ຕອນເຊົ້າມື້ນີ້ ວັນທີ 10 ພະຈິກ 2016, ຢູ່ທີ່ສວນເຈົ້າອະນຸວົງ ແຄມຂອງເຊິ່ງເປັນບ່ອນປະດິດສະຖານ ຮູບຫຼໍ່ ຂອງເຈົ້າອະນຸວົງ ວິລະກະສັດຂອງລາວ ໄດ້ມີພິທີສະເຫຼີມສະຫຼອງການປະດິດສະຖານ ຮູບຫຼໍ່ ເຈົ້າອະນຸວົງ ຄົບຮອບ 6 ປີ ເຊິ່ງໃນພິທີໄດ້ມີການໃສ່ບາດ ຖວາຍພັດຕາຫານແດ່ພະສົງ ເພື່ອອຸທິດຫາເຈົ້າອະນຸວົງ ດ້ວຍຄວາມສຳນຶກຮູ້ບຸນຄຸນ ທີ່ພະອົງໄດ້ສ້າງໄວ້ແກ່ລູກຫຼານລາວ.
ໃນພິທີໄດ້ມີການເຂົ້າຮ່ວມຂອງ ການນຳສຳຄັນຂອງລາວ, ອົງການຈັດຕັ້ງ ແລະພໍ່ແມ່ປະຊາຊົນຊາວນະຄອນຫຼວງວຽງຈັນຈຳນວນຫຼາຍເຂົ້າຮ່ວມ.
ເຈົ້າອານຸວົງເປັນກະສັດອົງໜຶ່ງ ທີ່ມີຄວາມສຳຄັນທາງດ້ານປະຫວັດສາດຂອງຊາດລາວ ພະອົງເປັນພະໂອລົດອົງຫຼ້າຂອງສົມເດັດ ພະເຈົ້າສຸຣິບຸນຍະສານ ພະເຈົ້າແຜ່ນດິນເອກະລາດລ້ານຊ້າງວຽງຈັນອົງສຸດທ້າຍ ພະເຈົ້າສຸຣິບຸນຍະສານມີໂອລົດ ແລະ ທິດາທີ່ມີນາມປະກົດຕາມພົງສາວະດານຄື: ເຈົ້ານັນທະເສນ, ເຈົ້າອິນທະວົງ, ເຈົ້ານາງແກ້ວຍອດຟ້າ ກັນລະຍານີສີກະສັດ, ເຈົ້າພົມມະວົງ ແລະ ເຈົ້າອານຸວົງ ດັ່ງທີ່ເຮົາຮູ້ຈັກກັນດີແລ້ວວ່າເພິ່ນເປັນກະສັດຜູ້ໜຶ່ງທີ່ຮັກຊາດ ເກັ່ງກ້າອາດຫານ ມີນ້ຳໃຈຕໍ່ສູ້ອັນພິລະອາດຫານ ແລະ ບໍ່ຍອມຈຳນົນ ເຊິ່ງໃນຣາຊະການຂອງເຈົ້າອານຸວົງນີ້ ເມື່ອບ້ານເມືອງສູນເສຍເອກະລາດປະຊາຊົນຕົກເປັນຂ້ອຍຂ້າມ້າໃຊ້ຂອງຕ່າງຊາດ ເຮັດໃຫ້ເຈົ້າອານຸວົງ ເກີດຄວາມຮູ້ສຶກຢາກກູ້ຊາດຍາດແຜ່ນດິນກັບຄືນມາ ກູ້ເອົາອິດສະຫຼະພາບຂອງຊາວລ້ານຊ້າງວຽງຈັນກັບຄືນມາ.
