ບຸກຄະລາກອນນາຍໜ້າ ຊື້-ຂາຍຫຼັກຊັບຢ່າງມືອາຊີບ 17 ຄົນ ທຳອິດຂອງລາວໄດ້ຖືກຮັບຮອງເອົາຢ່າງເປັນທາງການ
ຈາກຕະຫຼາດຫຼັກຊັບລາວໃນຕອນແລງຂອງວັນທີ 18 ກໍລະກົດຜ່ານມາ ຊຶ່ງການສ້າງຊັບພະຍາກອນມະນຸດໃນຄັ້ງນີ້
ແມ່ນການຈັດຕັ້ງປະຕິບັດຕາມຈິດໃຈເນື້ອໃນ ແລະ ບຸກທະລຸຂອງພັກ ແລະ ແຜນການກໍ່ສ້າງພະນັກງານຂອງລັດຖະ
ບານ ໂດຍຮ່ວມກັນຈັດຂຶ້ນລະຫວ່າງຕະຫຼາດຫຼັກຊັບລາວ ກັບຄະນະເສດຖະສາດ-ບໍລິຫານທຸລະກິດ ມະຫາວິທະຍາໄລ
ແຫ່ງຊາດ ແລະ ບໍລິສັດຫຼັກຊັບເອພີເອັມລາວ ຈຳກັດ ຊຶ່ງໂຄງການນີ້ແມ່ນນອນໃນການຮ່ວມມືດ້ານວິຊາການກ່ຽວ
ກັບການພັດທະນາຫຼັກສູດ “ແຜນລາຍການຝຶກອົບຮົມ - ການທະນາຄານ ເພື່ອການລົງທຶນຢ່າງມືອາຊີບລາວ” ຮຸ່ນ I
ຫຼື Program-Lao Profes sional In vestment Banking I ຊຶ່ງໃຊ້ເວລາຝຶກອົບຮົມ 6 ອາທິດ (ຮຽນສະເພາະວັນເສົາ
ວັນອາທິດ) ໂດຍມີນັກຝຶກອົບຮົມທັງໝົດ 67 ຄົນ ແຕ່ສາມາດບັນລຸການສອບເສັງພຽງແຕ່ 17 ຄົນ ເທົ່ານັ້ນ.
ການຝຶກອົບຮົມໃນລັກສະນະແບບນີ້ ເປັນຄັ້ງທຳອິດແຕ່ກໍມີວິທະຍາກອນທີ່ຄວາມຊ່ຽວຊານສູງຈາກພາຍໃນຕ່າງປະ
ເທດໃຫ້ການບັນຍາຍ, ພ້ອມດຽວກັນການສອບເສັງກໍມີລັກສະນະເຂັ້ມງວດ ໂດຍເນັ້ນເອົາຄຸນນະພາບ ຫຼື ຄວາມຮູ້
ລ້ວນໆ, ຜູ້ສອບຕົກກໍຕົກໂດຍບໍ່ມີນະໂຍບາຍ ທັງນີ້ກໍເພື່ອເປັນການພັດທະນາຕະຫຼາດທຶນແນໃສ່ຮັບປະກັນຄວາມ
ພ້ອມສູ່ປະຊາຄົມເສດຖະກິດອາຊຽນ, ນັກຝຶກອົບຮົມທັງໝົດແມ່ນມາຈາກສຳນັກງານຄະນະກຳມະການຄຸ້ມຄອງຫຼັກ
ຊັບ, ຕະຫຼາດຫຼັກຊັບ ທຄຕລ-ກທ ຈຳກັດ, ບໍລິສັດຫຼັກຊັບລ້ານຊ້າງ ມະຫາຊົນ, ບໍລິສັດ ເອພີເອັມລາວ ຈຳກັດ, ມະຫາ
ວິທະຍາໄລແຫ່ງຊາດ, ບໍລິສັດຜະລິດ - ໄຟຟ້າລາວມະຫາຊົນ, ບໍລິສັດຂວັນໃຈການຄ້າຂາອອກຂາເຂົ້າ, ບໍລິສັດ ເຄພີ
ກຣຸບ ແລະ ບໍລິສັດກໍ່ສ້າງຂົວທາງ.
ສຳລັບ 17 ຄົນ ທີ່ສາມາດບັນລຸການສອບເສັງນັ້ນ ທ່ານ ຮສຈ. ເດດພູວັງ ມູລຣັຕນ໌ ປະທານຄະນະ, ຫົວໜ້າຜູ້ບໍລິຫານ
ຕະຫຼາດຫຼັກຊັບລາວກໍໄດ້ໃຫ້ກຽດມອບໃບປະກາດດັ່ງກ່າວ ໂດຍການເຂົ້າຮ່ວມເປັນສັກຂີພິຍານຂອງ ທ່ານ ຮສຈ. ສົມ
ຈິດ ສຸກສະຫວັດ ຄະນະບໍດີຄະນະເສດຖະສາດ-ບໍລິຫານທຸລະກິດມະຫາວິທະຍາໄລແຫ່ງ ຊາດ ແລະ ທ່ານຜູ້ຊ່ວຍສາສະ
ດາຈານ ນາງ ສຸດາ ປິຕະວັນ ຜູ້ອຳນວຍການຝ່າຍບໍລິສັດຫຼັກຊັບເອພີເອັມລາວ ຈຳກັດ.
