ສຳນັກຂ່າວຕ່າງປະເທດ ລາຍງານໃນວັນທີ 31 ຕຸລາຜ່ານມານີ້ວ່າ ບັ້ນຮົບປົດປ່ອຍເມືອງໂມຊູນຂອງອີຣັກ ກຳລັງດຳເນີນໄປຢ່າງດຸເດືອດ ໂດຍໃນມື້ວັນຈັນທີ 31 ຕຸລາຜ່ານມານີ້ ກອງທະຫານຕີພິເສດອີຣັກ CTS ໄດ້ບຸກໂຈມຕີເຂົ້າຍຶດຄືນພື້ນທີ່ ເຂດຊານເມືອງດ້ານຕາເວັນອອກ ຂອງເມືອງໂມຊູນ ເພື່ອເປີດທາງໃຫ້ແກ່ກອງທັບອີຣັກເຂົ້າຕີປະສານ, ດ້ານກອງກຳລັງຂອງຊາວເຄີດ ກໍໄດ້ເຂົ້າຍຶດພື້ນທີ່ດ້ານທິດເໜືອໄດ້ເພີ່ມເຕີມ, ສ່ວນກອງກຳລັງຕິດອາວຸດຊາວຊີອະ ກໍໄດ້ເລີ່ມຕົ້ນປະຕິບັດການ ຕັດເສັ້ນທາງເຊື່ອມຕໍ່ລະຫວ່າງເມືອງໂມຊູນ ກັບຊາຍແດນປະເທດຊີຣີ ເປັນທີ່ຮຽບຮ້ອຍແລ້ວ ນັບຕັ້ງແຕ່ວັນເສົາທີ 29 ຕຸລາຜ່ານມາ.

ການສູ້ຮົບໃນຕອນເຊົ້າຂອງວັນຈັນທີ 31 ຕຸລາຜ່ານມານີ້ ກອງທະຫານຕີພິເສດອີຣັກ CTS ໄດ້ບຸກໂຈມຕີດ້ວຍລົດຕັງ ແລະ ລົດຍານເກາະ ພ້ອມທັງລະດົມຍິງປືນໃຫຍ່ ໃນຂະນະເຄື່ອນທີ່ເຂົ້າໂຈມຕີ ບ້ານບາຊາຢາຂອງເມືອງໂມຊູນ ຄວບຄູ່ກັບການໂຈມຕີທາງອາກາດ ໂດຍກອງກຳລັງພັນທະມິດ ນຳໂດຍສະຫະລັດອາເມຣິກາ ໃສ່ເປົ້າໝາຍກຸ່ມນັກຮົບລັດອິດສະລາມ ຫລື ໄອເອັສ ທີ່ຍຶດຄອງພື້ນທີ່ບໍລິເວນດັ່ງກ່າວ.

ໃນເວລາດຽວກັນນີ້ ກອງທັບອີຣັກກໍໄດ້ອອກມາຖະແຫລງວ່າ ກອງພົນທີ 9 ຂອງຕົນ ໄດ້ເຄື່ອນທັບມຸ່ງໜ້າສູ່ເມືອງໂມຊູນ ໂດຍໃນໄລຍະນີ້ ຢູ່ຫ່າງຈາກຊາຍແດນເມືອງທາງຕາເວັນອອກ ປະມານ 5 ກິໂລແມັດ ຊຶ່ງເປັນການເລີ່ມຕົ້ນ ປະຕິບັດການໂຈມຕີປົດປ່ອຍເມືອງໂມຊູນທາງຝັ່ງຊ້າຍ ໂດຍສະຖານີໂທລະພາບຂອງລັດຖະບານອີຣັກ ໄດ້ຂະໜານນາມໃຫ້ແກ່ປະຕິບັດການຄັ້ງນີ້ວ່າ ບັ້ນຮົບກຽດຕິຍົດ ເພື່ອປົດປ່ອຍເມືອງໂມຊູນ ເມືອງໃຫຍ່ອັນດັບສອງຂອງປະເທດ ອອກຈາກການຍຶດຄອງຂອງກຸ່ມໄອເອັສ ທີ່ບຸກເຂົ້າມາຍຶດພື້ນທີ່ຂອງປະເທດອີຣັກ ນັບຕັ້ງແຕ່ກາງປີ 2014 ເປັນຕົ້ນມາ.

 
ຕິດຕາມເຮົາທາງFacebook ກົດຖືກໃຈເລີຍ!