ວັນທີ 28 ຕຸລາ ປີ 1999 ຫຼືມື້ນີ້ເມື່ອ 17 ປີທີ່ແລ້ວ ເປັນມື້ວາງຈຳໜ່າຍຂອງເກມ Silent Bomber ເທິງເຄື່ອງ PS1 ທີ່ປະເທດຍີ່ປຸ່ນ. ໂດຍເກມນີ້ເປັນແນວແອັກຊັ່ນທີ່ມີຮູບແບບຄ້າຍກັບເກມອາເຂດທົ່ວໄປ ພ້ອມມຸມກ້ອງແບບ Bird-eye View ແຕ່ວ່າຈະມີຮູບແບບການຕໍ່ສູ້ທີ່ແຕກຕ່າງຈາກເກມອື່ນໆ ເນື່ອງຈາກພະເອກຂອງເກມນີ້ຈະບໍ່ໃຊ້ອາວຸດປະເພດປືນ ແຕ່ຈະເປັນການວາງລະເບີດເພື່ອສັງຫານສັດຕູແບບມີລັດສະໝີທຳລາຍທີ່ກິນບໍລິເວນກວ້າງແທນ.
ພລ໋ອດຂອງເກມນີ້ຈະກ່າວເຖິງ ຈູຕ້າ ເຟດ (Jutah Fate) ອາຊະຍາກອນສົງຄາມທີ່ຖືກບັງຄັບເກນເຂົ້າມາຮ່ວມປະຕິບັດພາລະກິດແຊກຊຶມຂອງກອງທັບ ໂດຍເປົ້າໝາຍພາລະກິດດັ່ງກ່າວຄືທຳລາຍຖານທັບເທິງອະວະກາດທີ່ຊື່ວ່າ: ດັນເຕ້ (Dante) ເຊິ່ງເປັນໄພຕໍ່ຄວາມໝັ້ນຄົງຂອງມວນມະນຸດ ເຊິ່ງຜູ້ຮ່ວມພາລະກິດດຽວກັບຈູຕ້າກໍຈະມີທັງບຸກຄົນທີ່ເປັນອາຊະຍາກຳໃນດ້ານຕ່າງໆ ບໍ່ວ່າຈະເປັນດ້ານການເມືອງ, ຄວາມໝັ້ນຄົງ ແລະອື່ນໆ. ແຕ່ວ່າພໍທຸກຄົນລັກລອບບຸກເຂົ້າມາເຖິງຖານທັບດັນເຕ້ ຍານຂອງພວກຈູຕ້າກໍຖືກຍິງຈົນຕົກລົງໄປກ່ອນ ໂດຍທີ່ຈູຕ້າຖືກແຍກກຸ່ມອອກຈາກໝູ່ຮ່ວມທີມ ລາວຈຶ່ງຕ້ອງປະຕິບັດພາລະກິດພຽງຄົນດຽວພ້ອມທັງຊອກຫາສະມາຊິກໃນທີມທີ່ເຫຼືອໄປນຳ.
ເກມ Silent Bomber ຜູ້ຫຼິ້ນຈະໄດ້ຮັບບົດເປັນ ຈູຕ້າ ຜູ້ຊ່ຽວຊານດ້ານການວາງລະເບີດ ຫຼືຫາກບອກໃຫ້ເຂົ້າໃຈງ່າຍຂຶ້ນກໍຄື: ເກມນີ້ຈະມີສະຕາຍຄ້າຍກັບ Bomberman ພາກທີ່ເປັນເກມແອັກຊັ່ນ. ນອກຈາກນີ້ ຈູຕ້າຍັງສາມາດປະສົມລະເບີດເພື່ອເຮັດລະເບີດພິເສດອີກຫຼາກຫຼາຍໄວ້ຈັດການສັດຕູໄດ້ອີກນຳ.
Fact ເລັກນ້ອຍກ່ຽວກັບເກມ Silent Bomber
- ຖ້າຜູ້ຫຼິ້ນສາມາດເຄລຍທຸກສາກໂດຍໄດ້ Rank B ຂຶ້ນໄປ ຈະສາມາດປົດລ໋ອກໂຕລະຄອນເມີຄິວຣີ້ (Mercury) ມາໃຊ້ໃນໂໝດ VR Arena ໄດ້, ນອກຈາກນີ້ຖ້າເຄລຍທຸກສາກໄດ້ Rank A ຂຶ້ນໄປ ກໍຈະສາມາດປົດລ໋ອກໂຕລະຄອນເບີນົວ (Benoit) ແລະຖ້າເຄລຍທຸກສາກດ້ວຍ Rank S ກໍຈະປົດລ໋ອກເນໂກະ ແທງ (Neko Tank) ມາໃຊ້ໄດ້.
- ບໍລິສັດ CyberConnect ທີ່ພັດທະນາເກມນີ້ ຫາກເວົ້າຊື່ຂຶ້ນມາຄົງບໍ່ມີໃຜຄຸ້ນເຄີຍແນ່ນອນ ແຕ່ຖ້າບອກວ່າທີມນີ້ເປັນທີມດຽວກັບທີ່ເຮັດເກມຊີຣີ Naruto Shippuden ແລະ .hack ຄົງຕ້ອງຮ້ອງອໍຂຶ້ນມາເລີຍ
ແລະບໍລິສັດນີ້ຍັງໄດ້ຮ່ວມມືກັບ Square Enix ໃນການພັດທະນາເກມ Final Fantasy VII Remake ອີກນຳ.
ສຳລັບທ່ານໃດທີ່ຮັກໃນການອ່ານຂ່າວໄອທີ, ເກມ ແລະ ອະນິເມະ ສາມາດຕິດຕາມໄດ້ທີ່ນີ້ ກົດຖືກໃຈເລີຍ!
ທີ່ມາ: online station