ສຳນັກຂ່າວເອເອບພີ ລາຍງານວ່າ ໃນຕອນເຊົ້າຂອງວັນທີ 3 ພະຈິກທີ່ຜ່ານມານີ້ ກອງທັບອາກາດສະຫະລັດອາເມຣິກາ ໃນນາມກອງກຳລັງນາໂຕ້ ທີ່ເຂົ້າຄວບຄຸມສະຖານະການ ຢູ່ປະເທດອັບການິສະຖານ ໄດ້ທຳການໂຈມຕີທາງອາກາດ ໃສ່ແຂວງຄຸນດຸສ ທາງພາກເໜືອຂອງອັບການິສະຖານ ສົ່ງຜົນເຮັດໃຫ້ມີພົນລະເຮືອນຜູ້ບໍລິສຸດ ເສຍຊີວິດຢ່າງໜ້ອຍ 30 ຄົນ ຈາກປະຕິບັດການທີ່ອ້າງວ່າ ເພື່ອທຳການແກ້ແຄ້ນ ກໍລະນີກຸ່ມນັກຮົບຕໍລີບັນ ໂຈມຕີທະຫານອາເມຣິກາ ເສຍຊີວິດ 2 ຄົນ ເມື່ອບໍ່ດົນມານີ້.
ທ່ານ ມາມູດ ດານິສ ໂຄສົກປະຈຳແຂວງຄຸນດຸສ ໄດ້ລະບຸວ່າ ພົນລະເຮືອນອັບການິສະຖານ 30 ຄົນ ເສຍຊີວິດໃນປະຕິບັດການຖິ້ມລະເບີດ ແລະ ອີກ 25 ຄົນໄດ້ຮັບບາດເຈັບ ໂດຍໃນບັນດາຜູ້ເສຍຊີວິດນັ້ນ ມີເດັກນ້ອຍເກີດໃໝ່ລວມຢູ່ນຳຫລາຍສິບຄົນ ຊຶ່ງເດັກທີ່ນ້ອຍກວ່າໝູ່ ແມ່ນມີອາຍຸພຽງແຕ່ 3 ເດືອນເທົ່ານັ້ນ, ພວກເຂົາກຳລັງນອນຫລັບຢູ່ໃນເຮືອນ ຕອນທີ່ຖືກໂຈມຕີໂດຍທະຫານພັນທະມິດນາໂຕ້.
ປະຕິບັດການໂຈມຕີດັ່ງກ່າວນີ້ ໄດ້ກະຕຸ້ນເຮັດໃຫ້ເກີດມີການປະທ້ວງ ດ້ວຍຄວາມຄຽດແຄ້ນ ຢູ່ເມືອງເອກຂອງແຂວງຄຸນດຸສ ຊຶ່ງບັນດາຍາດພີ່ນ້ອງ ໄດ້ພາກັນນຳເອົາສົບຂອງເດັກນ້ອຍທີ່ເສຍຊີວິດ ຂຶ້ນໃສ່ລົດກະບະແຫ່ໄປຕາມຖະໜົນສາຍຕ່າງໆທົ່ວເມືອງ. ທ່ານ ທາຊາ ກຸນ ອາຍຸ 55 ປີ ໜຶ່ງໃນຈຳນວນຜູ້ໂຮມຊຸມນຸມປະທ້ວງ ໄດ້ນຳເອົາສົບສະມາຊິກຄອບຄົວ 7 ຄົນ ໃສ່ລົດ 3 ລໍ້ ມາປະທ້ວງຕໍ່ໜ້າສຳນັກງານເຈົ້າແຂວງຄຸນດຸສ ໄດ້ເວົ້າດ້ວຍຄວາມຄຽດແຄ້ນວ່າ ” ຫົວໃຈຂ້ອຍແຫລະສະຫລາຍ ຂ້ອຍຢາກຮູ້ວ່າ ເປັນຫຍັງເດັກນ້ອຍຜູ້ບໍລິສຸດເຫລົ່ານີ້ຕ້ອງຖືກສັງຫານ, ແລ້ວຢູ່ໃສພວກຕໍລີບັນ ບໍ່ເຫັນມີເລີຍ ມີແຕ່ເດັກນ້ອຍຜູ້ບໍລິສຸດ ທີ່ໄຮ້ດຽງສາເທົ່ານັ້ນ! ”
ດ້ານກຸ່ມນາໂຕ້ ໄດ້ມີຖ້ອຍຖະແຫລງສັ້ນໆຜ່ານທາງທະວິດເຕີ້ ອອກມາຍອມຮັບວ່າ ກອງກຳລັງສະຫະລັດອາເມຣິກາ ເປັນຜູ້ຢູ່ເບື້ອງຫລັງເຫດໂຈມຕີທາງອາກາດດັ່ງກ່າວ ໂດຍລະບຸວ່າ ປະຕິບັດການທາງອາກາດໃນເມືອງຄຸນດຸສ ມີຂຶ້ນເພື່ອປົກປ້ອງ ກອງກຳລັງມິດສະຫາຍທີ່ຖືກໂຈມຕີ ໂດຍທຸກຂໍ້ກ່າວອ້າງກ່ຽວກັບການເສຍຊີວິດຂອງພົນລະເຮືອນ ຈະມີການສືບສວນ.
ສ່ວນທ່ານ ແອັດ ຄາເຕີ້ ລັດຖະມົນຕີກະຊວງປ້ອງກັນປະເທດ ສະຫະລັດອາເມຣິກາ ໄດ້ອອກມາສະແດງຄວາມເສຍໃຈ ຕໍ່ກັບການສູນເສຍກຳລັງພົນຂອງຕົນ ທີ່ຖືກກຸ່ມຕໍລີບັນສັງຫານ ໂດຍບໍ່ໄດ້ເວົ້າເຖິງປະຊາຊົນຊາວອັບການິສະຖານ ຜູ້ເຄາະຮ້າຍຈາກການຖິ້ມລະເບີດຂອງຕົນແຕ່ຢ່າງໃດ.
ຕິດຕາມເຮົາທາງFacebook ກົດຖືກໃຈເລີຍ!