ສຳນັກຂ່າວຕ່າງປະເທດ ລາຍງານໃນວັນທີ 11 ພະຈິກນີ້ວ່າ ພົບການແຜ່ລະບາດຂອງເຊື້ອໄວຣັສ ໄຂ້ຫວັດສັດປີກ ສາຍພັນ H5N8 ໃນ 6 ປະເທດທົ່ວເອີຣົບ ສ້າງຄວາມເປັນຫ່ວງຕໍ່ຜົນກະທົບໃຫຍ່ຫລວງ ດ້ານອຸດສາຫະກຳທີ່ກ່ຽວຂ້ອງກັບສັດປີກ ທົ່ວທັງທະວີບດັ່ງກ່າວ ໂດຍໃນອາທິດນີ້ ມີລາຍງານພົບການລະບາດຂອງເຊື້ອພະຍາດນີ້ ຢູ່ບໍລິເວນພາກເໜືອປະເທດເຢຍລະມັນ, ຂະນະດຽວກັນກໍພົບການລະບາດທີ່ຄ້າຍຄືກັນ ໃນຝູງນົກປ່າຫລາຍຊະນິດ ທີ່ປະເທດສະວິດ, ໂປໂລຍ ແລະ ໂອຕຣິດ, ສະເພາະຢູ່ໂປໂລຍນັ້ນ ທາງການໄດ້ອອກມາຢືນຢັນແລ້ວວ່າ ເປັນພະຍາດໄຂ້ຫວັດສັດປີກ ສາຍພັນ H5N8.

ດ້ານກະຊວງສາທາລະນະສຸກ ປະເທດໂກຣອາຊີ ກໍໄດ້ອອກມາເປີດເຜີຍວ່າ ພົບການແຜ່ລະບາດຂອງເຊື້ອພພະຍາດນີ້ ໃນຝູງຫົງ ຢູ່ພື້ນທີ່ພາກຕາເວັນອອກຂອງປະເທດ, ສ່ວນຢູ່ຮົງກາຣີ ກໍມີການຢືນຢັນ ພົບຫົງຕິດເຊື້ອດັ່ງກ່າວ 1 ກໍລະນີ ຢູ່ບໍລິເວນຊາຍແດນທີ່ຕິດກັບປະເທດແຊັກບີ.

ກ່ອນໜ້ານີ້ ໃນວັນພຸດທີ 9 ພະຈິກຜ່ານມາ ລັດຖະບານໂຮນລັງ ກໍໄດ້ອອກຄຳສັ່ງໃຫ້ຊາວກະສິກອນ ທີ່ລ້ຽງສັດປີກໃນປະເທດຂອງຕົນ ດຳເນີນມາດຕະການສະກັດກັ້ນການຕິດເຊື້ອຈາກນົກປ່າ ສູ່ສັດປີກທີ່ລ້ຽງຢູ່ພາຍໃນຟາມຂອງຕົນ.

ທັງນີ້ ເຊື້ອໄວຣັສໄຂ້ຫວັດສັດປີກ ສາຍພັນ H5N8 ຖືເປັນໄວຣັສ ທີ່ພົບເຫັນອັດຕາການແຜ່ກະຈາຍສູງ ໃນລະຫວ່າງນົກ ແລະ ສັດປີກດ້ວຍກັນ, ແນວໃດກໍຕາມ ຍັງບໍ່ທັນເຄີຍເຫັນການຕິດເຊື້ອພະຍາດດັ່ງກ່າວນີ້ ໃນມະນຸດເທື່ອ.
 

ຕິດຕາມເຮົາທາງFacebook ກົດຖືກໃຈເລີຍ!