ຂປລ. ພາຍຫລັງລັດຖະມົນຕີ ກະຊວງອຸດສາຫະກຳ ແລະ ການຄ້າ ນຳສະເໜີກ່ຽວກັບ ການປັບປຸງຮ່າງກົດໝາຍ ວ່າດ້ວຍການຄຸ້ມຄອງສານເຄມີ, ອັນໄດ້ສ້າງຄວາມສົນໃຈໃຫ້ບັນດາສະມາຊິກສະພາແຫ່ງຊາດ ສສຊ ໄດ້ສຸມໃສ່ປະກອບຄຳຄິດເຫັນຢ່າງກົງໄປກົງມາ ແລະ ລົງເລິກ ໃນຫລາຍໝວດຫລາຍມາດຕາ ເຊິ່ງສ່ວນຫລາຍແມ່ນສະເໜີໃຫ້ພາກລັດຖະບານ ເອົາໃຈໃສ່ຢ່າງຈິງຈັງ ໃນການຄຸ້ມຄອງຕິດຕາມກວດກາ ການນຳເຂົ້າ ແລະ ການນຳໃຊ້ຕະຫລອດເຖິງ ການຮັກສາຄວາມປອດໄພ ຂອງສານເຄມີ.
ຮ່າງກົດໝາຍສະບັບນີ້, ສະເໜີໂດຍ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ລາຍງານຕໍ່ກອງປະຊຸມສະໄໝສາມັນ ເທື່ອທີ 2ຂອງສະພາແຫ່ງຊາດ ຊຸດທີ VIII ໃນວັນທີ 10 ພະຈິກ 2016, ເຊິ່ງເປັນກົດໝາຍສ້າງໃໝ່ ປະກອບມີ IX ພາກ 81 ມາດຕາ. ຈຸດປະສົງສຳຄັນແມ່ນ ເພື່ອຄຸ້ມຄອງຕິດຕາມກວດກາ ການຈັດຕັ້ງ ແລະ ການເຄື່ອນໄຫວຂອງວຽກງານເຄມີ ເພື່ອໃຫ້ໄດ້ຄຸນນະພາບ ແລະ ມາດຕະຖານ ແນໃສ່ເຮັດໃຫ້ການດຳເນີນທຸລະກິດ ແລະ ນຳໃຊ້ເຄມີ ຮັບປະກັນຕໍ່ສຸຂະພາບ, ຊັບສິນ ແລະ ສິ່ງແວດລ້ອມ.
ທ່ານນາງ ເຂັມມະນີ ພົນເສນາ ກ່າວວ່າ: ປັດຈຸບັນປະເທດລາວ ມີການຂະຫຍາຍຕົວທີ່ໄວວາ ທາງດ້ານເສດຖະກິດ-ສັງຄົມ ເຊິ່ງມີການນຳໃຊ້ສານເຄມີ ເຂົ້າໃນວຽກງານຕ່າງໆ ແຕ່ສານເຄມີເຫລົ່ານີ້ ນອກຈາກມີຄວາມອັນຕະລາຍຕໍ່ຊີວິດ, ຊັບສິນ ແລະ ສິ່ງແວດລ້ອມແລ້ວ ຍັງເປັນອັນຕະລາຍຕໍ່ຄວາມໝັ້ນຄົງຂອງຊາດ. ໂດຍໃນໄລຍະຜ່ານມາຍັງບໍ່ທັນມີນິຕິກຳໃດມາຄຸ້ມຄອງ ຈຶ່ງເຮັດໃຫ້ການນຳໃຊ້ເຄມີແບບຊະຊາຍ, ໃນຂະນະທີ່ການປະຕິບັດວຽກງານຂອງຂະແໜງການດັ່ງກ່າວນັ້ນ, ແມ່ນຍັງບໍ່ທັນເປັນເອກະພາບ, ໂຍນຄວາມຮັບຜິດຊອບເຊິ່ງກັນ ແລະ ກັນ. ສະນັ້ນ ຈຶ່ງໄດ້ສ້າງກົດໝາຍສະບັບນີ້ ເພື່ອຄຸ້ມຄອງວຽກງານເຄມີໃນທົ່ວປະເທດ ໃຫ້ມີປະສິດທິຜົນໃນຕໍ່ໜ້າ.
ການປະກອບຄຳຄິດເຫັນ ຂອງບັນດາ ສສຊ ທຸກເຂດເລືອກຕັ້ງຕໍ່ຮ່າງກົດໝາຍສະບັບນີ້ ໄດ້ດຳເນີນໄປຢ່າງຟົດຟື້ນ ຫລາຍປະໂຫຍກຫລາຍມາດຕາ ໄດ້ຮັບການສະເໜີໃຫ້ປັບປຸງແກ້ໄຂ ແລະ ເພີ່ມເຕີມສິ່ງທີ່ຈຳເປັນ ເຮັດໃຫ້ຮ່າງກົດໝາຍມີເນື້ອຄວາມຄົບຖ້ວນສົມບູນ ທັງສາມາດຮັບຮອງເພື່ອນຳໃຊ້ໄດ້ຢ່າງສັກສິດ. ພ້ອມດຽວກັນນີ້, ສສຊ ຫລາຍເຂດ ກໍໄດ້ສະເໜີສະພາບການນຳໃຊ້ເຄມີ ແບບຊະຊາຍ ແລະ ບໍ່ໄດ້ຮັບການຄຸ້ມຄອງເທົ່າທີ່ຄວນໃນໄລຍະຜ່ານມາ ອັນໄດ້ສ້າງຄວາມເສຍຫາຍຕໍ່ສຸຂະພາບ ແລະ ສິ່ງແວດລ້ອມ ຢູ່ໃນຫລາຍແຂວງ ເປັນຕົ້ນການຂຸດຄົ້ນເກືອກາລີຢູ່ແຂວງພາກກາງ, ການປູກກ້ວຍຫອມຢູ່ແຂວງພາກເໜືອ ແລະ ພືດກະສິກຳອື່ນ ເຊິ່ງໜ້າເປັນຫ່ວງຫລາຍ, ຫາກກົດໝາຍສະບັບນີ້ຖືກຮັບຮອງ ແລະ ປະກາດໃຊ້ ຂໍໃຫ້ພາກລັດດຳເນີນການຢ່າງຈິງຈັງໃນອະນາຄົດ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!
