ເມື່ອວັນທີ 22 ກໍລະກົດ 2014 ເວັບໄຊເດິກາດຽນ ລາຍງານວ່າ ລັດເຊຍອອກມາຕອກກັບສະຫະລັດຯ ຫຼັງຈາກຖືກກ່າວຫາວ່າເປັນຜູ້ສະໜັບສະໜຸນອາວຸດຍຸດໂທປະກອນແກ່ກຸ່ມຜູ້ມັກລັດເຊຍໃນຢູເຄຣນທີ່ຍິງເຮືອບິນ MH17 ມາເລເຊຍແອລາຍຕົກໃນເຂດຊາຍແດນລະຫ່າງຢູເຄຣນແລະລັດເຊຍ. ລັດເຊຍກ່າວວ່າຝ່າຍຕົນບໍ່ມີສ່ວນກ່ຽວຂ້ອງກັບບັນຫາຍົນຕົກ ພ້ອມກັບອ້າງຫຼັກຖານວ່າ ພົບເຮືອບິນຕິດຂີປະນາວຸດຂອງຢູເຄຣນບິນຢູ່ໃກ້ໆກັບ MH17 ກ່ອນຍົນຈະຖືກຍິງ.
ພົນໂທອັນເດຣ ຄາໂຕໂຟລອບ ຕົວແທນຈາກຊະຊວງປ້ອງກັນປະເທດລັດເຊຍ ລະບຸວ່າ ໃນຂະນະທີ່ອາເມລິການກ່າວໂທດໃສ່ລັດເຊຍວ່າຢູ່ເບື້ອງຫຼັງເຫດການເຮືອບິນ MH17 ມາເລເຊຍແອລາຍ, ລັດເຊຍຂໍຢືນຢັນວ່າບໍ່ໄດ້ສົ່ງລະບົບຂີປະນາວຸດ SA-11 BUK ຫຼືອາວຸດໃດໆ ໃຫ້ກັບກຸ່ມກະບົດແບ່ງແຍກດິນແດນໃນຢູເຄຣນຢ່າງທີ່ອາເມລິກາກ່າວຫາ ແລະລັດເຊຍເອງກໍມີຫຼັກຖານການບິນທີ່ສະແດງໃຫ້ເຫັນວ່າ ກ່ອນເກີດເຫດເຮືອບບິນ ໂບອີ້ງ 777 ທ່ຽວບິນ MH17 ຂອງສາຍການບິນມາເລເຊຍ ແອລາຍ ບິນອອກນອກເສັ້ນທາງໄປທາງເໜືອປະມານບໍ່ເກີນ 14 ກິໂລແມັດ ແລະຂະນະນັ້ນ ມີເຮືອບິນຂັບໄລ່ SU-25 ຂອງຢູເຄຣນ ເຊິ່ງເປັນເຮືອບິນຮົບຕິດຂີປະນາວຸດໂຈມຕີທາງອາກາດ ບິນຢູ່ໃກ້ໆ ກັບ MH17 ໃນໄລຍະຫ່າງປະມານ 3-5 ກິໂລແມັດ ແຖມຍັງບິນໃນລະດັບດຽວກັນນຳອີກ. ຄຳຖາມກໍຄື ມີເຫດຜົນອັນໃດທີ່ເຮືອບິນຮົບຕ້ອງໄປບິນເສັ້ນທາງນັ້ນໃນເວລາດຽວກັນແລະລະດັບຄວາມສູງດຽວກັນກັບເຮືອບິນໂດຍສານ.
ແນວໃດກໍດີ ຫຼັງຈາກຂ່າວດັ່ງກ່າວໄດ້ຖືກເຜີຍແຜ່ອອກໄປ ທາງການຢູເຄຣນກໍໄດ້ອອກມາປະຕິເສດຄຳກ່າວຫາດັ່ງກ່າວຂອງລັດເຊຍ ພ້ອມທັງຢືນຢັນວ່າເລື່ອງນີ້ບໍ່ເປັນຄວາມຈິງແຕ່ຢ່າງໃດ ເຮືອບິນຮົບທຸກລຳຕ່າງກໍປະຈຳການຢູ່ເທິງພາກພື້ນດິນໃນໄລຍະນັ້ນ.
ສ່ວນທາງດ້ານປະທານາທິບໍດີ ວະລາດິເມຍ ປູຕີນ ຂອງລັດເຊຍ ກໍຍັງຄົງກ່າວວ່າ ຢູເຄຣນຕ້ອງຮັບຜິດຊອບຕໍ່ເລື່ອງນີ້ ແລະບໍ່ຄວນມີໃຜໃຊ້ໂສກນາຕະກຳນີ້ເພື່ອບັນລຸຜົນປະໂຫຍດທາງການເມືອງຂອງຕົນເອງ.
ຂະນະດຽວກັນ ດ້ານສື່ມວນຊົນຂອງລັດເຊຍກໍໄດ້ອອກຂ່າວວ່າ ໜ່ວຍສືບລັບຂອງສະຫະລັດ (CIA) ເປັນຜູ້ຢູ່ເບື້ອງຫຼັງໂສກນາຕະກຳທີ່ຂ້າຊີວິດຜູ້ບໍລິສຸດກວ່າ 298 ຄົນ ໃນຄັ້ງນີ້.