ທ່ານປະທານຄະນະ, ຫົວໜ້າຜູ້ບໍລິຫານຕະຫຼາດຫຼັກຊັບລາວໄດ້ຢືນຢັນວ່າ: ການສ້າງບຸກຄະລາກອນນາຍໜ້າຊື້ – ຂາຍ
ຫຼັກຊັບຢ່າງມືອາຊີບໃນຄັ້ງນີ້ ເປັນຄັ້ງທຳອິດໃນປະຫວັດສາດຂອງ ສປປ ລາວ, ບຸກຄົນທີ່ສາມາດບັນລຸການສອບເສັງຖື
ວ່າເປັນບຸກຄົນສຳຄັນໃນວົງການຕະຫຼາດຫຼັກຊັບ ຊຶ່ງເຂົາເຈົ້າຈະໄດ້ດຳເນີນການ ຫຼື ເປັນຜູ້ບໍລິຫານຢູ່ໃນອົງກອນທີ່ກ່ຽວ
ຂ້ອງ ໂດຍສະເພາະຢູ່ໃນ 3 ບໍລິສັດຫຼັກຊັບ, ສຳນັກງານ, ບໍລິສັດ ແລະ ຫົວໜ່ວຍທຸລະກິດຕ່າງໆອັນຈະເຮັດໃຫ້ອົງກອນ
ໝັ້ນໃຈ ແລະ ເຂັ້ມແຂງເພີ່ມຂຶ້ນ, ໃນຕໍ່ໜ້າສະເໜີໃຫ້ບຸກຄົນທີ່ສາມາດບັນລຸການສອບເສັງໄປຂໍອະນຸມັດວິຊາຊີບນາຍ
ໜ້າຊື້ຂາຍຫຼັກຊັບຈາກສຳນັກງານຄະນະກຳມະການ ຄຸ້ມຄອງຫຼັກຊັບ ຊຶ່ງຈະເປັນມືອາຊີບທີ່ໝັ້ນຄົງກາຍເປັນສົມບັດ
ຕິດຕົວໄປ ແລະ ໃຫ້ມີການພັດທະນາຕົນເອງ, ຮັກສາມູນເຊື້ອທີ່ດີ, ມີຄຸນນະທຳຈັນຍາບັນ.
ທ່ານຄະນະບໍດີຄະນະເສດຖະສາດ - ບໍລິຫານທຸລະກິດ ມະຫາວິທະຍາໄລແຫ່ງຊາດ ໄດ້ມີຄວາມເຫັນວ່າ: ຄວາມຮູ້ຈະໄດ້
ຕິດຕົວໄປຢ່າງບໍ່ມີຈາງຫາຍ ຖ້າເປັນດອກໄມ້ອາດຈະງາມແລ້ວກໍຫ່ຽວແຫ້ງໄປ ແຕ່ໃນແງ່ວິຊາການຍິ່ງຝຶກຝົນຍິ່ງໃຊ້
ເທົ່າໃດກໍຍິ່ງຄົມແຫຼມຂຶ້ນ, ການໄດ້ຮັບໃບປະກາດວິຊາຊີບໃນເທື່ອນີ້ແມ່ນການຢັ້ງຢືນ ເຖິງຜົນການຄົ້ນຄວ້າສຶກສາ
ແຕ່ໝາກຜົນຕົວຈິງແມ່ນຂຶ້ນຢູ່ກັບຜົນການຈັດຕັ້ງປະຕິບັດຕົວຈິງ, ການຝຶກອົບຮົມໃນຄັ້ງນີ້ແມ່ນແຮງໜຶ່ງທີ່ສຳ
ຄັນທີ່ເຮັດໃຫ້ບໍລິສັດ, ຫົວໜ່ວຍທຸລະກິດຮັບຮູ້ເຂົ້າໃຈການຊື້ - ຂາຍ ແລະ ເຂົ້າເຖິງຕະຫຼາດຫຼັກຊັບຫຼາຍຂຶ້ນ ຊຶ່ງສະ
ແດງເຖິງການກ້າວເຂົ້າລະບົບຂອງຄວາມເປັນມືອາຊີບ ແລະ ການກ້າວສູ່ລະບົບຂອງການດຳເນີນການໃນຕະຫຼາດ
ຫຼັກຊັບ ໄປແລ້ວໃນຕໍ່ໜ້າຈະໄດ້ຮັບການພັດທະນາຢ່າງບໍ່ຢຸດຢັ້ງ.
ແຫຼ່ງຂ່າວ: ໜັງສືພິມເສດຖະກິດ – ສັງຄົມ