ທົດສະພິດລາຊະທຳ ຫຼື ລາຊະທຳ 10 ຄື ຈະລິຍະວັດ 10 ປະການທີ່ພະເຈົ້າແຜ່ນດິນປະພຶດປະຕິບັດເປັນຫຼັກທຳປະຈຳໃຈ ຫຼືເປັນຄຸນນະທຳປະຈຳໂຕຂອງຜູ້ປົກຄອງບ້ານເມືອງ ໃຫ້ມີຄວາມເປັນໄປໂດຍທຳແລະນຳປະໂຫຍດສຸກໃຫ້ເກີດແກ່ປະຊາຊົນຈົນເກີດຄວາມຊື່ນຊົມຍິນດີ ເຊິ່ງຄວາມຈິງແລ້ວບໍ່ໄດ້ຈຳແນກສະເພາະເຈາະຈົງພຽງແຕ່ພະເຈົ້າແຜ່ນດິນຫຼືຜູ້ປົກຄອງແຜ່ນດິນເທົ່ານັ້ນ ບຸກຄົນທຳມະດາທີ່ເປັນຜູ້ບໍລິຫານລະດັບສູງໃນທຸກອົງກອນກໍຄວນໃຊ້ຫຼັກທຳນີ້ເຊັ່ນກັນ ດັ່ງນັ້ນ, ມື້ນີ້ລາວໂພສຕ໌ ຈຶ່ງຂໍນຳສະເໜີທຳ 10 ປະການດັ່ງກ່າວສູ່ທ່ານຜູ້ອ່ານດັ່ງນີ້:
- ທານ ຄື ການໃຫ້
- ສິນ ຄື ຄວາມປະພຶດທີ່ດີງາມ ທັງກາຍ ວາຈາ ແລະໃຈ
- ບໍລິຈາກ ຄື ການເສຍສະຫຼະຄວາມສຸກສ່ວນຕົວເພື່ອຄວາມສຸກສ່ວນລວມ
- ຄວາມຊື່ສັດ ຄື ການສຸຈະລິດຕໍ່ໜ້າທີ່ວຽກງານຂອງຕົນ ຕໍ່ມິດສະຫາຍ ຕໍ່ອົງການຈັດຕັ້ງ ຫຼືຫຼັກການຂອງຕົນ
- ຄວາມອ່ອນໂຍນ ຄື ການມີອັດທະຍາໄສອ່ອນໂຍນ
- ຄວາມພຽນ ຄື ຄວາມພາກພຽນພະຍາຍາມ
- ຄວາມບໍ່ໃຈຮ້າຍ ຄື ການບໍ່ສະແດງອາການຮ້າຍດ່າ
- ຄວາມບໍ່ບຽດບຽນ ຄື ການດຳເນີນຊີວິດໄປຕາມທາງສາຍກາງ ການຜະລິດ ການບໍລິໂພກ ທີ່ສົມດຸນບໍ່ເນັ້ນປະໂຫຍດສ່ວນຕົວເປັນຫຼັກ ເຊິ່ງນຳໄປສູ່ການຍາດແຍ່ງແຂ່ງຊິງຈົນເປັນການບຽດບຽນຕົນເອງແລະຜູ້ອື່ນແລະທຳລາຍສິ່ງແວດລ້ອມ
- ຄວາມອົດທົນ ຄື ການຮັກສາປົກກະຕິພາວະຂອງຕົນໄວ້ໄດ້ ບໍ່ວ່າຈະຖືກກະທົບກະທັ່ງດ້ວຍສິ່ງອັນເປັນທີ່ປາຖະໜາຫຼືບໍ່ປາຖະໜາກໍຕາມ ມີຄວາມໝັ້ນຄົງໜັກແໜ້ນບໍ່ຫວັ່ນໄຫວ.
- ຄວາມທ່ຽງທຳ ຄື ຄວາມໜັກແໜ້ນ ຖືຄວາມຖືກຕ້ອງ ທ່ຽງທຳເປັນຫຼັກ
ບຸກຄົນຫຼືຜູ້ນຳທ່ານໃດ ຫາກໄດ້ຖືເອົາຫຼັກທຳ 10 ປະການນີ້ໄປໃຊ້ ໃນການບໍລິຫານ ຈະເຮັດໃຫ້ອົງກອນ, ສັງຄົມ ຫຼືປະເທດນັ້ນ ມີຄວາມສະຫງົບ ຮົ່ມເຢັນ ຈະເລີນກ້າວໜ້າ ແລະປະຊາຊົນຈະເທີດທູນນັບຖື.