ສຳນັກຂ່າວຕ່າງປະເທດ ລາຍງານໃນວັນທີ 20 ຕຸລານີ້ວ່າ ຕອນຄ່ຳຂອງມື້ວັນພຸດທີ 19 ຕຸລາຜ່ານມານີ້ ເກີດເຫດເຮລິຄອບເຕີ້ທະຫານ Mi-171 ຂອງກອງທັບອຸເບກິສຖານ ຕົກໃນເຂດເຟີການາ ທາງພາກຕາເວັນອອກຂອງປະເທດ ສົ່ງຜົນເຮັດໃຫ້ມີຜູ້ເສຍຊີວິດລວມທັງໝົດ 9 ຄົນ ຊຶ່ງໃນນີ້ປະກອບມີ ທະຫານກອງທັບອຸເບກິສຖານ 6 ຄົນ ແລະ ລູກເຮືອປະຈຳເຮລິຄອບເຕີ້ລຳດັ່ງກ່າວອີກ 3 ຄົນ.
ກະຊວງປ້ອງກັນປະເທດອຸເບກິສຖານ ໄດ້ອອກມາລະບຸວ່າ ປັດຈຸບັນທາງກະຊວງ ໄດ້ແຕ່ງຕັ້ງຄະນະກຳມະການສະເພາະກິດ ເພື່ອສືບສວນອຸບັດເຫດດັ່ງກ່າວນີ້ແລ້ວ ແຕ່ໃນເບື້ອງຕົ້ນຄາດວ່າ ອາດເກີດຈາກບັນຫາທາງດ້ານເຕັກນິກ ຊຶ່ງເປັນຕົ້ນຕໍນຳໄປສູ່ເຫດໂສກນາຕະກຳໃນຄັ້ງນີ້.
ທັງນີ້ ເຮລິຄອບເຕີ້ທະຫານລຸ້ນ Mi-171 ຜະລິດຂຶ້ນໂດຍປະເທດຣັດເຊຍ ຊຶ່ງຖືກຊື້ເຂົ້າປະຈຳການໃນກອງທັບຕ່າງໆທົ່ວໂລກ ຫລາຍກວ່າ 50 ປະເທດ ໃນປັດຈຸບັນ.
ຕິດຕາມເຮົາທາງFacebook ກົດຖືກໃຈເລີຍ!