ປະມານທ້າຍເດຶອນມັງກອນ 2017 ຜູ້ຊົມໃຊ້ໂທລະສັບມືຖືຈະສາມາດເຂົ້າເຖິງຂໍ້ມູນ Online ໄດ້ບໍ່ຈໍາເປັນຕ້ອງເຊື່ອມຕໍ່ອິນເຕີເນັດ
ການສຳມະນາແນະນໍາໂຄງການຂອງບໍລິສັດ Be-Bound ໃນຫົວຂໍ້ “ການເຂົ້າເຖິງຂໍ້ມູນອອນໄລ໌ໂດຍບໍ່ຈຳເປັນຕ້ອງໃຊ້ການເຊື່ອມຕໍ່ອິນເຕີເນັດ ແລະ ການນຳໃຊ້ເຕັກໂນໂລຊີແບບໃໝ່ເຂົ້າໃນການດຳເນີນທຸລະກິດ, ການສຶກສາ, ສາທາລະນະສຸກ, ກະສິກຳ, ການບໍລິການ ແລະ ການພັດທະນາເສດຖະກິດໃນຂົງເຂດຕ່າງ” ໄດ້ຈັດຂຶ້ນໃນວັນທີ 17 ພະຈິກ 2016 ທີ່ໂຮງແຮມ ຣັດສະຫມີ ພລາຊາ, ນະຄອນຫລວງວຽງຈັນ. ໂດຍການປະທານຂອງທ່ານ ນາງ ດວງມາລາ ພົມມະວົງ ອຳນວຍການບໍລິສັດທ່ອງທ່ຽວ EXO ຮ່ວມກັບບໍລິສັດ Be-Bound, ໃຫ້ກຽດເຂົ້າຮ່ວມງານໂດຍທ່ານ ອຸຕາແກ້ວ ແກ້ວດວງສິນ ຮອງຫົວໜ້າກົມສົ່ງເສີມການລົງທຶນ ກະຊວງແຜນການ ແລະ ການລົງທຶນ, ມີບັນດາແຂກທີ່ຖືກເຊີນທັງພາກລັດ-ເອກະຊົນ ແລະ ສື່ມວນຊົນເຂົ້າຮ່ວມ.
ທ່ານ Michel KTITAREFF ຫົວໜ້າຝ່າຍທຸລະກິດບໍລິສັດ Be-Bound ກ່າວວ່າ: Be-Bound ຄືຜູ້ໃຫ້ບໍລິການອິນເຕີເນັດໃນທົ່ວທຸກບ່ອນທີ່ມີສັນຍານໂທລະສັບ (Internet Offline) ມີສຳນັກງານໃຫຍ່ຕັ້ງຢູ່ນະຄອນຫຼວງປາຣີ ປະເທດຝຣັ່ງ ເຊິ່ງມີການຂະຫຍາຍທຸລະກິດ ແລະ ການບໍລິການໄປໃນປະເທດທີ່ກຳລັງພັດທະນາ ແລະ ມີເຄືອຄ່າຍຜູ້ໃຊ້ 4 ຕື້ຄົນ.
ຈຸດປະສົງໃນການສໍາມະນາຄັ້ງນີ້ ເພື່ອແນ່ໃສ່ການຮ່ວມມືກັນລະຫວ່າງທາງພາກລັດ, ເອກະຊົນ ແລະ ນັກລົງທຶນທີ່ສົນໃຈ ໃນການພັດທະນາລະບົບສື່ສານທາງໄກ ແລະ ເປັນການສ້າງໂອກາດໃຫ້ແກ່ບັນດານັກສຶກສາ, ນັກພັດທະນາດ້ານຂໍ້ມູນຂ່າວສານ (IT), Programmers ໃຫ້ສາມາດສ້າງນະວັດຕະກຳໃໝ່ໆທີ່ເປັນປະໂຫຍດຕໍ່ເສດຖະກິດ ແລະ ສັງຄົມ, ເພື່ອເປັນການຊຸກຍູ້ຫົວໜ່ວຍທຸລະກິດຂອງປະເທດລາວໃຫ້ທຸກຄົນສາມາດເຂົ້າເຖິງແຫຼງຂໍ້ມູນທີ່ເປັນປະໂຫຍດ ໂດຍສະເພາະແມ່ນບັນດາປະຊາກອນທີ່ຢູ່ຫ່າງໄກຊອກຫຼີກທີ່ຍັງເຂົ້າເຖິງຂໍ້ມູນຂ່າວສານທີ່ເປັນປະໂຫຍດຈາກອອນໄລ໌ຍັງບໍ່ທັນໄດ້.
