ໃນວັນທີ 10 ພະຈິກ 2016 ນີ້ ກອງປະຊຸມໃຫຍ່ ຄັ້ງທີ VIII ຂອງອົງຄະນະພັກ ຄະນະຈັດຄັ້ງສູນກາງພັກ ໄດ້ໄຂຂຶ້ນຢ່າງເປັນທາງການ ໂດຍການເປັນປະທານຂອງ ສະຫາຍ ຈັນສີ ໂພສີຄໍາ ກໍາມະການ ກົມການເມືອງສູນກາງພັກ, ຫົວໜ້າຄະນະຈັດຕັ້ງສູນກາງພັກ ໃຫ້ກຽດເຂົ້າຮ່ວມໂດຍ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງ ພັກປະຊາຊົນປະຕິວັດລາວ, ປະທານປະເທດ, ມີບັນດາຄະນະພັກ ແລະ ສະມາຊິກພັກສົມບູນ, ສໍາຮອງຈໍານວນ 107 ສະຫາຍ.
ກອງປະຊຸມໄດ້ຮັບຟັງ ແລະ ປະກອບຄໍາຄິດຄໍາເຫັນ ຕໍ່ບົດລາຍງານ ການເມືອງຂອງຄະນະພັກ, ຄະນະຈັດຕັ້ງສູນກາງພັກ ແລະ ໄດ້ພ້ອມກັນໃຊ້ສິດປະຊາທິປະໄຕ ເລືອກເອົາຄະນະບໍລິຫານງານພັກຊຸດໃໝ່ ຈໍານວນ 9 ສະຫາຍ ຈາກຜູ້ຮັບສະໝັກເລືອກຕັ້ງ 12 ສະຫາຍ, ໂດຍໄດ້ເປັນເອກະສັນເລືອກເອົາ ສະຫາຍ ຈັນສີ ໂພສີຄໍາ ເປັນເລຂາຄະນະພັກ ຄະນະຈັດຕັ້ງສູນກາງພັກຊຸດໃໝ່, ສະຫາຍ ວັນໄຊ ພອງສະຫວັນ ເປັນຮອງເລຂາ ແລະ ເລືອກເອົາ ສະຫາຍ ທອງຈັນ ໂຂງພູມຄໍາ ເປັນປະທານກວດກາ, ສະຫາຍ ແສງຄໍາຢອງ ພົມມະປັນຍາ ເປັນຮອງປະທານ ແລະ ສະຫາຍ ນາງ ສີບານ ສີສະອາດ ເປັນຮອງປະທານ.
ໃນໂອກາດເຂົ້າຮ່ວມກອງປະຊຸມ, ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງ ພັກປະຊາຊົນປະຕິວັດລາວ ປະທານປະເທດ ໄດ້ໃຫ້ກຽດໂອ້ລົມ ເຊິ່ງສະຫາຍ ໄດ້ຕາງໜ້າກົມການເມືອງ ສະແດງຄວາມຍ້ອງຍໍຊົມເຊີຍຜົນງານ ທີ່ຄະນະພັກຍາດມາໄດ້ໃນໄລຍະ 5 ປີຜ່ານມາ ແລະ ເຊື່ອໝັ້ນວ່າ ບັນດາທິດທາງ ທີ່ຄະນະພັກວາງອອກສໍາລັບຊຸມປີຕໍ່ໜ້ານັ້ນ ແມ່ນເພື່ອສ້າງບາດກ້າວບຸກທະລຸ ໃນການເຄື່ອນໄຫວວຽກງານຂອງ ຄະນະຈັດຕັ້ງສູນກາງພັກ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!