າໜ້າທີ່ອົງການພັດທະນາເທສະບານ ເຊິ່ງສ້າງຄວາມເດືອດຮ້ອນໃຫ້ປະຊາຊົນບໍ່ໜ້ອຍ ແລະ ຍັງມີການຄາດຄະເນວ່າແມ່ນກຸ່ມຄົນຈໍານວນໜຶ່ງໃຊ້ວິທີຈັບເສືອມືເປົ່າໝາຍວ່າບໍ່ໄດ້ລົງທຶນຫຍັງເລີຍເຫັນບ່ອນໃດດີກໍໄປໝາຍເອົາເປັນບ່ອນຈອດລົດເກັບເງິນ ເຊິ່ງເປັນການສ້າງຮັ່ງຄູນມີໃຫ້ສ່ວນບຸກຄົນ ແລະ ເງິນດັ່ງກ່າວກໍບໍ່ໄດ້ເຂົ້າລັດ.
ຫລ້າສຸດມີຂ່າວຈາກກອງປະຊຸມລັດຖະບານສະໄໝສາມັນປະຈໍາເດືອນ ພະຈິກ 2016 ທີ່ໄດ້ໄຂຂຶ້ນໃນວັນທີ 21 ພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ເຊິ່ງ ທ່ານນາຍົກລັດຖະມົນຕີ ເນັ້ນຢໍ້າວ່າ: ໃນເດືອນທັນວານີ້ ຕ້ອງເອົາໃຈໃສ່ ກວດກາຄືນ ສະພາບການເກັບເງິນຄ່າຝາກລົດຢູ່ຕາມຈຸດຕ່າງໆ ທີ່ມີຫາງສຽງຈົ່ມວ່າ ກ່ຽວກັບຄວາມໂປ່ງໃສ ໃນນະຄອນຫລວງວຽງຈັນ, ຄົ້ນຄວ້າທິດທາງສະເພາະໜ້າ ແລະ ຍາວນານ ໃນການແກ້ໄຂບັນຫາການສັນຈອນແອອັດ ທີ່ນັບມື້ນັບເພີ່ມຂຶ້ນໃນປະຈຸບັນ ແລະ ບັນນຫາອື່ນໆ.
ຂ່າວໂດຍ: ນໍ້າອອ້ຍຂົມ
ທີ່ມາຈາກ: ສຳນັກຂ່າວສານປະເທດລາວ