ໂຄງການກໍ່ສ້າງສູນຝຶກອົບຮົມແນວລາວສ້າງຊາດ ເປັນໂຄງການຊ່ວຍເຫຼືອຈາກ ລັດຖະບານ ສປ ຈີນ ໃຫ້ແກ່ສູນກາງແນວລາວສ້າງຊາດ (ສນຊ) ໃນມູນຄ່າ 33.700.000 ຢວນ (ສະກຸນເງິນຈີນ) ໂຄງການດັ່ງກ່າວ ຕັ້ງຢູ່ໃກ້ສູນກາງແນວລາວສ້າງຊາດ ໄດ້ດຳເນີນການກໍ່ສ້າງມາແຕ່ວັນທີ 12/12/2014 ແລະ ສຳເລັດການກໍ່ສ້າງໂດຍພື້ນຖານ ໃນວັນທີ 30/6/2016 ໂດຍແມ່ນ ບໍລິສັດ ເຮີເປີຍກໍ່ສ້າງ ຈຳກັດ ສປ ຈີນ ຮັບເໝົາກໍ່ສ້າງ.
ສູນຝຶກອົບຮົມແນວລາວສ້າງຊາດ ປະກອບດ້ວຍອາຄານ 2 ຫຼັງຄື: ຫຼັງທີ 1 ເປັນອາຄານສອງຊັ້ນ ທີ່ປະກອບມີຫ້ອງເຮັດວຽກຂອງຄູ-ອາຈານ, ຫ້ອງປະຊຸມນ້ອຍ ແລະ ໃຫຍ່, ຫ້ອງຮຽນ, ຫ້ອງອາຫານ ແລະ ຫຼັງທີ 2 ເປັນອາຄານ 3 ຊັ້ນ ປະກອບມີ 36 ຫ້ອງນອນ ຊຶ່ງເປັນຫໍພັກຂອງຜູ້ມາຝຶກອົບຮົມ.
ພິທີມອບ-ຮັບໂຄງການຢ່າງເປັນທາງການ ໄດ້ຈັດຂຶ້ນໃນວັນທີ 17 ພະຈິກນີ້ ທີ່ສູນຝຶກອົບຮົມດັ່ງກ່າວ ໂດຍການໃຫ້ກຽດເຂົ້າຮ່ວມຂອງ ທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ, ມີທ່ານ ກວນຮວາປິງ ເອກອັກຄະລັດຖະທູດ ສປ ຈີນ ປະຈຳ ສປປ ລາວ, ມີບັນດາແຂກຖືກເຊີນ ພ້ອມດ້ວຍພາກສ່ວນທີ່ກ່ຽວຂ້ອງ ທັງລາວ ແລະ ຈີນ ເຂົ້າຮ່ວມຢ່າງຫຼວງຫຼາຍ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!