ສຳນັກຂ່າວຕ່າງປະເທດ ລາຍງານໃນວັນທີ 17 ຕຸລາຜ່ານມານີ້ວ່າ ເກີດການປະທະກັນລະຫວ່າງນັກໂທດສອງຝ່າຍ ຢູ່ຄ້າຍຄຸມຂັງແຫ່ງໜຶ່ງ ໃນເມືອງເບົາວິສຕ້າ ລັດໂຣໄຣມາ ທາງພາກເໜືອຂອງປະເທດບຣາຊິນ ສົ່ງຜົນເຮັດໃຫ້ມີນັກໂທດເສຍຊີວິດ ຢ່າງໜ້ອຍ 25 ຄົນ ໂດຍໃນນັ້ນມີ 7 ຄົນຖືກຂ້າຕັດຄໍ ແລະ ອີກ 6 ຄົນຖືກໄຟໄໝ້ຈົນເສຍຊີວິດ.

ທ່ານ ອູເຊນ ຄາສໂຕຣ ລັດຖະມົນຕີກະຊວງຍຸຕິທຳຂອງລັດໂຣໄຣມາ ໄດ້ລະບຸວ່າ ການຕໍ່ສູ້ກັນເກີດຂຶ້ນ ໃນໄລຍະເວລາທີ່ອະນຸຍາດໃຫ້ເຂົ້າຢ້ຽມນັກໂທດ ເຮັດໃຫ້ມີຍາດພີ່ນ້ອງຂອງນັກໂທດປະມານ 100​ ຄົນ ຖືກຈັບເປັນຕົວປະກັນ ໂດຍຜູ້ກໍ່ເຫດຈະລາຈົນຄັ້ງນີ້ ຕ້ອງການໃຫ້ຜູ້ພິພາກສາ ເຂົ້າມາຮັບຟັງຂໍ້ຮຽກຮ້ອງຂອງພວກເຂົາ, ແຕ່ເຈົ້າໜ້າທີ່ຕຳຫລວດຕີພິເສດ ໄດ້ຖືກສົ່ງເຂົ້າໄປປາບປາມ ແລ້ວຊ່ວຍເຫລືອຕົວປະກັນອອກມາໄດ້ ຊຶ່ງສາມາດຄວບຄຸມສະຖານະການໄດ້ທັງໝົດ ໃນຕອນຫົວຄ່ຳຂອງມື້ດຽວກັນ.
 

ຕິດຕາມເຮົາທາງFacebook ກົດຖືກໃຈເລີຍ!