ສຳນັກຂ່າວຕ່າງປະເທດ ລາຍງານໃນວັນທີ 13 ຕຸລາຜ່ານມານີ້ວ່າ ທ່ານ ສີຈິ້ນຜິງ ປະທານປະເທດຈີນ ໄດ້ເດີນທາງຢ້ຽມຢາມ ຣາຊະອານາຈັກກຳປູເຈຍ ຢ່າງເປັນທາງການ ໃນວັນທີ 13 ຕຸລາ 2016 ກຳນົດເວລາ 2 ວັນ ເພື່ອຮັດແໜ້ນສາຍພົວພັນຮ່ວມມື ລະຫວ່າງສອງປະເທດ ຊຶ່ງຄາດວ່າຈະມີການບັນລຸຂໍ້ຕົກລົງທາງເສດຖະກິດຮ່ວມກັນ ຫລາຍສະບັບ.

ປະຊາຊົນຊາວກຳປູເຈຍ, ນັກຮຽນ-ນັກສຶກສາ ປະມານ 2,000 ກວ່າຄົນ ໄດ້ຢືນລຽນແຖວໂບກທຸງຊາດ ແລະ ຖືຮູບຜູ້ນຳສອງປະເທດ ຕາມຖະໜົນອອກຈາກສະໜາມບິນ ນະຄອນຫລວງພະນົມເປັນ ເພື່ອຕ້ອນຮັບການຢ້ຽມຢາມດັ່ງກ່າວ ຊຶ່ງນັບເປັນການຢ້ຽມຢາມກຳປູເຈຍຄັ້ງທຳອິດຂອງ ທ່ານ ສີຈິ້ນຜິງ ນັບຕັ້ງແຕ່ເຂົ້າຮັບຕຳແໜ່ງປະທານປະເທດ ໃນປີ 2013.

ຈີນ ແລະ ກຳປູເຈຍ ມີມູນຄ່າການຄ້າສອງຝ່າຍຮ່ວມກັນ ບັນລຸ 4.4 ຕື້ໂດລາໃນປີ 2015 ຜ່ານມາ ແລະ ໄດ້ຕັ້ງເປົ້າໃຫ້ມີມູນຄ່າບັນລຸເຖິງ 5 ຕື້ໂດລາ ພາຍໃນປີ 2017, ການລົງທຶນຂອງຈີນໃນກຳປູເຈຍ ໃນປີ 2015 ຜ່ານມາ ມີມູນຄ່າທັງໝົດ 864 ລ້ານໂດລາ ແລະ ໃນປີນີ້ ລັດຖະບານຈີນໄດ້ປະກາດວ່າ ຈະໃຫ້ການຊ່ວຍເຫລືອກຳປູເຈຍ 600​ ລ້ານໂດລາ ໃນໄລຍະເວລາ 3 ປີຂ້າງໜ້າ.

ຕິດຕາມເຮົາທາງFacebook ກົດຖືກໃຈເລີຍ!