ຂ່າວດີອີກແລ້ວສຳລັບແຟນໆເກມຂອງ Nintendo ເມື່ອທາງບໍລິສັດໄດ້ອອກມາປະກາດຢ່າງເປັນທາງການແລ້ວວ່າເກມ Super Mario Run ຈະພ້ອມເປີດໃຫ້ບໍລິການສຳລັບລະບົບ iOS ໃນວັນທີ 15 ທັນວານີ້, ພ້ອມກັນ 151 ປະເທດ (ລວມເຖິງປະເທດລາວເຮົາພ້ອມ) ແລະຮອງຮັບ iPhone, iPad ຫຼື iPod ສະເພາະເວີຊັ່ນ iOS 8 ຂຶ້ນໄປເທົ່ານັ້ນ.
ໃນສ່ວນຂອງໂຕເກມແມ່ນຈະເປີດໃຫ້ດາວໂຫຼດໄປຫຼິ້ນໄດ້ຟຣີ ແຕ່ວ່າຈະຫຼິ້ນໄດ້ແຕ່ສະເພາະບາງສ່ວນເທົ່ານັ້ນ, ເຊິ່ງຈະມີໂຕເລືອກໃຫ້ເຮົາຊື້ຂາດໄປເລີຍໃນລາຄາ 9.99$ (ຊື້ເທື່ອດຽວຈະສາມາດເຂົ້າເຖິງທຸກໆຢ່າງໃນເກມໄດ້ເລີຍບໍ່ມີຊື້ອີກ).
ສຳລັບ Gameplay ແມ່ນຍັງຄົງແບບດຽວກັບທີ່ພວກເຮົາເຄີຍຫຼິ້ນຕອນຍັງນ້ອຍຄື: ໂຕເກມຈະໃຫ້ເຮົາໄດ້ແລ່ນເພື່ອເກັບຫຼຽນ, ຫຼີກລ່ຽງອຸປະສັກຕ່າງໆ ແລະສັດຕູຕາມທາງ ແລະກໍລວມໄປເຖິງການໂດດຮູດເສົາເພື່ອສຳເລັດພາລະກິດໃນດ່ານນັ້ນໆນຳ. ນອກຈາກນີ້ໂຕເກມຍັງຮອງຮັບເຖິງ 10 ພາສາຄື: ອັງກິດ, ສະເປນ, ເຢຍຣະມັນ, ຝຣັ່ງ, ອີຕາລີ, ໂປຣຕຸເກດ, ດັດ, ຣັດເຊຍ, ຍີ່ປຸ່ນ ແລະຈີນ
ສ່ວນຜູ້ໃຊ້ລະບົບ Android ບໍ່ຕ້ອງນ້ອຍໃຈໄປ ເພາະທາງ Nintendo ເຄີຍອອກມາປະກາດໄວ້ແລ້ວວ່າຈະສາມາດຫຼິ້ນເກມ Super Mario Run ເທິງລະບົບ Android ໄດ້ແນ່ນອນ, ແຕ່ເຖິງຢ່າງໃດກໍຕາມກໍບໍ່ໄດ້ລະບຸວັນເວລາທີ່ຊັດເຈນ ແຕ່ກໍຄາດວ່າຈະເປັນປີ 2017 ຫຼືປີໜ້ານີ້.
ສຳລັບທ່ານໃດທີ່ຮັກໃນການອ່ານຂ່າວໄອທີ, ເກມ ແລະ ອະນິເມະ ສາມາດຕິດຕາມໄດ້ທີ່ນີ້ ກົດຖືກໃຈເລີຍ!
ທີ່ມາ: phonearena