ສຳນັກຂ່າວຕ່າງປະເທດ ລາຍງານໃນວັນທີ 11 ຕຸລາຜ່ານມານີ້ວ່າ ທ່ານ ເຣເຊບ ເຕຢິບ ເອີໂດກັນ ປະທານາທິບໍດີຕວກກີ ແລະ ທ່ານ ວະລາດີເມຍ ປູຕິນ ປະທານາທິບໍດີຣັດເຊຍ ໄດ້ໃຫ້ຄຳໝັ້ນສັນຍາຮ່ວມກັນ ທີ່ນະຄອນຫລວງອິສຕັນບູນ ປະເທດຕວກກີ ໃນວັນທີ 10 ຕຸລາຜ່ານມາ ວ່າທັງສອງປະເທດ ຈະເພີ່ມທະວີສ້າງຄວາມຮ່ວມມືໃນທຸກດ້ານ ລວມທັງດ້ານຍຸດທະວິທີທາງການທະຫານ ໂດຍຕວກກີມີຄວາມພ້ອມ ທີ່ຈະຮັບຂໍ້ສະເໜີຂອງຣັດເຊຍ ສຳລັບການປະມູນເພື່ອສ້າງ ລະບົບປ້ອງກັນໄພທາງອາກາດໄລຍະໄກຂອງຕວກກີ.
ທ່ານ ປູຕິນ ໄດ້ກ່າວພາຍຫລັງຈາກການພົບປະກັນສອງຝ່າຍອີກວ່າ ລັດຖະບານຣັດເຊຍ ພ້ອມທີ່ຈະໃຫ້ການຮ່ວມມືກັບຕວກກີ ດ້ານອຸດສາຫະກຳປ້ອງກັນປະເທດ ພ້ອມທັງໄດ້ກ່າວອີກວ່າ ທັງສອງຝ່າຍມີຄວາມມຸ່ງຫວັງ ທີ່ຈະປ່ຽນສິ່ງນັ້ນໃຫ້ກາຍເປັນໂຄງການຮູບປະທຳ. ດ້ານທ່ານ ເອີໂດກັນ ກໍໄດ້ສະແດງຄວາມເຕັມໃຈຂອງຕວກກີ ຊຶ່ງພ້ອມທີ່ຈະພັດທະນາຄວາມສຳພັນກັບຣັດເຊຍ ໃນທຸກໆດ້ານ ລວມເຖິງດ້ານການປ້ອງກັນປະເທດ.
ການບັນລຸຄວາມຮ່ວມມືດັ່ງກ່າວນີ້ ໄດ້ເປັນສັນຍານຫລ້າສຸດ ຂອງຄວາມສຳພັນລະຫວ່າງຕວກກີ ແລະ ຣັດເຊຍ ທີ່ມີການພັດທະນາດີຂຶ້ນ ຫລັງຈາກທີ່ວິກິດການຄວາມສຳພັນດັ່ງກ່າວໄດ້ຕົກຕ່ຳລົງ ຈາກກໍລະນີກອງທັບອາກາດຕວກກີ ຍິງເຮືອບິນສູ້ຮົບຂອງຣັດເຊຍຕົກ ຢູ່ບໍລິເວນຊາຍແດນປະເທດຊີຣີ ເມື່ອເດືອນພະຈິກປີ 2015.
ຕິດຕາມເຮົາທາງFacebook ກົດຖືກໃຈເລີຍ!