ພິທີສະເຫຼີມສະຫຼອງ ມະຫາວິທະຍາໄລແຫ່ງຊາດລາວ ຄົບຮອບ 20 ປີ ໄດ້ຈັດຂຶ້ນໃນຕອນບ່າຍວັນທີ 5 ພະຈິກນີ້, ທີ່ເດີ່ນກິລາ ມຊ ນະຄອນຫຼວງວຽງຈັນ ໂດຍການເປັນກຽດເຂົ້າຮ່ວມຂອງ ທ່ານ ພັນຄໍາ ວິພາວັນ ຮອງປະທານປະເທດ ແຫ່ງ ສປປ ລາວ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ມີທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ, ທູຕານຸທູດ, ອົງການຈັດຕັ້ງສາກົນປະຈໍາລາວ ພ້ອມດ້ວຍຄູ-ອາຈານ, ນັກຮຽນ-ນັກສຶກສາເຂົ້າຮ່ວມຫລາຍກວ່າ 1.000 ຄົນ.
ທ່ານ ສົມສີ ຍໍພັນໄຊ ຜູ້ວ່າການແທນ ອະທິການບໍດີມະຫາວິທະຍາໄລແຫ່ງຊາດລາວ ໄດ້ຂຶ້ນກ່າວຄຳເຫັນວ່າ: ຜ່ານໄລຍະ 20 ປີແຫ່ງການກໍ່ຕັ້ງ ແລະ ເຕີບໃຫຍ່ຂະຫຍາຍຕົວ, ປັດຈຸບັນ, ມຊ ປະກອບມີ 12 ຄະນະວິຊາ, ໃນນັ້ນ, ມີຫຼັກສູດການຮຽນ-ການສອນທັງໝົດ 178 ຫຼັກສູດ, ປະກອບມີຫຼັກສູດປະລິນຍາເອກ 3 ຫຼັກສູດ,ປະລິນຍາໂທ 52 ຫຼັກສູດ, ປະລິນຍາຕີ 100 ຫຼັກສູດ, ຕໍ່ເນື່ອງປະ ລິນຍາຕີ 22 ຫຼັກສູດ ແລະ ອະນຸປະລິນຍາ 1ຫຼັກສູດ. ເຊິ່ງມີນັກນຶກສາໄດ້ສໍາເລັດການສຶກສາຜ່ານຫຼັກສູດເຫຼົ່ານີ້ໄປແລ້ວ 89.956 ຄົນ, ຍິງ 31.147 ຄົນ. ທ່ານກ່າວວ່າ: ເພື່ອພັດທະນາ ມຊ ໃຫ້ໄປຕາມວິໄສທັດ ແລະ ແຜນຍຸດທະສາດ ໃນຊຸມປີຕໍ່ໜ້າ ຕ້ອງໄດ້ສູ້ຊົນເພື່ອພັດທະນາ ມຊ ໃຫ້ໄດ້ມາດຕະຖານ ເທົ່າທຽມກັບບັນດາມະຫາວິທະຍາໄລ ໃນພາກພື້ນ ແລະ ສາກົນ.
ໃນພິທີສະເຫຼີມສະຫຼອງ ມຊ ຄົບຮອບ 20 ປີ, ທ່ານຮອງປະທານປະເທດ ໄດ້ໃຫ້ທິດຊີ້ນຳວ່າ: ໃນໄລຍະ 20 ຜ່ານມາ ມະຫາວິທະຍາໄລແຫ່ງຊາດລາວ ສາມາດກໍ່ສ້າງ ແລະ ພັດທະນາຊັບພະຍາກອນມະນຸດ ຫຼາຍສາຂາວິຊາຊີບ ໃນລະດັບອະນຸປະລິນຍາ, ປະລິນຍາຕີ, ປະລິນຍາໂທ ແລະ ປະລິນຍາເອກ ອອກຮັບໃຊ້ສັງຄົມນັບເປັນແສນຄົນ, ໃນຈໍານວນນີ້ມີຫຼາຍໆຄົນໄດ້ກາຍເປັນພະນັກງານການນໍາລະດັບຕ່າງໆ, ກາຍເປັນພະນັກງານວິຊາການທີ່ມີຄວາມຮູ້ຄວາມສາມາດ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ກໍຄືການສ້າງສາພັດທະນາປະເທດຊາດ ຊຶ່ງມີທັງຢູ່ໃນກົງຈັກຂອງພັກລັດ ແລະ ເອກະຊົນ, ຜົນສໍາເລັດ ແລະ ຜົນງານດັ່ງກ່າວ ໄດ້ມາຈາກຄວາມພະຍາຍາມອົດທົນ ຜ່ານຜ່າຄວາມຫຍຸ້ງຍາກນາໆປະການຂອງ ການນໍາ, ຄຸ-ອາຈານ, ພະນັກງານ ມຊ ແລະ ການປະກອບສ່ວນຂອງທຸກອົງການຈັດຕັ້ງສັງຄົມ ທັງພາກລັດ-ເອກະຊົນ ບົນພື້ນຖານເພື່ອນມິດ, ອ້າຍນ້ອງ, ອົງການຈັດຕັ້ງສາກົນ ແລະ ຄູ່ຮ່ວມພັດທະນາ. ທ່ານກ່າວຢ້ຳວ່າ: ໃນກອງປະຊຸມຄັ້ງທີ10 ຂອງພັກ ໄດ້ຖືເອົາການພັດທະນາຊັບພະຍາກອນມະນຸ ດເປັນປັດໄຈຕັດສິນການພັດທະນາປະເທດຊາດໃນໄລຍະໃໝ່. ດັ່ງນັ້ນ, ເຮົາສ້າງຄົນຮຸ້ນໃໝ່ໄດ້ພວກເຮົາຈຶ່ງຈະມີທຸກຢ່າງຕາມຄວາມມຸ້ງມາດປາດຖະນາຂອງປະຊາຊົນລາວ.
ຫຼັງຈາກນັ້ນ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ ໄດ້ປະດັບຫຼຽນໄຊແຮງງານຊັ້ນ 2 ໃຫ້ ມຊ ທີ່ມີຜົນງານດີເດັ່ນ ໃນການສ້າງບຸກຄະລາກອນຕະຫຼອດໄລຍະ 20 ຜ່ານມາ ແລະ ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ ກໍໄດ້ມອບນາມມະຍົດໃຫ້ຄູ-ອາຈານດີເດັ່ນຈໍານວນ 14 ທ່ານ, ແລະ ຫຼຽນໄຊແຮງງານຊັ້ນ 2 ຈໍານວນ 236 ທ່ານ ແລະ 8 ກົມກອງ, ຫຼຽນໄຊແຮງງານຊັ້ນ 3 ຈໍານວນ 254 ທ່ານ ແລະ 17 ກົມກອງ, ຫຼຽນກາແຮງງານ 258 ທ່ານ ແລະ 3 ກົມກອງ, ໃບຍ້ອງຍໍຂັ້ນລັດຖະບານ 178 ທ່ານ ແລະ ຂັ້ນກະຊວງສຶກສາທິການ ແລ ະກິລາ ຈໍານວນ 138 ທ່ານ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!