ທ່ານ ສຸດໃຈ ອິນທະວົງ ຮອງຫົວໜ້າດ່ານ ພາສີສາກົນຂົວມິດຕະພາບ 1 ລາຍງານໃນວັນທີ 26 ຕຸລາ 2016 ໃນໂອກາດທີ່ທ່ານ ບຸນໂຈມ ອຸບົນປະເສີດ ຮອງລັດຖະມົນຕີ ກະຊວງການເງິນ, ທ່ານ ບຸນປະເສີດ ສີກຸນລະບຸດ ຮັກສາການຫົວໜ້າກົມພາສີ, ພ້ອມດ້ວຍຄະນະ ໄດ້ລົງຕິດກວດກາຄວາມພ້ອມ, ການເກັບອາກອນມູນຄ່າເພີ່ມ 10% ວ່າ: ດ່ານພາສີສາກົນຂົວມິດຕະພາບ ໄດ້ສົມກັບພາກສ່ວນກ່ຽວຂ້ອງ ໂດຍສະເພາະທາງ ທະນາຄານການຄ້າຕ່າງປະເທດລາວມະຫາຊົນ (BCEL) ພັດທະນາລະບົບຊໍາລະອາກອນ (SmartVat) ໃຫ້ບໍລິການການແຈ້ງຊໍາລະປະກອບມີ 3 ຂັ້ນຕອນ ຄື: ຜ່ານລະບົບມືຖື, ຜ່ານລະບົບ BCELOne, ຜ່ານຟອມໃບແຈ້ງ.
ມາຮອດປັດຈຸບັນ ການຈັດເກັບອາກອນມູນຄ່າເພີ່ມແມ່ນມີຄວາມພ້ອມເກືອບ100% ເຊັ່ນ: ດ້ານພື້ນຖານໂຄງລ່າງໄດ້ປັບປຸງ, ຂະຫຍາຍຊ່ອງເລນລົດສ່ວນຕົວ ຂາເຂົ້າຈາກ 5 ຊ່ອງເປັນ 8 ຊ່ອງ, ພັດທະນາລະບົບ ເອເລັກໂຕຣນິກ ຮ່ວມກັບທະນາຄານການຄ້າ ຕ່າງປະເທດ ເພື່ອໃຊ້ໃນການແຈ້ງ ຂໍ້ມູນເຄື່ອງຂອງທີ່ນຳເຂົ້າ ການຊຳລະຄ່າອາກອນ ດ້ວຍບັດ SmartVat, ສ້າງຄູ່ມືໃຫ້ຄຳແນະນຳ ໃນການແຈ້ງເສຍອາກອນມູນຄ່າເພີ່ມ 10% ເຄື່ອງຂອງຕິດ ຕົວຜູ້ໂດຍສານ ພ້ອມທັງຝຶກອົບຮົມ ເຈົ້າໜ້າທີ່ພາສີຜູ້ປະຕິບັດງານຕົວຈິງ ໃຫ້ມີຄວາມຊຳນິຊຳນານງານ ແລະ ໃນວັນທີ 1 ພະຈິກ 2016 ຈະໄດ້ເລີ່ມຈັດຕັ້ງປະຕິບັດ ເປັນທາງການ.
ໂອກາດນີ້, ທ່ານ ບຸນໂຈມ ອຸບົນປະເສີດ ຮອງລັດຖະມົນຕີ ກະຊວງການເງິນ ໄດ້ເນັ້ນໃຫ້ພະນັກງານ ພາສີ, ພາກສ່ວນທີ່ກ່ຽວຂ້ອງ ໃນການຈັດຕັ້ງປະຕິບັດຢ່າງເຂັ້ມງວດ, ການໃຫ້ຄຳແນະນຳແກ່ປະຊາຊົນ ໃນການແຈ້ງອາກອນມູນຄ່າເພີ່ມ ຢ່າງຖືກຕ້ອງ, ຮັບປະກັນຄວາມປອດໄພ, ວ່ອງໄວທັນການ, ການລະບາຍລົດ ບໍ່ໃຫ້ແອອັດໂດຍສະເພາະ ວັນເສົາ-ອາທິດ ຈຳນວນຜູ້ໂດຍສານ ແລະ ພາຫະນະຂອງ ສປປ ລາວ ທີ່ເດີນທາງ ຜ່ານດ່ານຂົວມິດຕະພາບຫລາຍຮ້ອຍຄັນຕໍ່ວັນ.
ສະນັ້ນ, ຈຶ່ງຮຽກຮ້ອງ ມາຍັງທຸກຄົນທີ່ເດີນທາງອອກ-ເຂົ້າ ຜ່ານດ່ານຂົວມິດຕະພາບ 1 ຈົ່ງຍົກສູງສະຕິ ໃນການປະຕິບັດກົດໝາຍ ແລະ ລະບຽບການຂອງ ສປປ ລາວ, ໃຫ້ການຮ່ວມມື ກັບເຈົ້າໜ້າທີ່ປະຈຳດ່ານ ໃນການແຈ້ງຂໍ້ມູນເຄື່ອງຂອງ ທີ່ນໍາເຂົ້າມາໃຫ້ຖືກຕ້ອງ ຄົບຖ້ວນຕາມຕົວຈິງ, ແນໃສ່ຍົກສູງສະຕິ ໃນການຈັດຕັ້ງປະຕິບັດກົດໝາຍ ໃຫ້ສູງຂຶ້ນ, ພ້ອມທັງເປັນການ ສົ່ງເສີມການລົງທຶນ, ການຈັບຈ່າຍຊື້ຂາຍສິນຄ້າ ພາຍໃນໃຫ້ຫລາຍຂຶ້ນ ແລະ ຈັດເກັບບັນດາແຫລ່ງ ລາຍຮັບເຂົ້າງົບປະມານແຫ່ງລັດ.
ຂໍ້ມູນຈາກ: ສຳນັກຂ່າວສານປະເທດລາວ
ຕິດຕາມຂ່າວເສດຖະກິດລາວ ກົດໄລຄ໌ເລີຍ!