ປະຊາຊົນສົ່ງສາຍດ່ວນເຖິງສະພາ ຈົ່ມບັນຫາເງິນຄ່າມັນຕົ້ນຈາກ ບໍລິສັດ ລາວອິນໂດໄຊນາ ກຣຸບມະຫາຊົນ
ທີ່ຍັງຄ້າງຊຳລະແກ່ຍາວມາດົນ ຊາວສວນຫ່ວງຕະຫຼາດຈຳໜ່າຍຫາກຍັງປູກພືດຊະນິດນີ້, ສ່ວນພາກລັດຮັບ
ຮອງກຸ່ມຜູ້ຜະລິດຈະໄດ້ເງິນຄົບຕາມຕົວຈິງ ເຊື່ອບໍລິສັດພວມຫາທາງແກ້ເວລານີ້ຂໍໃຫ້ອົດທົນ.
ກາຍເປັນໜຶ່ງໃນຫຼາຍປະເດັນພົ້ນເດັ່ນທີ່ປະຊາຊົນສ່ອງແສງຫາສະພາແຫ່ງຊາດ ຜ່ານສາຍດ່ວນໃນໄລຍະດຳ
ເນີນກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດຊຸດທີ VII ກ່ຽວກັບການຊຳລະເງິນຄ່າຜົນຜະ
ລິດແກ່ຊາວກະສິກອນຜູ້ປູກມັນຕົ້ນ ຂອງບໍລິສັດລາວອິນໂດໄຊນາທີ່ຊັກຊ້າແກ່ຍາວຈິ່ງຂໍໃຫ້ລັດຊ່ວຍແກ້ ໄຂ.
ຕໍ່ປະເດັນດັ່ງກ່າວ ທ່ານ ເຫຼື່ອມ ຍົງວົງສິດທິ ຫົວໜ້າກົມການຄ້າພາຍໃນ ໄດ້ຕາງໜ້າໃຫ້ກະຊວງອຸດສາຫະກຳ
ແລະ ການຄ້າ ເພື່ອໃຫ້ຄຳຕອບແກ່ຜູ້ຊັກຖາມມາ ໂດຍທ່ານກ່າວຕໍ່ສື່ມວນຊົນມື້ວານນີ້ວ່າ: ບໍລິສັດລາວອິນໂດ
ໄຊນາ ຜ່ານມາກະຊວງອຸດສາຫະກຳ ແລະ ການຄ້າແມ່ນໄດ້ເຮັດໜ້າທີ່ຄຸ້ມຄອງໂຮງງານດັ່ງກ່າວໃຫ້ເປັນໄປຕາມ
ນະໂຍບາຍຂອງລັດຖະບານໃນການສົ່ງເສີມການຜະລິດເປັນສິນຄ້າ, ໄດ້ຈັດຕັ້ງກຸ່ມຜະລິດວັດຖຸດິບ (ມັນຕົ້ນ)
ເພື່ອຜະລິດ ແລະ ຕອບສະໜອງໃຫ້ໂຮງງານດັ່ງກ່າວຢ່າງມີຜົນສຳເລັດ, ປະຊາຊົນກໍມີວຽກເຮັດງານທຳ(ປູກ
ມັນຕົ້ນ) ເພື່ອຫຼຸດພົ້ນອອກຈາກຄວາມທຸກຍາກໄດ້ຫຼາຍສົມຄວນ, ພ້ອມດຽວກັນຍັງໄດ້ຄວບຄຸມ, ຄຸ້ມຄອງດ້ານ
ສະພາບແວດລ້ອມໃຫ້ໂຮງງານເປັນຢ່າງດີ ປະຈຸບັນໂຮງງານລາວອິນໂດໄຊນາໄດ້ມີລະບົບບຳບັດນ້ຳເສຍກ່ອນ
ປ່ອຍລົງໄປສູ່ທຳມະຊາດ, ມີລະບົບຜະລິດພະລັງງານຈາກສິ່ງເສດເຫຼືອ ຫຼື ໄບໂອເກສ ແລະ ອື່ນໆ.
ຕິດພັນກັບປັດໄຈພື້ນຖານເຫຼົ່ານັ້ນ ໂຮງງານລາວອິນໂດໄຊນາ ຍັງມີລະບົບເຄື່ອງຈັກທີ່ທັນສະໄໝໄດ້ມາດຖານ
ເພື່ອຜະລິດແປ້ງມັນຕົ້ນຈຳນວນບໍ່ຈຳກັດ ຕອບສະໜອງໃຫ້ໄດ້ຕາມຄວາມຕ້ອງການຂອງຕະຫຼາດທັງພາຍໃນ
ແລະ ຕ່າງປະເທດທີ່ມີຢູ່ຢ່າງກວ້າງຂວາງ ປະຈຸບັນສາມາດສົ່ງອອກໄດ້ຫຼາຍແສນໂຕນຕໍ່ປີ ໂດຍສະເພາະຕະຫຼາດ
ສປ ຈີນ ສະນັ້ນ ຕະຫຼາດຮັບຊື້ແປ້ງຂອງອິນໂດໄຊນາແມ່ນບໍ່ມີບັນຫາ ລວມເຖິງມາດຖານຄຸນນະພາບຂອງການ
ຜະລິດລູກຄ້າກໍໃຫ້ການຕອບຮັບດີ ແລະ ຍອມຮັບໃນຜະລິດຕະພັນ.
ການຊຳລະເງິນທີ່ຫຼ້າຊ້າຂອງລາວອິນໂດໄຊນາ ອາດເກີດຈາກຄວາມຈຳເປັນບາງຢ່າງຂອງບໍລິສັດ ແຕ່ຕາມທັດ
ສະນະສ່ວນຕົວທີ່ໄດ້ປະສານສົມທົບກັບພາກສ່ວນຕ່າງໆ ເຊື່ອວ່າຈະບໍ່ແກ່ຍາວພໍເທົ່າໃດເພາະປະຈຸບັນບໍລິສັດກຳ
ລັງຫາວິທີແກ້ໄຂຢູ່ ສະນັ້ນ ຢືນຢັນວ່າໜີ້ຄ້າງຈ່າຍຈະຕ້ອງໄດ້ຮັບການຊຳລະສະສາງ ຂໍໃຫ້ປະຊາຊົນມີຄວາມໝັ້ນ
ໃຈ ອີກຢ່າງໜຶ່ງ ລາວອິນໂດໄຊນາເປັນບໍລິສັດໃຫຍ່ ທີ່ລົງທຶນຫຼາຍ ແລະ ມີທະບຽນດຳເນີນທຸລະກິດຖືກຕ້ອງຕາມ
ກົດໝາຍ ພ້ອມດຽວກັນບໍລິສັດນີ້ຍັງໄດ້ໃຫ້ການຊ່ວຍເຫຼືອສັງຄົມມາໂດຍຕະຫຼອດ ສະນັ້ນ ໃນເວລາບໍລິສັດມີ
ຄວາມຫຍຸ້ງຍາກກໍໃຫ້ປະຊາຊົນເຫັນໃຈ ແລະ ອົດທົນ.
ແຫຼ່ງຂ່າວ: ໜັງສືພິມເສດຖະກິດ – ສັງຄົມ