ສຳນັກຂ່າວຕ່າງປະເທດ ລາຍງານໃນວັນທີ 17 ຕຸລາຜ່ານມານີ້ວ່າ ຫວຽດນາມກຳລັງປະສົບກັບໄພນ້ຳຖ້ວມຢ່າງໜັກ ໃນເຂດພາກກາງຂອງປະເທດ ໂດຍສຳນັກງານປ້ອງກັນໄພພິບັດທາງທຳມະຊາດ ໄດ້ອອກມາລະບຸວ່າ ມີຜູ້ເສຍຊີວິດແລ້ວຢ່າງໜ້ອຍ 25 ຄົນ ແລະ ມີຜູ້ສູນຫາຍ 4 ຄົນ ຫລັງຈາກເກີດເຫດນ້ຳຖ້ວມ, ສ່ວນເຮືອນຊານຂອງປະຊາຊົນ ໄດ້ຮັບຄວາມເສຍຫາຍ ຫລື ຖືກທຳລາຍໄປແລ້ວ ຫລາຍກວ່າ 240,000 ຫລັງ ໃນຫລາຍແຂວງທາງພາກກາງຂອງປະເທດ ນັບຕັ້ງແຕ່ວັນສຸກທີ 14 ຕຸລາເປັນຕົ້ນມາ.
ໃນຂະນະດຽວກັນນີ້ ພາຍຸໄຕ້ຝຸ່ນສາຣິກາ (Sarika) ທີ່ກຳລັງພັດຖະຫລົ່ມຟິລິບປິນ ໃນທ້າຍອາທິດທີ່ຜ່ານມາ ກໍກຳລັງເຄື່ອນທິດເຂົ້າສູ່ຫວຽດນາມ ຊຶ່ງຄາດວ່າຈະເຂົ້າຊາຍຝັ່ງຫລາຍແຂວງພາກເໜືອ ໃນວັນພຸດທີ 19 ຕຸລານີ້ ຊຶ່ງເປັນເຂດທີ່ມີຄວາມສ່ຽງສູງ ໂດຍນັກພະຍາກອນອາກາດໄດ້ຄາດການວ່າ ໄຕ້ຝຸ່ນສາຣິກາ ຈະເປັນພາຍຸຫົວໃຫຍ່ທີ່ສຸດໃນລະດູນີ້, ຂະນະທີ່ທາງການຫວຽດນາມ ອາດອອກຄຳສັ່ງອົບພະຍົບປະຊາຊົນ ແລະ ຫ້າມເຮືອອອກທະເລ.
ຕິດຕາມເຮົາທາງFacebook ກົດຖືກໃຈເລີຍ!