ພາຍຫຼັງທີ່ເຈົ້າອານຸວົງໄດ້ຖືກແຕ່ງຕັ້ງຈາກສະຫຍາມໃຫ້ເປັນກະສັດລ້ານຊ້າງວຽງຈັນ, ເຈົ້າອານຸວົງ ກໍໄດ້ດຳເນີນພາລະກິດອັນສຳຄັນຫຼາຍປະການເຊັ່ນ:ດ້ານການເມືອງ: ກໍໄດ້ຕິດຕາມຂະບວນການຕໍ່ສູ້ຂອງປະຊາຊົນຢູ່ໃນແຕ່ລະທ້ອງຖິ່ນ, ດ້ານການສ້າງສາ: ໄດ້ນຳພາປະຊາຊົນສ້າງພຣະຣາຊະວັງ, ສ້າງແລະປະຕິສັງຂອນວັດວາອາຮາມຂຶ້ນຫຼາຍແຫ່ງເຊັ່ນ: ວັດສີສະເກດ, ປັບປຸງເມືອງໜອງຄາຍ, ສ້າງຫໍພະແກ້ວຂຶ້ນຢູ່ວັດຊ້າງເຜືອກ ແລະ ອີກຫຼາຍແຫ່ງ, ດ້ານການທະຫານ: ໄດ້ປັບປຸງກອງທັບບັນດາຫົວເມືອງໃຫ້ເຂັ້ມແຂງ ແລະ ດ້ານການຕ່າງປະເທດ: ເຈົ້າອານຸວົງ ພະຍາຍາມໃກ້ຊິດ ກັບກະສັດສະຫຍາມ ແລະ ໄດ້ຊ່ວຍສະຫຍາມຍົກທັບໄປຕີພະມ້າຈົນໄດ້ຮັບໄຊຊະນະ ເຊິ່ງໄດ້ສ້າງຄວາມໄວ້ເນື້ອເຊື່ອໃຈກັບສະຫຍາມເຈົ້າອານຸວົງມີນະໂຍບາຍພາຍໃນ ແລະ ພາຍນອກຢ່າງຈະແຈ້ງໃນນັ້ນມີການພົວພັນກັບອານາມ (ດ້າຍຫວຽດ ຫຼື ຫວຽດນາມໃນປັດຈຸບັນ).
ເມື່ອກະກຽມກໍາລັງພຽງພໍແລ້ວກໍໄດ້ໂອກາດລົງໄປປົງພະສົບ ຂອງພະບາດສົມເດັດພະພຸດທະເລີດຫຼ້ານະພາໄລ (ລາຊະການ ທີ 2) ຂອງສະຫຍາມ ໃນໂອກາດນີ້ເຈົ້າອານຸວົງໄດ້ຂໍເອົາຄົນລາວທີ່ຖືກກວາດຕ້ອນໄປໃນເມື່ອກ່ອນກັບຄືນມາ, ຂໍເອົານາງສະໜົມລາວ, ຂໍເອົາເຈົ້າຍິງດວງຄຳພະຂະນິດຖາພະຄິນີ ອອກຈາກວັງຄືນມາເຖິງວ່າການຕໍ່ສູ້ກູ້ແຜ່ນດິນຄືນ ຂອງເຈົ້າອານຸວົງບໍ່ເປັນຜົນສຳເລັດກໍຕາມແຕ່ມັນກໍມີຄວາມໝາຍທາງປະຫວັດສາດອັນເລິກເຊິ່ງ ຊຶ່ງສະແດງໃຫ້ເຫັນເຖິງມູນເຊື້ອຕໍ່ສູ້ອັນເດັດດ່ຽວກ້າຫານ ບໍ່ຍອມຈຳນົນຂອງຄົນລາວພາຍໃຕ້ການນຳພາຂອງເຈົ້າອານຸວົງ, ມູນເຊື້ອ ດັ່ງກ່າວຖືກຝັງເລິກຢູ່ໃນຈິດໃຈຂອງຄົນລາວທຸກຄົນ.
