ງານແຂ່ງຂັນກິລານັກຮຽນມັະທະຍົມສຶກສາທົ່ວແຂວງຫົວພັນ ຄັ້ງທີ 1 ໄດ້ເປີດຂຶ້ນຢ່າງເປັນທາງການໃນວັນທີ 23 ຕຸລາ 2016 ນີ້ຢູ່ທີ່ ສະໜາມກິລາໃຫຍ່ຂອງແຂວງ ໂດຍການເຂົ້າຮ່ວມຂອງ ທ່ານ ພູໂຊນ ທຳມະວິໄຊ ຄະນະປະຈຳພັກແຂວງ, ຮອງເຈົ້າແຂວງຫົວພັນ ຜູ້ຊີ້ນຳວຽກງານຂົງເຂດວັດທະນາທຳ, ສັງຄົມຂັ້ນແຂວງ, ພາຍໃຕ້ການເປັນປະທານຂອງ ທ່ານ ມົນທອງ ລຽນຕິຄຸນ ຫົວໜ້າພະແນກສຶກສາທິການ ແລະ ກິລາແຂວງຫົວພັນ, ມີຫົວໜ້າພະແນກການອ້ອມຂ້າງແຂວງ, ເມືອງ, ຜູ້ອຳນວຍການໂຮງຮຽນອ້ອມຂ້າງແຂວງ, ເມືອງ ພ້ອມດ້ວຍພະນັກງານຄູອາຈານ, ນ້ອງຫຼານນັກຮຽນ, ພໍ່-ແມ່ ປະຊາຊົນບັນດາເຜົ່າ ແລະ ປວງຊົນເຂົ້າຮ່ວມຢ່າງຫຼວງຫຼາຍ ໃນພິທີ ທ່ານ ມົນທອງ ລຽນຕິຄຸນ ປະທານພິທີໄດ້ຂຶ້ນກ່າວເປີດພິທີ ງານແຂ່ງຂັນກິລານັກຮຽນມັດທະຍົມສຶກສາທົ່ວແຂວງຫົວພັນ ຢ່າງເປັນທາງການ ພ້ອມທັງໄດ້ກ່າວວ່າ: ການຈັດງານໃນຄັ້ງນີ້ນັບວ່າເປັນຄັ້ງປະຫວັດສາດທີ່ບໍ່ເຄີຍມີມາກ່ອນສະນັ້ນຈິ່ງໄດ້ຮຽກຮ້ອງມາຍັງຄະນະຮັບຜິດຊອບທຸກພາກສ່ວນຈົ່ງສຸມທຸກສະຕິປັນຍາ, ຄວາມຮູ້ຄວາມສາມາດ ແລະ ກຳລັງແຮງຂອງຕົນເຂົ້າໃສ່ການແຂ່ງຂັນໂດຍປະຕະບັດຕາມກົດລະບຽບ, ກະຕິກາການແຂ່ງຂັນໃຫ້ເຂັ້ມງວດ
ທ່ານ ແສງທອງ ແສງສຸລິນ ຮອງຫົວໜ້າພະແນກສຶກສາທິການ ແລະ ກິລາແຂວງຫົວພັນ ໄດ້ໃຫ້ຮູ້ຕື່ມອີກວ່າ: ການ ຈັດງານແຂ່ງຂັນກິລານັກຮຽນມັດທະຍົມສຶກສາທົ່ວແຂວງຫົວພັນ ຄັ້ງທີ 1 ໃນຄັ້ງນີ້ແມ່ນໄດ້ຈັດຂຶ້ນຢູ່ທີ່ ເມືອງຊຳເໜືອ ແຂວງຫົວພັນ ໂດຍໄດ້ເລີ່ມການແຂ່ງຂັນນັບແຕ່ວັນທີ 19 ຕຸລາ 2016 ເປັນຕົ້ນມາຈົນມາຮອດວັນທີ 23 ຕຸລາ 2016 ຈິ່ງໄດ້ມີພິທີເປີດຢ່າງເປັນທາງການ ແລະ ຈະດຳເນີນໄປເຖິງວັນທີ 30 ຕຸລາ 2016 ຈິ່ງຈະປິດລົງຢ່າງເປັນທາງການ ງານແຂ່ງຂັນກິລານັກຮຽນມັດທະຍົມໃນຄັ້ງນີ້ຈຸດປະສົງແມ່ນເພື່ອເປັນການພັດທະນາຊັບພະ ຍາກອນມະນຸດໃຫ້ໄປຕາມ 3 ລັກສະນະການສຶກສາຂອງພັກ ແລະ 5 ຫຼັກມູນຂອງການສຶກສາ ເວົ້າລວມ, ເວົ້າສະເພາະແມ່ນເຮັດໃຫ້ຮັກຮຽນຫັນມາຫຼິ້ນກິລາເພື່ອເຮັດໃຫ້ມີສຸຂະພາບແຂງແຮງ, ມີຈິດໃຈເບີກບານມ່ວນຊື່ນ, ມີຄວາມສາມັກຄີຮັກແພງກັນ ແລະ ຫ່າງໄກຢາເສບຕິດ, ພ້ອມທັງເປັນການຄັດເລືອກເອົານັກກິລາເຂົ້າມາເປັນທີມຕົວ ແທນຂອງແຂວງຫົວພັນ ເພື່ອເຂົ້າຮ່ວມການແຂ່ງຂັນ ງານມະຫາກຳກິລານັກຮຽນມັດທະຍົມທົ່ວປະເທດ ຄັ້ງທີ 6 ທີ່ແຂວງບໍລິຄຳໄຊ ໃນຕົ້ນເດືອນ ກຸມພາ 2017 ທີ່ຈະມາເຖິງໃນໝໍ້ໆນີ້ ງານແຂ່ງຂັນກິລານັກຮຽນມັດທະຍົມສຶກສາທົ່ວແຂວງຫົວພັນ ຄັ້ງທີ 1 ໃນຄັ້ງນີ້ມີຄະນະນຳ ແລະ ນັກກິລາເຂົ້າຮ່ວມທັງໝົດ 530 ຄົນ, ຍິງ 85 ຄົນ ໂດຍມາ ຈາກ 10 ເມືອງທົ່ວແຂວງ ແລະ ໂຮງຮຽນອ້ອມຂ້າງແຂວງ, ໂດຍໄດ້ກຳນົດເອົາ 7 ປະເພດກິລາ ເພື່ອແຂ່ງຂັນຄື: ບານເຕະ, ແລ່ນ-ລານ, ປິ່ປ່ອງ, ປີກໄກ່, ເປຕັງ, ໜ້າເກັກ ແລະ ໝາກຂ່າງ, ມີ 12 ລາຍການແຂ່ງຂັນ ເຊິ່ງນຳໃຊ້ສະ ໜາມແຂ່ງຂັນຢູ່ 3 ຈຸດ, ຊີງໄຊເອົາຫຼຽນຄຳ ຈຳນວນ 54 ຫຼຽນ, ຫຼຽນເງິນ 54 ຫຼຽນ ແລະ ຫຼຽນທອງ ແດງ 54 ຫຼຽນ
ຂ່າວຈາກ: ພະແນກສຶກສາທິການ ແລະ ກິລາແຂວງຫົວພັນ
ຕິດຕາມຂ່າວເສດຖະກິດລາວ ກົດໄລຄ໌ເລີຍ!