ຫຼັງການ “ຢຸດຍິງເພື່ອມະນຸດສະທຳ” ເປັນເວລາ 3 ວັນກໍໄດ້ເກີດການປະທະກັນຢ່າງດຸເດືອດອີກເທື່ອໜຶ່ງລະຫວ່າງລັດຖະບານຊີຣີແລະຫຼາຍກຸ່ມຕໍ່ຕ້ານລັດຖະ ບານຢູ່ເມືອງ ອາເລັບໂປ ທາງພາກເໜືອຂອງປະເທດດັ່ງກ່າວໃນວັນທີ 22 ຕຸລານີ້.
ສື່ມວນຊົນຊີຣີລາຍງານວ່າ: ການປະທະກັນເທື່ອນີ້ເກີດຂຶ້ນຢູ່ທາງພາກຕາເວັນອອກຂອງເມືອງອາເລັບໂປທີ່ເປັນບໍລິເວນຄວບຄຸມຂອງກຸ່ມຕໍ່ຕ້ານລັດຖະບານແລະກຸ່ມກໍ່ການຮ້າຍ. ແນວໃດກໍດີ, ຈາກການສະໜັບສະໜູນຂອງການໂຈມຕີທາງອາກາດ, ກອງທັບລັດຖະບານຊີຣີໄດ້ຮັບຜົນສຳເລັດໃນການຕໍ່ສູ້ຢູ່ເຂດຊາລາ-ອັດ-ດິນ.
ເຈົ້າໜ້າທີ່ກອງທັບລັດຖະບານຊີຣີທີ່ບໍ່ປະສົງອອກນາມຢືນຢັນວ່າ: ໃນໄລຍະປະຕິບັດການ “ຢຸດຍິງເພື່ອມະນຸດສະທຳ”, ມີພຽງແຕ່ກຸ່ມປະກອບອາວຸດ 7 ຄົນທີ່ຂຶ້ນກັບກຸ່ມຕໍ່ຕ້ານລັດຖະບານ “Ahrar al-Sham” ຍອມຈຳນົນຕໍ່ກອງທັບລັດຖະບານ, ຂະນະທີ່ຍັງມີປະຊາຊົນຈຳນວນບໍ່ຫຼາຍໄດ້ຖອນອອກຈາກບໍລິເວນທາງພາກຕາເວັນອອກຂອງເມືອງອາເລັບໂປ. ແນວໃດກໍດີ, ກອງທັບຊີຣີກໍໄດ້ກ່າວປະນາມກຸ່ມກໍ່ການຮ້າຍເປັນຕົ້ນ “Jabhat Fateh al-Sham” ແລະອື່ນໆທີ່ມີເຈດຕະນາທຳລາຍການຢຸດຍິງເທື່ອນີ້ເພື່ອກີດຂວາງປະຊາຊົນຖອນອອກຈາກບໍລິເວນດັ່ງກ່າວ.
ຂ່າວຈາກ: ສຳນັກຂ່າວເອບີຊີ
ຕິດຕາມຂ່າວເສດຖະກິດລາວ ກົດໄລຄ໌ເລີຍ!