ທ່ານນາງ ດວງມາລາ ພົມມະວົງ ໄດ້ໃຫ້ສຳພາດວ່າ: Be-Bound ເປັນ”ຊ໋ອບແວ”ທີ່ຈະຊ່ວຍສ້າງ ແລະ ພັດທະນາ”ແອັບພິເຄຊັນ” ໃຫ້ກັບຜູ້ທີ່ສົນໃຈຈະສ້າງ”ແອັບ”ເປັນຂອງຕົນເອງໃຫ້ກັບເຄື່ອຂ່າຍຕ່າງໆໃນລາວ. ບ່ອນທີ່ມີສັນຍານໂທລະສັບ 2G ເຊິ່ງບໍ່ຈຳເປັນຕ້ອງມີ 3G 4G ກໍສາມາດເຂົ້າຄົ້ນຫາຂໍ້ມູນທີ່ຕ້ອງການໄດ້ໂດຍສະເພາະແມ່ນຜູ້ທີ່ຢູ່ເຂດຫ່າງໄກສອກຫຼີກທີ່ຍັງບໍ່ສາມາດເຂົ້າເຖິງແຫຼ່ງຂໍ້ມູນຜ່ານອິນເຕີເນັດໄດ້.
ທ່ານກ່າວຕື່ມວ່າ: ບໍ່ວ່າຈະເປັນພາກສ່ວນລັດ-ເອກະຊົນ ຫຼື ບຸກຄົນ ແມ່ນສາມາດສ້າງ”ແອັບພິເຄຊັນ”ຕ່າງໆຂອງຕົນເອງໄດ້ໃຫ້ກັບກຸ່ມເປົ້າໝາຍ ຕົວຢ່າງ: ດ້ານກະສິກໍາ ຜູ້ທີ່ສົນໃຈເລື່ອງກະສິກໍາຕ່າງໆພຽງແຕ່ຊື້ຊິມໂທລະສັບເຄື່ອຂ່າຍທີ່ມີ”ແອັບ”ກ່ຽວກັບກະສິກຳກໍສາມາດເຂົ້າ”ແອັບ”ນັ້ນເພື່ອເອົາຂໍ້ມູນກ່ຽວກັບກະສິກໄດ້ໂດຍບໍ່ຈຳເປັນຕ້ອງເຂົ້າອິນເຕີເນັດພຽງແຕ່ເຂົ້າ”ແອັບ”ດັ່ງກ່າວ ກໍຈະສາມດຊອກຫາຂໍ້ມູນກ່ຽວກັບທາງດ້ານກະສິກຳໄດ້.
ປັດຈຸບັນ, Be-Bound ໄດ້ເຊັນສັນຍາ MOU ທົດລອງໃຊ້ກັບເຄື່ອຄ່າຍຂອງ”ບີລາຍ” ແຕ່ຖ້າສຳເລັດຄາດວ່າ ຈະມີການເປີດໂຕໃຫ້ໄດ້ຊົມໃຊ້ໄດ້ພາຍໃນທ້າຍເດືອນມັງກອນ 2017 ພຽງແຕ່ທ່ານຊຶ້ ”ຊີມກາດ” ຂອງເຄືອຂ່າຍ ”ບີລາຍ” ທ່ານກໍສາມາດມີ ”ເເອັບ” ຊົມໃຊ້ໄດ້. ແຕ່ບໍ່ຈຳກັດພຽງແຕ່ເຄື່ອຂ່າຍດຽວ ເຄື່ອຂ່າຍອື່ນໆທີ່ມີຢູ່ໃນລາວກໍສາມາດມາຮ່ວມບໍລິການກັບພວກເຮົາໄດ້ເຊັ່ນດຽວກັນ.
ເຄຣດິດຂ່າວ: http://targetlaos.com/
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!