ຄະນະຜູ້ແທນອົງການກວດສອບແຫ່ງລັດ ສປປ ລາວ ນຳໂດຍ ທ່ານ ປະດັບເພັດ ໄຊຍະໂຄດ ຮອງປະທານອົງການກວດສອບ ແຫ່ງລັດ ສປປ ລາວ ເປັນຫົວໜ້າຄະນະ ເດີນທາງໄປເຂົ້ ຮ່ວມກອງປະຊຸມ ວຽກງານກວດສອບລະຫວ່າງ ລາວ- ຫວຽດນາມ-ກຳປູເຈຍ ຄັ້ງທີ 7 ຈັດຂຶ້ນແຕ່ວັນທີ 7-11 ພະຈິກ ຜ່ານມານີ້ ທີ່ນະຄອນຫຼວງຮ່າໂນ້ຍ ສສ ຫວຽດນາມ ຕາມການເຊື້ອເຊີນຂອງ ທ່ານ ໂຮ່ດຶກເຟິກ ປະທານອົງການກວດສອບແຫ່ງລັດ ສສ ຫວຽດນາມ.
ເມື່ອບໍ່ດົນມານີ້, ທ່ານ ປະດັບເພັດ ໄຊຍະໂຄດ ພ້ອມຄະນະ ໄດ້ພົບປະ ແລະ ປຶກສາຫາລືກັບ ທ່ານ ໂຮ່ດຶກເຟິກ ປະທານອົງການກວດສອບແຫ່ງລັດ ສສ ຫວຽດນາມ ພ້ອມດ້ວຍຄະນະ ແລະ ທ່ານ ຊວນ ສິດທິ ຮອງປະທານອົງການກວດສອບ ແຫ່ງ ຣາຊະ ອານາຈັກກຳປູເຈຍ, ທັງສາມຝ່າຍໄດ້ຕີລາຄາສູງ ຜົນສຳເລັດຂອງການຮ່ວມມືໃນໄລຍະຜ່ານມາ ແລະ ຢັ້ງຢືນວ່າ ການພົວພັນຮ່ວມມືລະຫວ່າງສາມອົງການແມ່ນມີບົດບາດສຳຄັນ, ມີລັກສະນະຍຸດທະສາດໃນຂະບວນການປັບປຸງ, ເພີ່ມທະວີຄວາມອາດສາມາດດ້ານນິຕິກຳ, ການຈັດຕັ້ງ ແລະ ການພັດທະນາຊັບພະຍາກອນມະນຸດຂອງອົງ ການກວດສອບ. ທັງສາມຝ່າຍໄດ້ເຫັນດີຕໍ່ເນື້ອໃນການພົບປະ ແລະ ເປັນເອກະພາບກັນ ສືບຕໍ່ເພີ່ມທະວີສາຍພົວພັນຮ່ວມມືທາງດ້ານການກວດສອບ.
ນອກນັ້ນ, ທັງສາມຝ່າຍ ຍັງໄດ້ເຫັນດີເປັນເອກະພາບຮ່ວມກັນ ໃນການສ້າງຄະນະວິຊາການຮ່ວມເຮັດວຽກຂຶ້ນ ເພື່ອສ້າງແຜນການ ແລະ ແຜນກິດຈະກຳຮ່ວມມືສາມຝ່າຍຢ່າງລະອຽດ ເພື່ອໃຫ້ ເກີດມີການແລກປ່ຽນ ແລະ ປຶກສາຫາລືລະຫວ່າງກັນໃນສອງປີຕໍ່ໜ້າ ຊຶ່ງອົງການກວດສອບ ແຫ່ງ ຣາຊະອານາຈັກກຳປູເຈຍ ຈະເປັນເຈົ້າພາບໃນການຈັດກອງປະຊຸມ ວຽກງານກວດສອບລະຫວ່າງລາວ- ຫວຽດນາມ-ກຳປູເຈຍ ຄັ້ງທີ 8.
ນອກຈາກນັ້ນ, ໃນການພົບປະ ແລະ ເຮັດວຽກໃນຄັ້ງນີ້ ຍັງໄດ້ປຶກສາຫາລືລົງເລິກ ໃນຫົວຂໍ້ການກວດສອບທີ່ເນັ້ນໃສ່ຄວາມສ່ຽງ ຊຶ່ງເປັນຫົວຂໍ້ທີ່ບັນດາປະເທດທີ່ກ້າວໜ້າ ກຳລັງນຳໃຊ້ເພື່ອຍົກຂຶ້ນມາປຶກສາຫາລື, ແລກປ່ຽນ ແລະ ຊອກຫາວິທີການນຳໃຊ້ ໃຫ້ແທດເໝາະກັບແຕ່ລະປະເທດ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!