ເພື່ອລະນຶກຄຸນງາມຄວາມດີ ແລະວິລະກຳອັນລ້ຳເລີດຂອງເຈົ້າອານຸວົງ ທີ່ໄດ້ອຸທິດໃຫ້ແກ່ປະເທດຊາດນຳພາປະຊາຊົນລາວຕໍ່ສູ້ໃນໄລຍະຜ່ານມາ ສະນັ້ນ ພັກແລະລັດຖະບານຈຶ່ງໄດ້ມີໂຄງການປະດິດສະຖານຫຼໍ່ຮູບປັ້ນຂອງເພິ່ນຂຶ້ນ, ໃນວັນທີ 7 ເດືອນພະຈິກ ປີ 2010 ຈຶ່ງໄດ້ມີພິທີສົມໂພດຮູບປັ້ນຫຼໍ່ຂອງເພິ່ນຂຶ້ນຢ່າງສົມກຽດ ເຈົ້າອານຸວົງຍັງຝັງຢູ່ດວງໃຈຂອງປະຊາຊົນລາວຈາກລຸ່ນຄົນຕໍ່ລຸ່ນຄົນຕະຫຼອດມາ ສົມແລ້ວທີ່ວ່າ “ເຈົ້າອານຸວົງຄົງຢູ່ຄູ່ເມືອງລາວ”.
ໃນປັດຈຸບັນນີ້ຮູບປັ້ນຂອງເຈົ້າອານຸວົງກໍໄດ້ປະດິດສະຖານໄວ້ຢູ່ສວນສາທາລະນະຢູ່ທີ່ແຄມຂອງເຂດເມືອງຈັນທະບູລີ, ເມື່ອທ່ານໄດ້ເດີນທາງມາຮອດນະຄອນຫຼວງວຽງຈັນແລ້ວ ພໍຕົກຍາມແລງມາພວກເຮົາຂໍແນະນໍາໃຫ້ທ່ານມາຍ່າງເລາະຊົມສວນເຈົ້າອານຸວົງ, ພາຍໃນສວນມີຮູບປັ້ນເຈົ້າອານຸວົງທີ່ສູງ 17 ແມັດ ຕັ້ງຢູ່ຢ່າງສະຫງ່າຜ່າເຜີຍ ແລະ ຫັນໜ້າໄປທາງແມ່ນໍ້າຂອງ ຮູບປັ້ນດັ່ງກ່າວຖືກຫຼໍ່ຂຶ້ນຈາກທອງແດງ ແລະ ມີນໍ້າໜັກທັງໝົດເຖິງ 8 ໂຕນ.
ນອກຈາກນັ້ນສວນເຈົ້າອານຸວົງຍັງມີເດີ່ນຫຍ້າອັນກວ້າງໃຫຍ່ປົກຄຸມໄປດ້ວຍຕົ້ນໄມ້ທີ່ຂຽວສົດງົດງາມ, ມີເດີ່ນຫຼິ້ນສໍາລັບເດັກນ້ອຍ ພ້ອມເຄື່ອງຫຼິ້ນຕ່າງໆເຊິ່ງເໝາະແກ່ການຍ່າງເລາະ, ນັ່ງຫຼິ້ນ ແລະ ອອກກໍາລັງກາຍເພື່ອພັກຜ່ອນຢ່ອນໃຈກັບຄອບຄົວ ແລະ ໝູ່ເພື່ອນຫຼັງຈາກເລີກວຽກງານໃນຍາມແລງ ບໍ່ພຽງແຕ່ເທົ່ານັ້ນສວນດັ່ງກ່າວຍັງມີອາຫານແຊບໆທີ່ບັນດາພໍ່ຄ້າ ແລະ ແມ່ຄ້າຍູ້ລໍ້ມາຂາຍໃຫ້ທ່ານນໍາອີກ ນອກຈາກນີ້ແລ້ວສໍາລັບທ່ານທີ່ຢາກກາບໄຫ້ວເຈົ້າອານຸວົງ ກໍສາມາດຊື້ດອກໄມ້ທູບທຽນໄດ້ທີ່ມີວາງຂາຍຢູ່ຕາມອ້ອມຂ້າງຮູບປັ້ນຂອງເຈົ້າອານຸວົງ ແລະ ສິ່ງສໍາຄັນຄືຜູ້ທີ່ຢາກເຂົ້າໄປກາບໄຫ້ວຢາກໃຫ້ແຕ່ງກາຍສຸພາບຮຽບ ເພື່ອເປັນການສະແດງເຖິງຄວາມເຄົາລົບ ແລະ ຮັກສາຮີດຄອງປະເພນີ້ອັນດີງາມຂອງລາວເຮົາ.
