ອີງຕາມການລາຍງານຂອງ ເຈົ້າໜ້າທີ່ຕຳຫຼວດໜ່ວຍງານສະກັດກັ້ນ ແລະຕ້ານຢາເສບຕິດ ປກສ ເມືອງປາກກະດິງ ແຂວງບໍລິຄຳໄຊ ໃຫ້ຮູ້ວ່າ: ພາຍຫຼັງໄດ້ຮັບແຈ້ງຄວາມຈາກພົນລະເມືອງດີ, ວ່າມີບຸກຄົນໄດ້ມີການພົວພັນຊື້ຂາຍຢາເສບຕິດ ຢູ່ເຂດບ້ານໂພນສີ. ເຈົ້າໜ້າທີ່ວິຊາສະເພາະ ກໍ່ໄດ້ຈັດຕັ້ງກັນລົງຕິດຕາມເປົ້າໝາຍສົງໄສຄືນາງ ຈັນ (ແມ່ນວນຕາ), ອາຍຸ 53 ປີ, ອາຊີບເຮັດນາ, ບ້ານໂພນສີ, ເມືອງປາກກະດິງ ແຂວງບໍລິຄຳໄຊ, ທີ່ມີພຶດຕິກຳຄ້າຍຄື ກັບຄົນຄ້າ-ຂາຍຢາເສບຕິດ (ຢາບ້າ) ທີ່ທາງໜ່ວຍງານວິຊາສະເພາະ ຕິດຕາມມາເປັນເວລາຫຼາຍເດືອນ.
ຕົກມາຮອດວັນທີ 7 ພະຈິກ 2016ຜ່ານມາເຈົ້າໜ້າທີ່ໜ່ວຍງານສະກັດກັ້ນ ແລະຕ້ານຢາເສບຕິດ ຈິ່ງໄດ້ວາງແຜນ ແລະຂໍຄຳສັ່ງກວດຄົ້ນ ຈາກອົງການໄອຍະການ ປະຊາຊົນເຂດ I ແຂວງບໍລິຄຳໄຊ, ເພື່ອທຳການກວດຄົ້ນເຄຫາສະຖານ (ເຮືອນຂອງຜູ້ກ່ຽວ) ຈິ່ງພົບເຫັນຢາບ້າ ໃນຕົວຜູ້ກ່ຽວຈຳນວນ 10 ເມັດ ແລະພົບຢູ່ໃນເຮືອນຈຳນວນ 25 ເມັດ, ຈາກນັ້ນ ເຈົ້າໜ້າທີ່ ປກສ ເມືອງປາກກະດິງຈິ່ງ ໄດ້ນຳຕົວຜູ້ກ່ຽວມາທຳການສືບສວນ-ສອບສວນ.
ຜ່ານການສືບສວນ-ສອບສວນ ຜູ້ຖືກຫາຊື່ ນາງ ຈັນ ໄດ້ໃຫ້ການຮັບສາລະພາບວ່າ: ຕົນເອງແມ່ນໄດ້ເຄື່ອນໄຫວ ຄ້າ-ຂາຍຢາເສບຕິດ (ປະເພດຢາບ້າ) ມາແລ້ວຫຼາຍຄັ້ງ ແລະຢາບ້າຈຳນວນ ດັ່ງກ່າວທີ່ເຈົ້າໜ້າທີ່ກວດພົບນັ້ນແມ່ນ ຂອງຕົນຢ່າງແທ້ຈິງ ແລະຜູ້ກ່ຽວແມ່ນ ມີເຈຕະນາເຄື່ອນໄຫວຄ້າ-ຂາຍຢາເສບຕິດ (ປະເພດເຢາບ້າ) ຜິດໃນມາດຕາ 146 ຂໍ້ 2 ວັກ 1 ຂອງກົດໝາຍອາຍາແຫ່ງ ສປປ ລາວ, ປະຈຸບັນຄະດີດັ່ງກ່າວ ແມ່ນຢູ່ໃນຂັ້ນຕອນສືບສວນ-ສອບສວນຂະຫຍາຍຜົນ ຫາກຸ່ມແກ້ງຜູ້ຮ່ວມຂະບວນການ, ມາດຳເນີນຄະດີຕາມຂັ້ນຕອນຂອງກົດໝາຍ, ແລ້ວສົ່ງສຳນວນຄະດີດັ່ງກ່າວ, ໃຫ້ພະແນກສະກັດກັ້ນ ແລະຕ້ານຢາເສບຕິດ ປກສ ແຂວງບໍລິຄຳໄຊ, ປະກອບສຳນວນຄະດີໃຫ້ໄອຍາການສັ່ງຟ້ອງໃຫ້ສານຕັດສິນຕາມລະບຽບກົດໝາຍ.
ຂ່າວ: ເສດຖະກິດ-ສັງຄົມ